Daar a ye tigis-kãseng paalga

B naana nif t’a be rasãnde. (Yɩɩl 139:14) La wakat yɛng pʋgẽ, yaa bũmb a ye bal la nif tõe n gese. Sɩd yaa woto ne nif meng-mengã, la yaa woto me ne tẽeb nifã. Sẽn na yɩl tɩ d tẽebã nenem yɩ fasɩ, d segd n lʋɩɩsa Wẽnnaam daabã maaneg taoore. Sẽn mik t’a Sʋɩtãan dũniyã yɛl nins sẽn tiisd nebã sõor tara paasg n debdã, gom-zug ning yʋʋmd 2006 tʋʋmd yʋʋmdã daar a ye tigis-kãseng kãngã sẽn na n wɛgsã sɩd zemsame. Gom-zu-kãng la woto: “Tall-y nif sẽn yaa sõma.”—Mat. 6:22.

Wãn-wãn la d tõe n maan n paam a Zeova barka? (Yel. 10:22) B na n leoka sok-kãngã gom-zug ning sẽn yaa: “Tall-y nif sẽn yaa sõma n paam bark wʋsgã” pʋgẽ. Bool-n-sogsã na n wilga Biiblã noy tũub sẽn tõe n naf-d to-to. Sõsg ning sẽn yaa kaagdã pipi sõsgã a sẽn na n wɛgsã gom-zug yaa: “Tall-y nif sẽn yaa sõma dũni-wẽng pʋgẽ.” Sõs-kãng na n keoog-d-la ne vɩɩmã zu-loees sẽn tõe bilf-bilf n wa kɩt tɩ d pa le bɩt tẽebã pʋgẽ wã. D leb n na n bãnga ‘bõn-neerã yãkr’ sẽn baood tɩ d maan bũmb ninga.—Luk 10:42.

Wãn-wãn la roagdbã la neb a taabã tõe n sõng kom-bɩɩs nins sẽn yaa kiris-nebã tɩ b yãk tẽeb bõn-datɩ? Sõss nins gom-zut sẽn yaa “Roagdb sẽn tãood b pɛɛm n pa yõsgdẽ” la “Kom-bɩɩs sẽn tʋll n pids tẽeb bõn-datɩ” wã pʋsẽ b na n boola roagdb la kom-bɩɩs n sok yel-kãngã sẽn tar yõod wʋsgã zugu. (Yɩɩl 127:4) Kaagdã yaoolem sõsg na n wilga d sẽn tõe n kell n kẽn to-to ne a Zeova d yembr-yembre, ne d zakã rãmba, la ne tigingã neba.

D nan waa sɩdã pʋgẽ paalem tɩ d sɩng n balemda a Zeova sẽn na n maan yʋʋm wʋsg me, tara yõod wʋsg tɩ d ‘tall nif sẽn yaa sõma.’ Yaa rẽ la raar a ye tigis-kãsengã na n sõng-d tɩ d maane.