D sẽn tõe n moon rapã to-to
1. Wẽnnaam tʋʋmdã wɛɛngẽ, bõe la d rat ne d sũy fãa?
1 Koɛɛgã mooneg sẽn tar paasg yaoolem da-kãensã sasa wã yĩnga, d rata rap sẽn tar zood sõma ne a Zeova tɩ b wa lebg kãsem dãmb n lʋɩ taoor n tʋm Wẽnnaam tʋʋmã. (Mark 4:30-32; Tʋʋ. 20:28; 1 Tɩm. 3:1-13) La zĩis kẽere, pagbã sẽn sakd sɩdã sõor yɩɩda rapã. Tẽns sãnda pʋsẽ, rapã tẽedame tɩ tũudmã yell la kambã wubr yaa pagbã tʋʋmde. Wãn to la d tõe n sõng rapã tɩ b bãng tɩ b rata Wẽnnaam sor-wilgri, la b wa naag tõnd tũudum hakɩkã pʋgẽ?
2. A Poll ne a Pɩɛɛr sẽn modg n moon rapã womã bi-bʋse?
2 D moond rapã: Zak soab sã n sak sɩdã, naoor wʋsgo, a yɩta sabab t’a zakã neb wa naag yẽ tũudum hakɩkã pʋgẽ. Wala makre, a Poll ne a Sɩlas sẽn wa n be bãens roogẽ wã, b moona gũudã. Gũudã ne a zakã neb fãa reega lisgu. (Tʋʋ. 16:25-34) A Poll sẽn moon Korẽnt nebã, kɩtame t’a “Kirispus sẽn yaa karen-doog naaba ne a yir dãmbã fãa tẽ Zusoabã.” (Tʋʋ. 18:8) A Zeova kɩtame t’a Pɩɛɛr moon sodaas naab a Korney sẽn da yaa “nin-sõng la a zoet Wẽnnaamã.” A Korney ne a roagdbã la a zo-rãmb kẽer reega lisgu.—Tʋʋ. 10:1-48.
3. Wala a Filipi, nin-bɛd bʋs la yãmb me tõe n moon koɛɛgã?
3 D sã n moond nin-bɛdã, tõe n woma bi-sõma. (1 Tɩm. 2:1, 2) Wala makre, a Zeova malɛkã sagla a Filip t’a tɩ moon “balem naaba” sẽn yaa Etiopi rãmba rĩm-poakã ligd gũudã. A Filip wʋma raoã sẽn “karemd Wẽnnaam no-rɛɛs a Ezai sebre,” t’a sõs ne-a n wilg-a tɩ yaa a Zezi yell la no-rɛɛsã sẽn gomdã. Raoã lebga a Zezi karen-biiga, la tõe t’a ra moonda koe-noogã la a kuusẽ. Tõe me t’a tɩ moona rĩm-poakã la na-yirã neba. Nin-kãensã ra pa tar zu-noog n na n paam koe-noogã n kelg ye.—Tʋʋ. 8:26-39.
4. Bõe la d tõe n maan sẽn na yɩl tɩ rapã paam n wʋm koe-noogã?
4 D sẽn tõe n paam rapã to-to: Sẽn mik tɩ rapã mi n looga tʋʋma, d tõe n manega d sẽkã sẽn na yɩl n moond wʋsg b tʋʋmã sigb poore, wɩkɛn dãmbã bɩ kibs rãmbã sasa. D sã n kẽnd tʋʋmã zĩisẽ n moondẽ, d na n paama zu-noog n moon rap nins sẽn pa wae n be b zagsẽ wã. Saam-biisã tõe n modg n moonda b tʋmd-n-taas nins sẽn yaa rapã. D sã n wa moond zak ne zaka, sẽn yɩɩd fãa zĩis nins d sẽn wae n moondẽ wã, saam-biisã tõe n modg n sokda zak-soben-dãmbã yell sẽn na yɩl n paam n sõsd ne-ba.
5. Saam-bi-poak sã n moon rao t’a wilg t’a rat n bãng n paasame, bõe la a segd n maane?
5 Saam-bi-poak sã n moon rao t’a wilg t’a rat n bãng n paasame, a pa segd n lebg n tɩ kaag raoã a yembr ye. A segd n kɩtame t’a sɩdã bɩ koe-moond a to yãag-a. Raoã sã n ket n dat n zãms n paasame, yɩta sõma t’a bas tɩ saam-biig sẽn mi neb zãmsg sõma kẽnd n kaagd-a.
6. Sẽn na yɩl ‘n paam tɩ neb wʋsg’ kelg koɛɛgã, wãn to la d tõe n dɩk tʋm-tʋmd a Poll togs-n-taare?
6 Yãk-y sõss sẽn tõe n yɩ rapã noogo: Tʋm-tʋmd a Poll ra tagsda a kɛlgdbã yell n yãkd sõss sẽn zemse, sẽn na yɩl ‘n paam tɩ neb wʋsg’ kelge. (1 Kor. 9:19-23) Tõnd me segd n yãka sõss sẽn tõe n yɩ rapã noogo, la d segl d mens sõma. Wala makre, yaa ligdã kaalem, zakã koglg la goosneemã wã yell n mi n pak rapã. Sẽn paase, b mi n dat n bãnga vɩɩmã yõodo, tẽngã sẽn na n wa lebg bũmb ningã, la bũmb nins sẽn kɩt tɩ Wẽnnaam bas tɩ namsgã beẽ wã. D sã n tikd yel-kãensã zut n sõsd ne rapã, b na n sɩd sak n kelga koe-noogã sõma.—Yel. 16:23.
