D tara arzɛk n na n pʋɩ
1 Wẽnnaam Gomdã pida ne yɛl sẽn tar yõod d sẽn tõe n dɩk n mak ne arzɛka. (Yɩɩl 12:6; 119:11, 14) Daar a yembre, a Zezi rɩka makr toɛy-toɛy n wilg a karen-biisã yɛl wʋsg Wẽnnaam Rĩungã zugu, la a sok-b woto: “Yãmb wʋma bõn-kãens fãa võor bɩ?” B sẽn leok tɩ n-ye wã, a yeel-b-la woto: “[Karen-saamb] ninga fãa sẽn zãmse, la sẽn bãng arzãn soolem yɛla, yẽ wẽnda wa yir soab sẽn yãkd bõn-paals ne bõn-kʋd a paoong pʋgẽ.”—Mat. 13:1-52.
2 D tõe n dɩka bũmb nins tõnd sẽn bãng d sẽn wa n sɩng Biiblã zãmsgã n mak ne bõn-kʋda. D sã n modgd n zãmsd Biiblã n bãngd Wẽnnaam yel-zulumsã n paasdẽ, d na n bãnga bõn-paals tɩ yaa wa d sẽn yã arzɛka. (1 Kor. 2:7) Sẽn paase, “tʋm-tʋmd sẽn tũud sɩd la sẽn tar yamã” sõngda tõnd tɩ d wʋmd yɛl a taab võore, tɩ yaa bõn-paals ne tõndo.—Mat. 24:45.
3 D nanda bũmb nins d sẽn zãmsã fãa, b yaa kʋd tɩ b yaa paala. D sẽn yaa Wẽnnaam Gomdã karen-saam dãmbã yĩnga, kɩtame tɩ d rat tɩ b zãms tõnd tɩ d paam minim, sẽn na yɩl n wilg nebã bũmb nins tõnd sẽn zãms tɩ tar yõod wʋsgã.
4 A Zezi sẽn kõ makr ningã: A Zezi sẽn da nand arzɛk ning a sẽn paam Wẽnnaam nengẽ wã yĩnga, kɩtame t’a moon n wilg nebã rẽ. La baa ne a sẽn wa n yɛ wã, a kell n zãmsa nebã.—Zã 4:6-14.
5 A Zezi ra nonga neb nins sẽn pa mi Wẽnnaam la a raabã sõma wã, tɩ kɩt t’a moon-b Wẽnnaam koɛɛgã sẽn kõt fãagrã. (Yɩɩl 72:13) Neb nins sẽn da baood n na n bãng Wẽnnaam la a raabã ne b sũy fãa wã me nimbãaneg ra tara a Zezi, tɩ kɩt t’a ‘zãms-b bũmb wʋsgo.’—Mark 6:34.
6 D rɩk a Zezi togs-n-taare: Tõnd sã n nand arzɛk ning d sẽn tarã wa a Zezi, na n kɩtame tɩ d rat n lak Biiblã n wilg nebã arzɛk ning sẽn be a pʋgẽ wã. (Yel. 2:1-5) La baa ne tõnd sẽn mi n yɛ wã, d segd n ket n wilgda nebã bũmb nins Biiblã sẽn yetã ne yẽesem. (Mark 6:34) D sã n nand bũmb nins tõnd sẽn zãmsdã wʋsgo, na n kɩtame tɩ d moond koɛɛgã wa d sẽn tõe tɛka, la d baood wakat fãa n na n kẽes d mens zãng a pʋgẽ.