Daar a ye tigis-kãseng paalga

Tõnd sã n yãame bɩ d wʋma bũmb sẽn keoogd tõnd ne yell sẽn wat n ka maan bũmbu, tõe n wa baasa ne yel-beedo. La tara yõod n yɩɩd meng tɩ d sak sor-wilgr ning a Zeova sẽn kõt tẽebã wɛɛngẽ wã. B na n gom n tadga rẽ zug daar a ye tigis-kãseng ning sẽn watã sasa. A gom-zugã yaa: ‘Gũus-y ne yãmb sẽn kelgd to-to wã.’—Luk 8:18.

Sõasd sẽn yaa kaagdã pipi sõasg pʋgẽ, a na n wilga sagls nins sẽn be a Poll lɛtr ning Wẽnnaam sẽn vẽneg-a t’a gʋls Hebre rãmbã pipi sagsẽ wã sẽn pak tõnd to-to rũndã-rũndã. A yaoolem sõasg ning gom-zug sẽn yaa “Kelg-y la y tũ Wẽnnaam zãmsgã wakat fãa” wã pʋgẽ, a na n sõnga tõnd tɩ d fees d mens n ges d sã n sɩd kelgda a Zeova, a Biriblã, la ‘tʋm-tʋmd sẽn tũud sɩd la sẽn tar yamã.’—Mat. 24:45.

Sõss kẽer la b na n kõ tɩ naf zagsã neb n yɩɩda. Sõasg ning gom-zug sẽn yaa “Zags neb sẽn kelgd Wẽnnaam Gomdã n ka basd tɩ bũmb tiis-bã” na n sõng-d lame tɩ d ra bas tɩ dũniyã yɛl kɩt tɩ d tẽebã bɩʋʋng maag ye. Sõs-kãng pʋgẽ, b na n boola neb sẽn maan toeeng sẽn na yɩl n tõog n ning tẽebã yɛl pipi zĩigẽ n soke. Sõasg ning gom-zug sẽn yaa “Wẽnnaam Gomdã kelgr neerã kengda tõnd kom-bɩɩsã tẽebã” pʋgẽ, b na n boola kom-bɩɩs n sok tɩ b togs b sẽn teel sɩdã to-to karengã zĩigẽ, b taabã sʋka, la koe-moonegã wakate. Sõasg ning gom-zug sẽn yaa “Kom-bõoneg sẽn kelgd Wẽnnaam n paamd zãmsgã” na n sõnga tõnd tɩ d ra wa tags tɩ kambã ka tõe n zãms yɛl wʋsg ye. Kom-bõoneg ne b roagdb la b na n bool n soke, tɩ rẽ na n sõng tõnd tɩ d bãng tɩ roagdbã sã n sɩng kambã zãmsg a Zeova soayã pʋgẽ b peelem wakate, wata ne nafa.

A Sʋɩtãan “sẽn belgd dũniyã fãa” wã sasa, a Zeova wilgda a sõgen dãmbã sor ning b sẽn segd n tũ wã. (Wil. 12:9; Ezai 30:21) Tõnd sã n kelgd a Zeova saglsã neer la d tũud-b d vɩɩmã pʋgẽ, rẽ na n kɩtame tɩ d tall yam, sũ-noogo, la tɩ d wa paam vɩɩm sẽn ka sɛtã.—Yel. 8:32-35.