Yãmb tara nif sẽn yaa sõma bɩ?
1. Tall ‘nif sẽn yaa sõma’ rat n yeelame tɩ bõe?
1 Fo ninã sẽn get bũmb ningã tõe n kɩtame tɩ f rat n maan bõn-kãngã. Dẽnd a Zezi sẽn yeel tɩ “fo nif sã n yaa sõma, fo yĩnga tõr na pid ne vẽenemã” sɩd yaa sɩda. (Mat. 6:22) Tõnd ‘nifã sã n yaa sõma’ wala a Zezi sẽn bilg to-to wã, yaa bũmb a yembr n pak tõndo, rat n yeel tɩ Wẽnnaam daabã maanego. D na n lʋɩɩsa Wẽnnaam Rĩungã yɛl taoore, n da bas tɩ bũmb nins sẽn pa tɩlae wã kɩt tɩ d pa moon koɛɛgã ye.
2. Bõe n tõe n toeem tõnd sẽn get yɛlã to-to wã, la bõe n tõe n sõng-d tɩ ra yɩ woto?
2 D fees d mense: Piblisite wã tõe n kɩtame tɩ tõnd sẽn get yɛlã to-to wã toeeme, tɩ d wa baood bũmb nins neb a taabã sẽn tarã. Nand tɩ d maan bũmb sẽn na n dɩk d sẽkã bɩ n da bũmb sẽn na n dɩ d ligd wʋsgo, d segdame n ‘deng n zĩnd n tagse,’ la d sok d meng n gese, woto na n sõnga maam tɩ m tõog n tʋm a Zeova tʋʋmdã sõma bɩ, bɩ na n gɩdg-m lame? (Luk 14:28; Fil. 1:9-11) Yɩta sõma tɩ wakat-wakat bɩ d bao n bãng yɛl nins d sẽn tõe n boogã, sẽn na yɩl n tõog n moon koɛɛgã n paase.—2 Kor. 13:5; Ef. 5:10.
3. Saam-bi-poak sẽn bas yɛl kẽer kɩtame t’a tõog n maan bõe, la rẽ wilgda tõnd bõe?
3 Saam-bi-poak a ye sẽn wa n sɩng wakat fãa so-pakrã, a pa bas a nug-tʋʋmdã ye. A yaool n da miime t’a sã n bao tʋʋm sẽn tʋmd lɛɛr bilf pʋgẽ a tõe n paama ligd sẽn sekd-a. A wa n yeela woto: “Ned ka be sẽn tõe n sak zu-soben-dãmb a yiib ye. Mam da segd n basa yɛl nins sẽn pa tɩlae wã pʋgbo, n bao yɛl nins sẽn yaa tɩlae wã. Mam yãame tɩ tẽed nins mam sẽn nams n baoã wat n kʋdgame bɩ n wa pa le tar yõod ye.” A wa n basa yɛl kẽere, n toeem a tʋʋmdã tɩ kɩt t’a tõog n kell n yɩ wakat fãa so-pakda.
4. Bõe yĩng tɩ yaa masã la d segd n tall nif sẽn yaa sõma n yɩɩd pĩndã?
4 Dũniyã saab sẽn ta n sa wã yĩnga, d segd n talla nif sẽn yaa sõma. Beoog sẽn vẽeg fãa, d kolgda dũniyã saabo, la dũni paalgã sɩngre. (1 Kor. 7:29, 31) D sã n kell n modg ne koɛɛgã moonego, d na n fãaga d mense, la neb nins sẽn kelgd tõndã.—1 Tɩm. 4:16.