D sõng d tẽed-n-taag pag bɩ a sɩd sẽn pa a Zeova Kaset soaba
1. Bõe yĩng tɩ d tõe n yeel tɩ pa neb nins pagb bɩ b sɩdb sẽn pa a Zeova Kaset rãmbã bal n dat tɩ b wa sɩdã pʋgẽ?
1 Yãmb tigingẽ wã, koe-moondb n be tɩ b pagbã bɩ b sɩdbã pa a Zeova Kaset rãmb bɩ? Sãmbg sẽn ka be, bãmb rãmbã ratame tɩ b sɩdbã bɩ b pagbã wa naag-b tũudum sẽn yaa sɩdã pʋgẽ. La pa bãmb bal n dat woto ye. Wẽnnaam menga, la tigingã neb fãa me “ratame tɩ neba [buud, NW ] fãa paam fãagre, la b bãng sẽn yaa sɩda.” (1 Tɩm. 2:4) La bõe la d tõe n maan n sõng d tẽed-n-taag pag bɩ a sɩd sẽn pa a Zeova Kaset soaba?
2. Bõe n tõe n sõng tõnd tɩ d tõog n sõng d tẽed-n-taag pag bɩ a sɩd sẽn pa a Zeova Kaset soaba?
2 Pipi, d segdame n bao n bãng ned ning sẽn pa a Zeova Kaset soabã tagsgo. Bãmb wʋsg nonga b pagã bɩ b sɩdã, la b kambã, n modgd n get b yell sõma. La zu-loɛɛgã yaa tɩ bãmb me tõe n tara b tũudum b sẽn gãd kãn-kãe. Tõe tɩ b pa mi bũmb wʋsg a Zeova Kaset rãmbã zugu, sã n dok ziri nins neb a taabã sẽn togs-bã ye. Sãnda sũy pa noome, b pagã bɩ b sɩdã sẽn dɩkd sẽk ning a sẽn da rɩkd n be ne zakã rãmbã n maand a tũudmã yɛlã. D sã n ning woto d yamẽ, na n sõng-d lame tɩ d tall manesem sẽn yaa sõma ne-ba, n da paoog-ba, la d tõog n sõs ne-b n da yɛɛs ye.—Yel. 16:20-23.
3. Sẽn yɩɩd fãa, bõe n tõe n sõng d tẽed-n-taag pag bɩ a sɩd t’a wa sɩdã pʋgẽ?
3 D bao n bãng-b sõma: Sẽn yɩɩd fãa, yaa tõnd manesmã n tõe n sõng d tẽed-n-taag pag bɩ a sɩd t’a wa sɩdã pʋgẽ, la pa d sẽn na n sõsd ne-a Biiblã zug ye. (1 Pɩɛ. 3:1, 2) Rẽ wɛɛngẽ tara yõod tɩ d bao n bãng-a sõma. Saam-bi-pogsã toeeme n bao n bãng saam-biig pag sẽn pa a Zeova Kaset soab sõma, la saam-biisã me tõe n bao n bãng saam-bi-poak sɩd sẽn pa a Zeova Kaset soaba. Wãn to la b tõe n maan rẽ?
4. Wãn to la d tõe n wilg tɩ d rat n bãnga d tẽed-n-taag pag bɩ a sɩd sõma?
4 Yãmb sã n pa mi y tẽed-n-taagã pagã bɩ a sɩdã, nand tɩ y kẽng n tɩ ges-a, bɩ y reng n sõs ne y tẽed-n-taagã. La y sã n kẽng t’a pa reeg-y sõma bɩ y ra sãam y sũur ye. Tõnd sẽn kẽnd n get-a la d wilgdẽ tɩ d rat n bãng-a lame wã tõe n kɩtame t’a wa tall tagsg sẽn yaa sõma a Zeova Kaset rãmbã zugu. (Rom 12:20) Kiris-neb kẽer boola nin-kãensã buud ne b zak rãmb tɩ b wa rɩ b yiri, sẽn na yɩl n bãng-b sõma, la sẽn na yɩl tɩ b sã n tara tags-kɛg tõnd zug bɩ b remse. D sã n bool zak rãmba, bɩ d sõsd yɛl sẽn noom ned ning sẽn pa a Zeova Kaset soabã zugu, la d ra baood n na n sõs Biiblã zug ne-a tɩlae ye. Kaoosg zugẽ, a soabã yam sã n wa gãande, tõe tɩ d na n tõog n sõsa Biiblã zug ne-a. Tõe me tɩ d sã n bool-a Rĩungã Roogẽ bɩ a sak n wa, sẽn mik t’a zoe n mii neb kẽerã yĩnga. La baa a sã n pa sak n na n zãms Biiblã, y tõe n pẽg-a-la a sẽn maand bũmb nins n sõngd a pagã bɩ a sɩdã yĩnga.
5. Wãn to la kãsem dãmbã tõe n sõng d tẽed-n-taag pag bɩ a sɩda?
5 Sẽn yɩɩd fãa kãsem dãmbã n segd n bao n bãng d tẽed-n-taas pagb bɩ b sɩdb sẽn pa a Zeova Kaset rãmbã, n bao soay n kõ-b kasetã. Nina tõeeme n da pa rat tɩ b sõs ne-a Biiblã zugu, la a sã n wa bẽedẽ, d sã n tik Biiblã zug n na n keng a raoodo, tõe t’a sak n kelge. Zak sã n wa tar zu-loɛɛga, wala ned sã n wa maan kaalem, kãsem dãmbã sã n wa na n bels zakã rãmba, b tõe n boola ned ning sẽn pa a Zeova Kaset soabã t’a wa kelge.
6. Bʋʋm bʋs yĩng n kɩt tɩ d segd n bao n bãng d tẽed-n-taas pagb bɩ b sɩdb sẽn pa a Zeova Kaset rãmbã?
6 Tags-y n ges d tẽed-n-taag sũur sẽn na n yɩ noog to-to, a pag bɩ a sɩd sã n sak n lebg a Zeova Kaset soaba! A Zeova menga, malɛgsã, la tigingã neb fãa me sũur na n yɩɩ noogo. (Luk 15:7, 10) La baa sɩngrẽ wã ned ning sẽn pa tũud a Zeova wã sã n pa sakdẽ d sũur yaa noogo, d sẽn mi tɩ d modgrã tata a Zeova yam, la t’a ‘ka rat tɩ ned ba a ye sãam,’ t’a ratame tɩ nebã ‘fãa yam tek tɩ b kos sugrã.’—2 Pɩɛ. 3:9.
[Goam sẽn tar pãnga, seb-neng a 6]
Sẽn yɩɩd fãa, yaa tõnd manesmã n tõe n sõng d tẽed-n-taag pag bɩ a sɩd t’a wa sɩdã pʋgẽ, la pa d sẽn na n sõsd ne-a Biiblã zug ye