Koe-moonegã sõngd-d lame tɩ d pa yaadẽ ye
1 Wẽnnaam Gomdã sagend-d lame tɩ “d zoe zoees ninga sẽn be tõnd taoorã n da yɛ ye.” (Heb. 12:1) Wala zoees wags-taab pʋgẽ nebã sẽn segd n zoe hali n wa paam keoorã, tõnd me segd n kell n zoeeme n wa paam vɩɩm sẽn-kõn-sa wã sẽn yaa d keoorã. (Heb. 10:36) Wãn-wãn la koe-moonegã tõe n sõng tõnd tɩ d tõog n tall tẽeb hal n tãag saabã?—Mat. 24:13.
2 A paasda d tẽebã: Tõnd sẽn moond tɩ Biiblã pʋgẽ, Wẽnnaam kãabame tɩ dũni-paalg n wat tɩ tɩrlem na n zĩnd a pʋgẽ wã, kɩtdame tɩ d saagrã ket n tar pãnga. (1 Tes. 5:8) D sã n moond koe-noogã wakat fãa, d paamda segb n kɩtdẽ tɩ nebã bãngd sɩd ning d sẽn zãms Biiblã pʋgẽ wã. D paamda segb n gomd d tẽebã yell ne nebã tɩ rẽ paasd d tẽebã keelem.
3 Sẽn na yɩl n zãms neb a taabã sõma, tõnd meng segd n wʋmda Biiblã sɩdã võor vẽenega. D segd n maanda vaeesg la d bʋgsd bũmb ning d sẽn zãmsda zugu. Modg-kãng paasda d bãngrã la d tẽebã, n manegd-d tẽebã wɛɛngẽ. (Yel. 2:3-5) Woto, d sẽn baood n na n sõng neb a taabã, d wẽneg n kengda d mense.—1 Tɩm. 4:15, 16.
4 Biiblã sẽn gom “Wẽnnaam zab-teed” nins fãa tõnd sẽn segd n bob sẽn na yɩl n tõog n yals kãn-kãe a Sʋɩtãan ne a zĩn dãmbã taoor yellã, a sõdga kẽes f meng ne yẽesem koe-moonegã pʋgẽ wã n naage. (Ef. 6:10-13, 15) D sẽn moond koe-noogã wakat fãa wã, d tagsda bũmb nins sẽn kengd d tẽebã zugu, n pa basdẽ t’a Sʋɩtãan dũniyã sãam d tagsgã la d manesmã ye. (Kol. 3:2) D sẽn zãmsd neb a taabã a Zeova soayã, d tẽegda wakat fãa tɩ tõnd meng segd n talla yel-manesem sẽn yaa sõma.—1 Pɩɛ. 2:12.
5 Wẽnnaam kõt-d-la pãnga: Sẽn na n baase, d sẽn moond koe-noogã, d teegda a Zeova. (2 Kor. 4:1, 7) Rẽ sɩd yaa bõn-sõng tɛkẽ! D sẽn teegd a Zeova n paasdẽ wã pa kɩtd tɩ d tõogd n moond koe-noogã bal ye, leb n kɩtdame tɩ d tõe n mao ne yell ning fãa d sẽn segd d vɩɩmã pʋgẽ. (Fil. 4:11-13) Sɩd-sɩda, sẽn na yɩl n da ya, d segd n teega a Zeova zãng-zãnga. (Yɩɩl 55:23) Koe-moonegã sõng-d-la ne manesem buud toor-toor tɩ d pa yaadẽ ye.