“ Viens, suis-moi ”
1. Kiis nins sẽn watã, wãn to la tigingã Biibl zãmsg na n naf tõndo?
1 Evãnzill dãmb a naasã sẽn gomd a Zezi sẽn vɩɩmd to-to tẽngã zugã sõngda tõnd tɩ d bãng-a sõma n paase. D na n sɩnga “ Viens, suis-moi ” sebrã zãmsg tʋʋlg kiuugã pipi daar semennã tɛka, tigingã Biibl zãmsg sasa. Sẽn mik tɩ kiris-ned fãa segd n tũu a Zezi mak-sõngã, d segd n segenda d mens sõma la d kelgd sõma, d sã n wa zãmsd sebrã. (1 Pɩɛ. 2:21; Mark 10:21) D sã n maag d yĩng n tags a Zezi vɩɩmã sẽn yɩ to-to wã zugu, na n sõng-d-la wʋsg koɛɛgã mooneg pʋgẽ.
2. Wãn to la a Zezi sẽn tõog toogã nafd tõndo?
2 A Zezi mak-sõngã: Yãmb zoe n moona zak-zak tɩ ned tall manesem sẽn pa ta y yam bɩ? Yel-kãngã buud sã n paam tõnd bɩ d tẽeg t’a Zezi yeelame tɩ “bãmb sã n nams maam, b na n namsa yãmb me.” (Zã 15:20) Yaa sɩd tɩ pa ned sẽn na n tall manesem sẽn pa tat tõnd yam fãa la wilgd t’a rat n namsa tõnd ye. Yaa sũ-noog ning sẽn da be a Zezi taoorã n sõng-a t’a tõog namsg la tood buud toor-toorã. Sẽn segd n pak tõnd me n yɩɩd yaa d sẽn modgd n tat a Zeova yamã, la bark nins d sẽn na n wa paam d sẽn sakd-a wã yĩngã. Woto na n sõng-d lame ‘tɩ d ra yɛ, la tɩ d sũyã ra sãam ye.’ (Heb. 12:2, 3; Yel. 27:11) D sã n pẽdgd ne koɛɛgã moonego, d tõe n talla bas-yard t’a Zezi sõngd-d lame.—Mat. 28:20.
3. Wãn to la d tõe n dɩk a Zezi togs-n-taar koɛɛgã mooneg pʋgẽ?
3 “B tʋma maam bõn-kãng yĩnga”: Yaa Rĩungã mooneg n da pak a Zezi n yɩɩda. (Luk 4:43) A moona koɛɛgã ne a sũur fãa, n da get tɩ yaa yõor yelle, t’a baood segb buud fãa n na n gom Wẽnnaam Rĩungã yelle. Tõnd sẽn yaa a Zezi karen-biisã, d sẽn tũud a mak-sõngã segd n kɩtame tɩ d maan bõe? Yaa vẽeneg tɩ wakat fãa d segda neb d sẽn tõe n moon koe-noogã. Dẽnd d sẽn nong nebã wa Kiristã sẽn nong-bã, bɩ d modg n moon koe-noogã wa d sẽn tõe tɛka.—2 Kor. 5:14.
4. Bõe la d tõe n maan n tõog n moon koɛɛgã sõma n paase?
4 “Ned nan ka gom wa ra-kãngã abada”: A Zezi sẽn da zãmsd nebã to-to wã ra lingd-b lame. (Zã 7:46; Mat. 7:28, 29) Bõe n kɩt t’a ra pa wõnd karen-saam-dãmb a taabã? Yaa a sẽn da nong bũmb nins a sẽn zãmsd nebã, n nong neb nins a sẽn zãmsdã, la a tũnugd ne yɛl toɛy-toɛy n zãmsd nebã yĩnga. D sã n dɩkd karem-sãam-kãsengã togs-n-taare, d na n tõog n moona koɛɛgã sõma n paase.—Luk 6:40.
5. D sã n wa zãmsd “ Viens, suis-moi ” sebrã, bõe la d segd n bao n maane?
5 Woto yaa yɛl a wãn bal d sẽn bãng a Zezi zugu. Bõe yɛs la d tõe n bãng a Zezi zugu? Y sã n wa zãmsd a Zezi vɩɩmã sẽn yɩ to-to wã tigingã Biibl zãmsgã sasa, bɩ y modg n dɩk a goamã la a manesmã n “bãng [a] nonglmã.”—Ef. 3:19.