Na n yɩɩ kaset kãseng daare!
1. Sõsgã sẽn yãk a toogo, bõe me n tõe n yɩ sãambã noogo?
1 Bõe n na n yɩ kaset kãsenga? A Zezi kũumã tẽegrã. Yaa rẽ yĩng la d sẽn wɩsgd d mens n boond nebã tɩ b wa naag-d n maan-a wã. Sãambã sũy na n yɩɩ noogo. Pa b sẽn na n wʋm bũmb nins sõsgã pʋgẽ wã bal yĩng ye. La yaa b sẽn na n yã bũmb ninsã me yĩnga. Wala makre, pag a ye sẽn wa a Zezi kũumã tẽegr yeelame t’a sũur yɩɩ noog ne a sẽn yã bũmb ninsã, rat n yeel tɩ nebã sẽn deeg-a to-to wã, Rĩungã roog sẽn yaa neer to-to wã, la zĩigã sẽn yaa yɩlemd to-to wã. Dẽnd sõsdã sẽn yãk a toogo, d fãa tara d sẽn tõe n maaneg n kɩt tɩ tẽegrã yɩ kaset kãsenga.—Ef. 4:16.
2. Bõe la ned kam fãa tõe n maan tɩ Tẽegrã yɩ kaset kãsenga?
2 Reeg-y sãambã sõma: D sã n pʋʋs sãambã sõma-sõma la d sõs ne-b bilfu, na n yɩɩ kaset tɩ tõnd nonga taaba. (Zã 13:35) Baa y pa tõe n sõs ne b fãa, y tõe n modg n pʋʋsa sẽn na n zĩnd-b n yɛgl yãmbã sõma, la y togs-b y yʋʋre. (Heb. 13:1, 2) Gũus-y n ges-y sãamb nins sẽn wõnd b pa mi ned baa a ye wã. Tõe tɩ b paama boollã sebr bal n sak n wa. Y tõe n sok-b-la woto: “Yaa yãmb pipi waoong la woto bɩ?” Yeel-y-b tɩ b tõe n wa zĩnda ne yãmba, la tɩ sõsgã poore, sẽn yaa sokr ning fãa la b tara, y na n leokame. Yãmb tigingã neb sã n segd n looga tao-tao tɩ tiging a to rãmb sɩnge, y tõe n yeel-b lame tɩ: “M nongẽ lame n bãng yãmb tagsg sẽn yaa to-to ne sõsgã y sẽn kelgã. Yɛ la m tõe n paam yãmb nindaar tɩ d sõse?”
3. Wãn to la d segd n deeg neb nins sẽn maag tũudmã yɛl pʋgẽ wã?
3 Reeg-y neb nins sẽn maag tũudmã yɛl pʋgẽ wã me sõma: Yaa vẽeneg tɩ koe-moondb sẽn maag tũudmã yɛl pʋgẽ na n waame. Tõe tɩ kẽer basa tigissã waoongo, n wat a Zezi kũumã tẽegr bala. Reeg-y nin-kãensã fãa sõma, la y kɩt tɩ b bãng tɩ y sũur nooma wʋsg y sẽn yã-bã. (Rom 15:7) Tẽegrã loogr poor bilfu, kãsem dãmbã segd n pɩʋʋga b nengẽ, n keng b raood tɩ b le sɩng tigissã waoongo. D sẽn datã yaa tɩ neb wʋsg sẽn na n wa a Zezi kũumã tẽegrã pẽg Wẽnnaam, b sẽn na n wʋm bũmb ninsã yĩnga, la b sẽn na n yã tõnd yel-manesem sõma wã me yĩnga.—1 Pɩɛ. 2:12.