Pʋʋsgã ne bʋgsgã yaa tɩlae sẽn na yɩl n tall yẽesem koɛɛgã mooneg pʋgẽ
1. Bõe n sõng a Zezi t’a pa bas tɩ bũmb tiis-a t’a pa moon koɛɛgã?
1 A Zezi da rɩka yʋngã tõr n maag nebã bãas la a rig zĩn-dãmba. La a karen-biisã sẽn yã-a vẽkembeoogã, b yeel-a-la woto: “Nebã fãa baooda yãmba.” B ra ratame t’a kell n tʋm a tʋʋm-kãsemsã. La a Zezi pa bas tɩ bũmb tiis-a t’a pa tʋm tʋʋmd ning yĩng a sẽn wa dũniyã zugã sẽn yaa koe-noogã moonegã ye. A yeela a karen-biisã woto: “Wa-y tɩ d kẽng tẽn-kɩrems tɩ m tɩ moon koɛɛg beenẽ me. Yaa rẽ yĩng la mam wa-yã.” Bõe n sõng a Zezi t’a pa bas tɩ bũmb tiis-a? A ra sãda yibeoog pĩnd n tɩ pʋʋs la a bʋgse. (Mark 1:32-39) Wãn to la pʋʋsgã la bʋgsgã tõe n sõng tõnd me tɩ d tall yẽesem koɛɛgã mooneg pʋgẽ?
2. Bõe zug la d tõe n bʋgs tɩ sõng-d tɩ d kell n tall yẽesem koɛɛgã mooneg pʋgẽ?
2 Bõe zug la d tõe n bʋgsdẽ? A Zezi yãame tɩ nebã “sũyã sãama wʋsgo, la bãmb pãngã fãa sɛɛme. Bãmb yaa wa piis sẽn ka tar kɩɩm ye.” (Mat. 9:36) Tõnd me tõe n tags n gesa koe-noogã sẽn tõe n sõng nebã to-to wã. D tõe n tagsda dũniyã saab sẽn kolgã yelle. (1 Kor. 7:29) D tõe n tagsda a Zeova sẽn sɩd yaa a soabã la a tʋʋm-kãsemsã zugu, la tõnd sẽn paam n yaa a Zeova Kaset rãmbã zugu. D tõeeme me n tags bũmb nins tõnd sẽn bãng Wẽnnaam Gomdã pʋgẽ tɩ neb a taabã pa miẽ wã yelle.—Yɩɩl 77:12-14; Ezai 43:10-12; Mat. 13:52.
3. Wakat bʋg la d tõe n bʋgse?
3 Wakat bʋg la d tõe n bʋgse? Wala a Zezi sẽn maanã, neb kẽer yikda yibeoog pĩnda, zĩigã sẽn ket n yaa sɩɩ wã sasa n bʋgsdẽ. Sãnda maanda rẽ zaabre, nand tɩ b kẽ gãaga. (Sɩng. 24:63, NW ) Baa d sã n tara tʋʋm wʋsgo, d segd n yãka wakat n bʋgsdẽ. Kẽer maanda woto b sã n wa be mobill pʋgẽ n tʋgd sore. Neb kẽer me rɩkda sẽk bilf midi vʋʋsgã sasa n bʋgsdẽ. Neb wʋsg yãame tɩ b sã n dɩk baa yaa minit a wãn bal n bʋgs n yaool n yi koɛɛgã moonego, sõngd-b lame tɩ b tõogd n moond ne yẽesem la ne raoodo.
4. Bõe yĩng tɩ d segd n bʋgsdẽ?
4 D sã n pʋʋsdẽ la d bʋgsdẽ, na n kɩtame tɩ d rat n maan a Zeova raabã n paase, na n sõng-d lame tɩ d lʋɩɩsd Wẽnnaam tʋʋmdã taoor wakat fãa, la kɩt tɩ d kell n moon koɛɛgã ne d sũur fãa. Bʋgsgã nafa Wẽnnaam koe-moond kãseng a Zezi, la na n nafa tõnd me woto.