Yãmb kaoosda y kart DPA wã pidsg bɩ?

Sẽn mik tɩ tõnd ned baa a ye pa mi a vɩɩmã sẽn na n yɩ a soab beoogã, yaa masã la d segd n deng n gʋls n wilg tõnd sẽn dat tɩbsg ning buudu, sã n wa mik tɩ d dat tɩbsg tao-tao. (Zak 4:14; Tʋʋ. 15:28, 29) Sẽn na yɩl n sõng-d tɩ d bãng tɩbsg ning d sẽn datã n yãke, b yiisa video t’a gom-zugã yaa Soigner sans transfuser—Besoins et droits du patient. Ges-y video kãngã, tɩ rẽ poor bɩ y pʋʋs la y leok sogsg nins sẽn be tẽngrã n ges y sẽn tõog n zãms bũmb ninga.—Vẽnegre: Sẽn mik tɩ video wã zĩis kẽere b wilgda b sẽn wopeerd nebã, kom-bõoneg sã n na n naag n ges video wã, bɩ roagdbã maan gũusgu.

1) Bõe yĩng tɩ logtoɛɛmb kẽer toeemd b sẽn da tagsd to-to zɩɩmã ningr wɛɛngẽ? 2) Wilg-y wopeerg buud a tãab sẽn yaa toog b sẽn maan n pa ning zɩɩm. 3) Dũniyã zugu, logtoɛɛmb a wãn n wilg tɩ b sakame n na n wopeer nebã n pa ning-b zɩɩm? Bõe yĩng tɩ b sak n na n maan woto? 4) Vaeesg ning logtoɛɛmbã sẽn maan tɩ nan pa kaoosã wilga bõe zɩɩmã tall n tɩp nebã wɛɛngẽ? 5) Bõe n tõe n paam neda, a sã n deeg zɩɩm? 6) Bãngdb wʋsg sak n deegame tɩ tɩbsg nins sẽn ledgd zɩɩmã ningrã tara nafa bʋse? 7) Bõe n kɩtd tɩ ned zɩɩm wa boog wʋsgo? Ned zɩɩm tõe n boog n taa zĩ-bʋg t’a ket n vɩya? Bõe la b tõe n maan n kɩt tɩ ned zɩɩm paase? 8) Bõe la b tõe n maan n sõng yĩngã t’a maan zɩɩmã (bɩ globules rouges rãmbã) n paase? 9) Rũndã-rũndã, bõe la logtoɛɛmbã maand sẽn na yɩl tɩ zɩɩmã da raag wʋsg wopeerg sasa? 10) Rẽ yĩnga tɩbsg nins sẽn tõe n ledg zɩɩmã ningrã tara yõodo, sã n wa yaa kamba, bɩ sã n wa yaa yõor yelle? 11) Bõe la d tõe n tik n bãng tɩbsg sẽn yaa sõma? 12) Bõe yĩng tɩ tar yõod tɩ kiris-nebã reng n yãk tɩbsg nins sẽn pa tũud ne zɩɩmã, nand tɩ bãag yõk-ba? Wãn to la d tõe n maan dẽ?

Tɩbsg nins yell b sẽn gom video wã pʋgẽ wã sʋka, kẽer yaa ned kam fãa n segd n yãk a sã n na n sakame bɩ a pa na n sake. Bee ne ned kam fãa sũur kasetã sẽn kõt-a sor ningã. Yãmb zoe n yãka tɩbsg ning y mensã la y kambã sẽn na n sak bɩ? Sẽn na yɩl n paam kibay a taab n paase, bɩ y ges “Karemdba sogsgo,” sẽn be yʋʋmd 2004, sigr kiuug rasem 15 Gũusg Gasgã ne farendã pʋgẽ, la yʋʋmd 2000, sɩpaolg kiuug pipi daar Gũusg Gasgã ne moorã pʋgẽ, ne yʋʋmd 2006, sɩpaolg kiuugã Rĩungã Tʋʋmd seb-paasdmã pʋgẽ, gom-zug ning sẽn yaa “Wãn to la mam tagsd ne tɩbsg buud toɛy-toɛy nins sẽn tũud ne m zɩɩmã, bɩ ne bõn-kɩds nins b sẽn yãkd zɩɩmã pʋgẽ wã.” Y segd n kɩtame tɩ y zakã neb nins sẽn pa a Zeova Kaset rãmbã, la neb nins yʋy sẽn be yãmb kartã zugã bãng yãmb sẽn dat tɩbsg ning buudã.