Video sẽn wilgd tɩbsg buud sẽn tar yõod wʋsgo

Rũndã-rũndã, bʋ-kaoodbã la logtoɛɛmbã sakd n deegdame tɩ bãad rãmbã tara b sẽn tagsde, la b dʋrwa rãmb tɩbsgã wɛɛngẽ. Rẽ kɩtame tɩ b bao tɩbsg buud la manesem paals n paase, tɩ woto tõe n naf a Zeova Kaset rãmbã. (Tʋʋ. 15:28, 29) Yaa yel-kãensã zug la kasɛt video ning gom-zug sẽn yaa Soigner sans transfusion : besoins et droits du patient wã gomd n tadgdẽ. Reng-y n ges-y video kãngã, la y lebg n ges y sẽn zãms bũmb ning a pʋgẽ wã.—Vẽnegre: Sẽn mik tɩ video wã zĩis kẽere b wilgda b sẽn wopeerd nebã yĩnga, kom-bõoneg sã n naag n na n ges video wã, roagdbã segd n maana gũusgu.

1) Bõe yĩng tɩ logtoɛɛmb kẽer remsd b tagsg zɩɩmã ningr wɛɛngẽ? 2) Wilg-y wopeerg buud a tãab sẽn yaa toog b sẽn tõe n maan n pa ning zɩɩm ye. 3) Dũniyã zugu, logtoɛɛmb a wãn n wilg tɩ b sakame n na n wopeer neb n pa ning-b zɩɩm? Bõe yĩng tɩ b sakd n maand woto? 4) Logtoɛɛmbã sẽn vaees n yã mas-masã pʋgẽ wã wilgda bõe zɩɩmã tall n tɩp nebã wɛɛngẽ? 5) Zu-loe-bʋs n tõe n paam neda, a sã n deeg zɩɩm? 6) Bãngdb wʋsg sak n deegame tɩ tɩbsg nins sẽn ledgd zɩɩmã tara nafa bʋse? 7) Bõe n kɩtd tɩ ned zɩɩm wa rat n sa? Ned zɩɩm tõe n boog n taa zĩ-bʋg t’a ket n vɩya? Bõe la b tõe n maan n kɩt tɩ ned zɩɩm paase? 8) Bõe la b tõe n maan n sõng yĩngã t’a maan zɩɩmã (bɩ globules rouges rãmbã) n paase? 9) Rũndã-rũndã, bõe la logtoɛɛmbã maand sẽn na yɩl n gɩdg zɩɩmã t’a da raag wʋsg wopeerg sasa? 10) Rẽ yĩnga tɩbsg nins sẽn tõe n ledg zɩɩmã ningrã tara yõodo, sã n wa yaa kamba, bɩ sã n wa yaa yõor yelle? 11) Bõe la d tõe n tik n bãng tɩbsg sẽn yaa sõma? 12) Bõe yĩng tɩ tar yõod ne kiris-nebã tɩ b reng n yãk tɩbsg sẽn pa tũud ne zɩɩm? Wãn-to la d tõe n maan dẽ?

F na sak bɩ f kõn sak tɩbsg buud nins b sẽn wilg video wã pʋgẽ wã, bee ne ned kam fãa sũur kaset sẽn paam Biiblã kiblgã sẽn kõt-a sor ningã. Yãmb zoe n yãka tɩbsg buud ning y mensã la y kambã sẽn na n sak bɩ? Y segd n wilga sard ning y sẽn dɩkã y zakã neb nins sẽn pa a Zeova Kaset rãmbã, la y wilg-b bũmb ning sẽn kɩt tɩ y rɩk sard kãngã wã.—Ges-y “Karemdba sogsgo,” sẽn be yʋʋmd 2004, sigr kiuug rasem 15 Gũusg Gasgã ne farende, la yʋʋmd 2000, sɩpaolg kiuug pipi daar Gũusg Gasgã ne moorã pʋgẽ wã.