7. Saam-bi-poak sɩd sã n wa tigisga, wãn to la d fãa tõe n sõng-a?
7 D sõng pʋg-sɩdb nins sẽn pa a Zeova Kaset rãmbã: Naoor wʋsgo, d saam-bi-pogsã manesem sõngã mi n kɩtame tɩ b sɩdbã sẽn pa a Zeova Kaset rãmbã rat n kelg koɛɛgã. La tigingã neb me manesem tõe n sõnga nin-kãensã. (1 Pɩɛ. 3:1-4) Rao sẽn pa a Zeova Kaset soab sã n tũ a pag sẽn yaa d saam-bi-poak n wa tigisga, tigingã neb sẽn na n deeg-a to-to wã tõe n kɩtame t’a toeeme. A sẽn sak n wa wã tõe n yaa kaset sẽn wilgd t’a rat n bãnga sɩdã, la a tõe n saka Biiblã zãmsgo.
8. Bõe la saam-biisã tõe n maan sẽn na yɩl n sõng pʋg-sɩdb nins sẽn pa wae n sakd n kelgd koe-noogã?
8 Sasa ninga, pʋg-sɩdb kẽer pa wae n sakd n kelgd koe-noogã ye. La kaoosg poore, b tõe n wa rat n zãmsa Biiblã ne saam-biis sẽn sõsd ne-b sõma. Tiging a ye saam-biis modgame n tɩ kaag saam-bi-poak a ye sɩd sẽn pa a Zeova Kaset soaba, n tik yɛl nins b sẽn mi tɩ na n yɩ-a-la noogã zug n sõs ne-a. Woto kɩtame t’a sak n na n zãms Biiblã, la masã a reega lisgu. Saam-biig a ye me n tɩ sõng saam-bi-poak sɩd t’a me lalg n gũbg a zaka. A sẽn maan woto n wilg t’a nong-a lame wã, kɩtame tɩ raoã sak tɩ b na n sɩng Biiblã zãmsgo. (Gal. 6:10; Fil. 2:4) Yãmb sã n yaa rao n be tigingã pʋgẽ, y me tõe n bao n sõsa ne saam-bi-pogs sɩdb sẽn pa a Zeova Kaset rãmba, sẽn na yɩl n sõng-ba.
9. D sã n zãms saam-biiga, tõe n woma bi-bʋse?
9 D zãms saam-biisã tɩ b wa tõog n tʋm Wẽnnaam tʋʋmã: Rap nins sẽn lebg a Zeova Kaset rãmb la b baood zu-noog tʋʋm tigingã pʋgẽ wã tõe n wa lebga “kũun sẽn yaa neba,” rat n yeel tɩ kãsem dãmba, sẽn dɩkd b bãngrã la b pãngã n sõngd a Zeova nin-buiidã. (Ef. 4:8, NW; Yɩɩl 68:19) Nin-kãensã geta tigingã yell ne yamleoog la ne b sũy fãa. (1 Pɩɛ. 5:2, 3) Woto sɩd yaa bark tɛk saam-biisã fãa yĩnga!
10. Wãn to la a Ananias sẽn sõng a Pollã naf neb wʋsgo?
10 Baa ne a Soll sẽn nams kiris-nebã wʋsgã, a wa n lebga “bu-zẽms tʋm-tʋmda.” (Rom 11:13) Yaa a sẽn da maand woto wã yĩng n kɩt t’a Ananias ra pa rat n moon-a wã. La baa ne rẽ fãa, a Ananias tũu Zusoabã sor-wilgr n sak n moon a Solle, tɩ tũ ne sabab-kãng t’a wa lebg tʋm-tʋmd a Polle. A Poll koe-moonegã nafã neb tusa sẽn sak n kelg-a wã yʋʋm wʋsg pʋgẽ, tɩ sɛb nins vʋʋsem sõngã sẽn vẽeneg-a t’a gʋlsã me nafd neb milyõ rãmb rũndã-rũndã.—Tʋʋ. 9:3-19; 2 Tɩm. 3:16, 17.
11. Bõe yĩng tɩ d segd n maan toeems nins fãa sẽn yaa tɩlae sẽn na yɩl n tõog n moon rapã?
11 Bɩ d modg n maan toeems nins fãa sẽn yaa tɩlae, sẽn na yɩl n tõog n moon rapã. D sã n maand woto, d tõe n kɩsa sɩd t’a Zeova na n ning-d-la barka, d sẽn modg n maand a raabã la d tʋmd a tʋʋmã.