Tall-y nif sẽn yaa sõma
1. Tall nif sẽn yaa sõma wã rat n yeelame tɩ bõe, la bõe yĩng tɩ rẽ tar yõodo?
1 A Zezi Tãng zug Zãmsgẽ wã, a wilga nebã tɩ d tẽeb ninã tõe n kɩtame tɩ tõnd vɩɩmã tõr toeem hal sõma. A yeelame: “Fo nif sã n yaa sõama, fo yĩnga tõr na pid ne vẽenem. La fo nif sã n ka sõama, fo yĩnga tõr na n yɩɩ lika.” (Mat. 6:22, 23) Nif sẽn yaa sõma yaa nif sẽn get bõn-datl yɛnga, sẽn yaa Wẽnnaam daabã maanego, la sẽn ka basd tɩ yɩɩr sẽn loog nug laogã wɛɛngẽ tiis-a ye. (Mat. 6:19-21, 24-33) Bõe n tõe n sõng tõnd tɩ d tall nif sẽn yaa sõma?
2. Tags-bʋg laogã wɛɛngẽ la Wẽnnaam Gomdã sagend tõnd tɩ d talle?
2 D kɩt tɩ d sẽn tarã sek-do: Gʋlsg Sõamyã wilgdame tɩ zak soab segd n gesa a zak yell sõma. (1 Tɩm. 5:8) La rẽ pa segd n kɩt tɩ d baood te-sõma nins sẽn nan yi paalmã wakat fãa n ka satẽ ye. (Yel. 27:20; 30:8, 9) Walla tɩ yɩ woto wã, Gʋlsg Sõamyã sagenda tõnd tɩ d kɩt tɩ ‘rɩɩbã la futã’ sẽn yaa bũmb nins sẽn yaa tɩlae ne vɩɩmã sek-do. (1 Tɩm. 6:8; Heb. 13:5, 6) D sã n kelg sagl-kãngã, rẽ na n sõng-d lame tɩ d tik d yamã Rĩungã yɛl zugu.
3. Bõe n tõe n sõng tõnd tɩ d ra zɩlg d mens ne zɩɩb sẽn ka tɩlae?
3 Yɩta yam tʋʋmd tɩ d ra zɩlg d mens ne sam sẽn ka tɩlae la ne teed bɩ tʋʋm sẽn na n dat tɩ d rɩk sẽk wʋsg b yĩng ye. (1 Tɩm. 6:9, 10) Wãn to la d tõe n maan dẽ? Y sã n dat n maan bũmbu, y segd n pʋʋsa a Zeova rẽ zug n mag ne pʋ-peelem n ges bõn-kãng sã n ka na n sãam y tẽebã tʋʋma. Rɩk-y sard sẽn ka vigsd n ket n ningd tẽebã yɛl pipi zĩigẽ y vɩɩmã pʋgẽ.—Fil. 1:10; 4:6, 7.
4. Bõe yĩng tɩ y segd n bao soay n gĩdg y vɩɩmã tɩ yɛlã lebg faag-faag ne-yã?
4 Gĩdg-y y vɩɩmã: Bũmb a to sẽn na n sõng-y tɩ y ra bas tɩ laogã nonglem yamleoog tõog-y yaa y sẽn na n gĩdg y vɩɩmã. Saam-biig a ye sẽn mik t’a zakã neb tõe n vɩɩmdame tɩ pa tũ ne a sẽn na n bao laog n paas yeelame: “Masã, mam tõe n tʋma wʋsg tigingã pʋgẽ n sõng m saam-biisã. M tara hakɩk t’a Zeova barkda a sõgen dãmb nins fãa sẽn lʋɩɩsd baleng hakɩkã yɛl b mensã yɛl taoorã.” Rẽ yĩnga y tõe n gĩdga y vɩɩmã tɩ yɛla lebg faag-faag ne-y tɩ y paam bark sẽn yaa kãsems n yɩɩd bɩ?
5. Bõe yĩng tɩ d segd n modg wakat fãa n tall nif sẽn yaa sõma?
5 D segd n modga wakat fãa n kɩɩs a Sʋɩtãana, a dũniyã sẽn nong laogã, la d mao ne d menga pa-zems-zãng pãn-tusdga. Walla tɩ d tʋll d nin sẽn yã fãa wã, d tik d yamã Wẽnnaam daabã maaneg la vɩɩm sẽn ka sɛtã saagr sẽn tar yõod wʋsgã zugu.—Yel. 4:25; 2 Kor. 4:18.