Video sẽn wilgd logtoeemd tʋʋmd na-kẽndr sẽn yaa kãsenga
Bʋkaoodbã la logtoɛɛmbã sakda bãad rãmbã tagsg ne sẽn yaa sõma la sẽn pa sõma wã wɛɛngẽ la b dʋrwa rãmbã n yɩɩd masã. Rẽ waa ne bãas tɩbs-paal sẽn tõe n naf a Zeova Kaset rãmbã. (Tʋʋ. 15:28, 29) Yaa rẽ zug la video ning gom-zug sẽn yaa Soigner sans transfuser : les besoins et les droits du patient (Tɩbsg sẽn pa tũ ne zɩɩm deegre: bãadã bõn-datem la a dʋrwa rãmba) tik-yã. Ges-y video kãng la y lebg n ges y sẽn zãms bũmb ningã.—Vẽnegre: Video kãngã tara zĩis b sẽn wilgd wopeere logtoɛɛmb sẽn maand koɛɛg-koɛɛga, rẽ n so tɩ roagdbã segd n maan gũusg b sã n wa get-a ne b kom-bõonegã.
1) Bõe yĩng tɩ logtoɛɛmbã lebg masã n tagsd n get nebã zɩɩm ningrã sã n tara yõodo? 2) Kõ-y makr a tãab sẽn wilgd wopeer-kãsems sẽn yaa toog b sẽn maan n ka ning zɩɩm ye. 3) Dũniyã gill zugu, logtoɛɛmb a wãn n wilg tɩ b sakame n na n tɩbs bãad dãmbã n ka ning zɩɩm? Bõe yĩng tɩ b sak n na n maan woto? 4) Vaeesg logto-yiy sẽn maan tɩ nan pa kaoos wilgda bõe zɩɩm ningrã wɛɛngẽ? 5) Nebã zɩɩm ningrã wata ne zu-loe-bʋs tɩbsgã pʋgẽ? 6) Bõe la mitb wʋsg yeel tɩt nins sẽn tõe n ledg zɩɩmã wɛɛngẽ? 7) Bõe n mi n kɩt tɩ zɩɩmã paooge? Hal sẽn ta zĩ-bʋg la zɩɩm tõe n paoog ned t’a ket n tõe n vɩɩmde? Bõe la b tõe n maan tɩ lok zɩɩmã sẽn paoogã? 8) Bõe la b tõe n maan tɩ sõng bãad t’a yĩngã maan zɩɩm n paase? 9) Bõe la logtoɛɛmbã maand sẽn na yɩl tɩ zɩɩmã da raag wʋsg wopeergã sasa? 10) Rẽ yĩngã tɩt nins sẽn ledgd zɩɩmã tõe n sõnga kom-bõonegã, bɩ neb nins sẽn paam bãas bɩ sãmpoag tɩ b sã n ka maan tʋʋll-tʋʋll bɩ tõe n tũ ne b yõorã bɩ? 11) Logtoeemd tɩbsg sẽn yaa sõma noor a yembr b sẽn tũud la bʋgo? 12) Bõe yĩng tɩ tar yõod tɩ kiris-nebã reng n wilg tɩ b ka rat tɩbsg sẽn tũud ne zɩɩmã? Wãn-wãn la d tõe n maan dẽ?
Bee ne ned kam fãa t’a yãk yam a sã n na n saka tɩbsg kẽer b sẽn wilg video wã pʋgẽ, tɩ zems ne a sũur kasetã sẽn paam zãmsg ne Biiblã maasmã. Yãmb zoe n yãka y sẽn na n sak tɩt nins sẽn ledg zɩɩmã yãmb la y kambã yĩng bɩ? Y segd n wilga yãmb roagdb nins sẽn pa Kaset rãmbã tɩ b bãng sard nins y sẽn dɩkã vẽenega, la bũmb ning sẽn kɩt tɩ y rɩk sard kãensã.—Ges-y “Karemdbã Sogsgo,” sẽn be yʋʋmd 2000, sigr kiuug rasem 15 (ne farendã) la ne sɩpaolg kiuugu pipi daar Gũusg Gasgã pʋgẽ.