Yãmb tõe n yɩɩ karen-saamba!
1. Bõe la koe-moond fãa segd n bao n maane?
1 Bũmb ning sẽn kõt sũ-noog wʋsg koe-moonegã pʋgẽ n yɩɩd yaa f sẽn na n zãmsd ned Biiblã. A soabã sã n kelgd Rĩungã koɛɛgã tɩ f sõngda t’a kolgd yĩngr la tẽng Naabã, yaa zu-noog tɛkẽ! (Zak 4:8) Koe-moond fãa segd n baoome n zãms ned ning fãa sẽn dat n bãng sɩdã ne a sũur fãa Biiblã, la a sõng-a t’a maan toeeng a vɩɩmã pʋgẽ.—Mat. 28:19, 20.
2. Bõe n mi n kɩt tɩ kẽer pa rat n zãms nebã Biiblã, la bõe n tõe n sõng-b tɩ b tõog n mao ne zu-loe-kãngã?
2 Teeg-y-yã a Zeova: Pĩnd wẽndẽ wã, wẽn-sakdb kẽer ra maana sãmb-sãmb ne b na tõog n pids tʋʋmd ning Wẽnnaam sẽn bobl-bã. A Moiizi, a Zeremi, a Amos la neb a taab sẽn pa nin-bɛd teega a Zeova t’a sõng-b tɩ b paam daoodo, n tõog n pids tʋʋmd ning a sẽn bobl-bã. (Yik. 4:10-12; Zer. 1:6, 7; Amos 7:14, 15) Tʋm-tʋmd a Poll me yeelame tɩ Wẽnnaam kõo yẽ raood t’a tõog n moon koe-noogã. (1 Tes. 2:2) Dẽnd yaa vẽeneg tɩ tõnd fãa tõe n teega a Zeova t’a sõng-d la a kõ-d yam la pãnga, sẽn na yɩl tɩ d tõog n zãms nebã Biiblã tɩ wom biisi.—Ezai 41:10; 1 Kor. 1:26, 27; 1 Pɩɛ. 4:11.
3, 4. Bõe la b tũnugd ne n zãmsd tõnd sẽn na yɩl tɩ d tõog n zãms nebã Wẽnnaam Gomdã?
3 Sak-y tɩ b zãms-yã: Wẽnnaam a Zeova sẽn yaa tõnd karen-saam kãsengã kõta tõnd zãmsg sẽn tik Biiblã zug wakat fãa, sẽn na yɩl tɩ d yɩ karen-saam dãmb sẽn mi neb zãmsg sõma. (Ezai 54:13; 2 Tɩm. 3:16, 17) Modg-y n deeg zãmsgã, sẽn na yɩl n wʋm Biiblã võor n paase, la y tõog n zãms nebã Biiblã sẽn sɩd yet bũmb ninsã sõma me n paase. La baa ne sẽn yaa rẽ yĩng takɩ la b segl Wẽnnaam tʋʋmdã lekollã la Tʋʋmdã tigisgã, tigiss a taabã fãa me sõngda tõnd tɩ d zãmsd nebã Wẽnnaam Gomdã sõma.
4 Modg-y n bao n bãng y sẽn tõe n zãms nebã Biiblã yɛl nins sẽn tagmã faag-faag to-to. École du ministère sebrã neng 227 yeta woto: “Sẽn na yɩl tɩ nebã wʋm y sẽn yetã võore, yãmb menga segd n deng n wʋma a võor sõma.” D sã n kõt leoor tigissã sasa na n sõng-d lame tɩ yɛl nins b sẽn dat tɩ pa d yamẽ wã sɩd pa d yamẽ, sẽn na yɩl n wa tall n tʋm beoogo. Bɩ y segend zãmsgã sõma tɩ y na n talla raood n tõog n zãms nebã sõma.
5. Bõe me la tõnd tõe n maan tɩ sõng-d tɩ d minimã paase?
5 Pipi kiris-nebã ra rɩkda taab togs-n-taare, b sã n wa moond koɛɛgã. (Luk 10:1) Sã n tõeeme bɩ y tũ so-pakdbã, kãsem dãmbã, tigims sull bɩ distrik yel-gɛtbã, pa rẽ bɩ koe-moondb a taab sẽn tar minim n kẽng Biibl zãmsgo. Ges-y b sẽn tũnugd ne foto rãmbã, la makr nins b sẽn dɩk sɛbã pʋsẽ wã n zãmsd nebã to-to wã. Sok-y-b n bãng y sẽn tõe n maan to-to n tõog n zãms nebã sõma. (Yel. 1:5; 27:17) Sak-y n tũ-y bũmb nins b sẽn na n wilg yãmbã, bala yita Wẽnnaam nengẽ.—2 Kor. 3:5.
6. Sẽn yɩɩd fãa bõe la d segd n maane, sẽn na yɩl n lebg Wẽnnaam Gomdã karen-saamba?
6 Teeg-y a Zeova la y rɩ zãmsg nins a sẽn kõt yãmbã nafa. Pʋʋs-y a Zeova n kos-a t’a sõng-y tɩ y minimã paase. (Yɩɩl 25:4, 5) Yãmb me sã n sõng ned t’a wa lebg Wẽnnaam Gomdã karen-saamb wa yãmba, y sũur na n yɩɩ noog wʋsgo!