Tɩbsg bʋg buud la y na n yãke?

Dũniyã gill zugu, b maanda woperasiõ rãmb logto-yi wʋsg pʋsẽ n pa ningd nebã zɩɩm ye. Hal sẽn ta zĩ-bʋg la yãmb mi tɩbsg toɛy-toɛy nins sẽn ka tũnugd ne zɩɩmã? Tõnd segd n bãnga tɩbsg buud toor-toor kãensã, sẽn na yɩl n yãk d sẽn dat tɩ b tɩp-d to-to wã. Ges-y video ning gom-zug sẽn yaa: Pas de sang — la médicine relève le défi wã. Rẽ poore, bɩ y pʋʋs la y leok sogsg nins sẽn pʋgdã n ges y sẽn tõog n bãng bũmb ninga. Vẽnegre: Video wã sẽn tar zĩis b sẽn wilgd woperasiõ rãmbã yĩnga, kom-bõoneg sã n na n naag n ges video wã, roagdbã segd n maana gũusg wʋsgo.

1) Bʋʋm kãseng bʋg n kɩt t’a Zeova Kaset rãmba pa sakd tɩ b ning-b zɩɩm? 2) Tɩbsg bʋg buud la a Zeova Kaset rãmbã rata? 3) Dʋrwa bʋg la bãad fãa tara? 4) Bõe yĩng tɩ yaa yam tʋʋmd tɩ b yãk tɩbsg buud nins sẽn pa tũud ne zɩɩmã? 5) Zɩɩm wʋsg sã n daag woperasiõ sasa, bũmb a yi bʋs la logtoɛɛmbã segd n yɩ tao-tao n maane? 6) Bũmb a naas bʋs la b segd n maan n tõog n tɩp ned n pa ning-a zɩɩm? 7) Bõe la logtoɛɛmbã tõe n maane n kɩt tɩ a) zɩɩm da raag wʋsg woperasiõ sasa, b) globill ruuz rãmb da sa, d) yĩngã maand zɩɩmã n paasdẽ, la e) bãad lebs n paam zɩɩm wa a sẽn da tar pĩndã? 8) Bilg-y tɩbsg nins sẽn pʋgdã a) emodilisɩõ, b) rekiperasɩõ de sã epãnse. 9) Tɩbsg sẽn pa tũud ne zɩɩmã wɛɛngẽ, bõe la yãmb rat tɩ logtoɛɛmbã togs-yã? 10) Rẽ yĩnga, b tõe n maana ned woperasiõ sẽn yaa kɛgeng n pa ning-a zɩɩm bɩ? 11) Bõe la logtoɛɛmbã kẽer sakd n maand masã tɩ yaa sõma?

Tɩbsg nins b sẽn wilg video kãngã pʋgẽ wã kẽer sakr bee ne ned kam fãa yam yãkr la a sũur kaseto. Rẽ yĩnga, yãmb zoe n yãka tɩbsg ning buud y mensã la y kambã sẽn tõe n saka bɩ? Yãmb pidsa kart depeya wã (DPA) bɩ? Sẽn na n yɩl n paam kibay a taab n paase, bɩ y ges “Karemdbã sogsgo,” sẽn be yʋʋmd 2004, sigr kiuug rasem 15 Gũusg Gasgã ne farende, la yʋʋmd 2000, sɩpaolg kiuug pipi daar Gũusg Gasgã ne moorã pʋgẽ. Dẽ poore, vaees-y yʋʋmd 2006, sɩpaolg kiuugã Rĩungã tʋʋmd seb-paasdmã sẽn yet tɩ “Wãn to la mam tagsd ne tɩbsg buud toɛy-toɛy nins sẽn tũud ne m zɩɩmã, bɩ ne bõn-kɩds nins b sẽn yãkd zɩɩmã pʋgẽ wã?” n yãk tɩbsg nins y sẽn dat la y sẽn pa ratã fãa, n yaool n gʋls rẽ y kart depeya wã zugu. Y segd n kɩtame tɩ logtoɛɛmb nins sẽn na n tɩp yãmbã, la y zakã neb nins sẽn pa a Zeova Kaset rãmbã bãng yãmb sẽn yãk bũmb ning tɩbsgã wɛɛngẽ wã.

[Zĩ-gũbri, seb-neng a 2]

• Yãmb zoe n yãka tɩbsg nins buud y mensã la y kambã sẽn na n sakã bɩ?

• Yãmb pidsa y kart depeya wã n sui n kẽnd y sẽn tõe n wa rat tɩbsg tao-tao wã yĩng bɩ?