Koɛɛgã mooneg kɩtdame tɩ zood ning d sẽn tar ne a Zeova wã pãng paasdẽ
1. D sã n moond koɛɛgã, nafa bʋs la d paamda?
1 D sã n moond koɛɛgã wakat fãa, kɩtdame tɩ zood ning d sẽn tar ne a Zeova wã pãng paasdẽ, la kɩtdẽ tɩ d sũ-noogã me paasdẽ. Yaa sɩd tɩ bʋʋm kãseng ning sẽn kɩt tɩ d moond koɛɛgã yaa d sẽn dat n noog a Zeova sũurã. La d sã n sak noor ning sẽn yet tɩ d ‘moon koɛɛgã,’ d paamda a Zeova barkã la nafa a taab me. (2 Tɩm. 4:2; Ezai 48:17, 18) Wãn to la koɛɛgã mooneg tõe n sõng-d tɩ d paam sũ-noogo, la kɩt tɩ zood ning d sẽn tar ne a Zeova wã pãng paase?
2. Wãn to la koɛɛgã mooneg paasd d tẽebã pãngã?
2 D tẽebã pãng paasdame la d paamd bark a taaba: Koɛɛgã mooneg kɩtdame tɩ d tagsd Rĩungã sẽn na n wa ne nafa ninsã yell n yɩɩd zu-loees nins d sẽn segd rũndã-rũndã wã. (2 Kor. 4:18) D sã n wilgd nebã Biiblã sẽn yet bũmb ninsã, kɩtdame tɩ d maneg n tẽed a Zeova sẽn pʋlm bũmb ninsã n paasdẽ, la kɩtdẽ tɩ d wilgd d mi-beoog d sẽn bãng sɩdã yĩnga. (Ezai 65:13, 14) D sã n sõngd nebã tɩ b paamd zood ne a Zeova sẽn na yɩl tɩ b ra yɩ “dũniyã rẽnda,” sõng-d lame tɩ d kell n paam pãng n lak d mens ne dũniyã.—Zã 17:14, 16; Rom 12:2.
3. Wãn to la koɛɛgã mooneg sõngd-d tɩ d paamd zʋg-sõma?
3 D sã n moond koɛɛgã, sõng-d lame tɩ d paamd zʋg-sõma nins kiris-ned sẽn segd n tallã. Wala makre, d sẽn modgdẽ n dat n ‘lebg bũmb fãa nebã yĩnga’ sõng-d lame tɩ d yɩ sik-m-mens rãmba. (1 Kor. 9:19-23) D sã n moond koɛɛgã neb nins ‘sũy sẽn sãam tɩ b pãng sɛ n yaa wa piis sẽn ka tar kɩɩmã,’ sõng-d lame tɩ d yɩ nimbãan-zoɛtba. (Mat. 9:36) D sã n kell n modg n moond koɛɛgã baa nebã sã n pa rat n kelg bɩ b kɩɩsd-do, na n kɩtame tɩ d yɩ neb sẽn tõe toogo. D sã n dɩkd d sẽkã n sõngd nebã, d sũ-noogã paasdame. —Tʋʋ. 20:35.
4. Yãmb tagsg yaa bõe ne koɛɛgã y sẽn moondã?
4 Yaa Zeova a ye la d segd n tũ. Ad d sẽn tõe n moon koɛɛgã n pẽg-a wã sɩd yaa zu-noog tɛkẽ! Koɛɛgã mooneg paasda tõnd tẽebã pãnga. Tõnd ned kam fãa sã n ‘togsd koe-noogã neere,’ a paamda bark wʋsgo.—Tʋʋ. 20:24.