D “wɩng n sak Zusoabã”
1. D segd n moona koɛɛgã wãn-wãna?
1 Tʋʋm nins fãa tõnd sẽn tʋmd a Zeova yĩngã segd n yɩɩ ne yẽesem. B sagenda tõnd tɩ d “wɩng n sak Zusoabã” la d “maan bãmb tʋʋmd ne [d] sũyã fãa.” (Rom 12:11) Yɛl wʋsg n tõe n kɩt tɩ yẽesem ning d sẽn tar koɛɛgã mooneg pʋgẽ wã booge. La bõe la d tõe n maan n tall yẽesem wʋsg koɛɛgã mooneg pʋgẽ?—2 Tɩm. 1:6, 7.
2. D sã n zãmsd Biiblã sõma, wãn to la rẽ tõe n sõng tõnd koɛɛgã mooneg wɛɛngẽ?
2 D zãmsd Biiblã: Ned sẽn moond Rĩungã koɛɛg tɩ womd biis nonga Wẽnnaam Gomdã sẽn yet bũmb ninsã ne a sũur fãa. (Yɩɩl 119:97) D sã n zãmsd Biiblã n bãngd yɛl sẽn tõe n naf-do, noogda d sũur la kɩtdẽ tɩ d yẽesmã paasdẽ. Yaa a Zeova n kɩt tɩ b gʋls bõn-kãensã sẽn tõe n naf-dã. La d sẽn nong-a la d tʋll n moon nebã koe-noogã kɩtame tɩ d pẽgd-a la d sõngd nebã tɩ b bãngd a yʋʋrã. (Heb. 13:15) Vẽenega, d sã n moond koɛɛgã ne yẽesem, d wilgdame tɩ tara yõodo.
3. Wãn to la Wẽnnaam vʋʋsem sõngã tõe n sõng tõnd koɛɛgã mooneg pʋgẽ?
3 D pʋʋs Wẽnnaam n kos vʋʋsem sõngã: D pa tõe n moon koɛɛgã tɩ wom biis ne d meng pãng ye. Yaa Wẽnnaam vʋʋsem sõngã n tõe n sõng tõnd tɩ d tall yẽesem. (1 Pɩɛ. 4:11) D sã n pẽnegd sẽn kõt-a pãngã wakat fãa, d na n sɩd paama pãng n moon koɛɛgã ne raoodo. (Ezai 40:26, 29-31) Tʋm-tʋmd a Poll sẽn seg zu-loees koɛɛgã mooneg pʋgẽ wã, a paama “Wẽnnaam sõngre.” (Tʋʋ. 26:21, 22) Vʋʋsem sõngã sẽn tõe n sõng tõnd tɩ d wɩng ne koɛɛgã moonegã yĩnga, d segd n pʋʋsa a Zeova n kos rẽ.—Luk 11:9-13.
4. D yẽesmã tõe n woma bi-bʋse, la d segd n gũusa ne bõe?
4 Naoor wʋsgo, ned sã n tar yẽesem koe-moonegã wɛɛngẽ, tõe n kɩtame tɩ saam-biis a taabã me rɩk a togs-n-taare. (2 Kor. 9:2) Sẽn yɩɩd fãa d sã n kõt kasetã ne yẽesem la ne raoodo, nebã sakd n kelgd-d lame. La baa d sã n tara yẽesem, d segd n gomda ne sũ-bʋgsem la ne yam. (Tɩt 3:2) D segd n waoogda d kɛlgdbã Wakat fãa n da modgd-b ye.
5. Biiblã sagl-bʋg la d segd n modg n tũ?
5 Tõnd sẽn yaa Wẽnnaam Rĩungã koe-moondbã, bɩ d “wɩng n sak Zusoabã.” Wakat fãa bɩ d zãmsd Biiblã la d pʋʋsd a Zeova sẽn tõe n sõng tõnd ne a vʋʋsem sõngã. D sã n maand woto, ne vʋʋsem sõngã sõngre, d na n paama yẽesem la raood n moon koɛɛgã.—1 Tes. 1:5.