D pʋʋs a Zeova barka, a nonglmã yĩnga
D na n maana Kirist kũumã Tẽegr tʋʋlg kiuugã rasem 24
1. Wãn to la a Zeova wilg tõnd a nonglem?
1 Yɩɩl-gʋlsdã ra yeela woto: “Bɩ bãmb pʋʋs Zusoaba bark b nonglma yĩnga ne bãmb tʋʋm kãsems nins bãmb sẽn maan ninsaalba yĩngã.” (Yɩɩl 107:8) Wẽnnaam nonglmã ne ãdem-biisã pa tek b nimbãaneg sẽn tar-a wã bal ye. Rẽ yaa vẽeneg pẽgr goam nins sẽn pʋgdã a sẽn vẽneg tɩ b gʋlsã pʋgẽ: “Yãmb nonglmã sẽn ka tekda kogenda maam.” (Yɩɩl 94:18) Ad nonglem ning a Zeova sẽn wilg n dɩk a Biribl-yendã n kõ tõnd yĩngã sɩd ka mak-n-taar ye!—1 Zã 4:9, 10.
2. Ne manesem bʋg me la d tõe n wilg a Zeova d mi-beoogã?
2 A Zezi kũumã Tẽegr sẽn kolgã, wãn to la d tõe n pʋʋs ‘Wẽnnaam sẽn wilgd tõnd a nonglmã’ barka? (Yɩɩl 59:18) Tõnd ned kam fãa segd n dɩka sẽk n bʋgs ray nins a Zezi sẽn zĩnd tẽng zug nand tɩ b kʋ-a wã zugu. (Yɩɩl 143:5) Biiblã kareng na-kẽndr ning b sẽn sigl Tẽegrã yĩng wala zĩis nins b sẽn wilg D vaees Gʋlsg Sõamyã daar fãa 2005 rẽndã pʋgẽ wã tũub me na n naf-d lame, la sã n tõe bɩ y karem la y vaees Nin-kãseng sẽn ka to sebrã sak 112-16 la sɛb a taab me sẽn tik Biiblã zugu. Bʋgs-y babs nins y sẽn karmã zut tɩ kẽ y sũur sõma. (1 Tɩm. 4:15) Wẽnnaam Gomdã kareng sẽn naag ne pʋʋsg pa rɩlgd d sũurã bal ye, a leb n wilgda d nonglem ne a Zeova.—Mat. 22:37.
3, 4. a) Wãn-wãn la d tõe n dɩk Liberia saam-biisã togs-n-taare? b) Ãnd dãmb la yãmb magd n na n bool Tẽegrẽ wã?
3 Sõng-y neb a taabã tɩ b wilg Wẽnnaam b mi-beoogo: Rɩẽ, dũniyã gill zugu, yɩɩ neb 16 760 607 n wa Tẽegrẽ wã. Yʋʋm a wãn sẽn looge, Liberia tẽn-bil a ye pʋgẽ, saam-biisã gʋlsa meer ning sẽn so bãmb tẽn-bilã lɛtr n wilg-a tɩ bãmb rat n maana Soaalã kũum Tẽegrã a tẽngẽ wã. Meerã kõo saam-biisã sor tɩ b tõe n tɩ tigma taab tẽngã ball tãoog zĩigẽ, la a kɩt tɩ b moon a soolmã pʋgẽ n bool nebã tɩ b wa Tẽegrẽ wã. Baa sẽn yaa koe-moondb a nu bal n da be tẽngẽ wã, yɩɩ neb 636 n wa Tẽegrã.
4 Wala woto, tõnd me rat n sõnga neb wʋsg wa d sẽn tõe tɛk tɩ b wa naag-d n maan Tẽegrã. Gʋls-y neb nins fãa y sẽn dat n tɩ boolã yʋya. Tʋʋlg kiuug rasem a 8 daar Réveillez-vous ! wã la a rasem 15 raar Gũusg Gasgã poorẽ, b boonda nebã tɩ b wa Tẽegrẽ wã. D tõe n talla Tẽegrã boolg sɛb me n bool-ba. Gʋls-y Tẽegrã zĩig la a lɛɛr boolgã sɛb zut n kõ nebã. Tʋʋlg kiuug rasem 24 daarã sã n wa kolgdẽ bɩ y tɩ tẽeg-b fãa tɩ b bãng b sẽn na n segl b mens to-to n wa.
5. Wãn to la d tõe n sõng neb nins d sẽn zãmsd Biiblã tɩ b wa Tẽegrẽ wã?
5 Wãn to la d tõe n sõng neb nins sẽn zãmsd Biiblã n yaool n nan pa wat tigissã tɩ b rɩ Tẽegrã nafa tɩ pidi? Biiblã zãmsg sasa fãa bɩ y rɩk minit a wãn bal n sõng-b tɩ b bãng Tẽegrã yõodo. Y tõe n yãa gom-zug sẽn yaa sõma wʋsg rẽ wɛɛngẽ, yʋʋmd 2004, tʋʋlg kiuug rasem 15 Gũusg Gasgã seb-neng a 3-7 la Comment raisonner wã seb-neb 241-45 pʋgẽ.
6. Bõe yĩng tɩ tar yõod tɩ d reeg sãambã Tẽegrẽ wã?
6 D reeg sãambã: Reeg-y neb nins sẽn wa Tẽegrẽ wã sãando, la y sõs ne-ba. (Rom. 12:13) Modg-y n zĩnd-y ne neb nins y sẽn boolã la y ges tɩ b paam Biiblã la yɩɩl sebre. D leb n na n pʋʋsa saam-biis nins fãa sẽn da pa ye wat tigissã sẽn modg n wa wã sõma. D sã n wilg-b tɩ d nong-b lame, tõe n sõng-b lame tɩ b ye wa naag tigingã neba. (Luk 15:3-7) Bɩ d maan d sẽn tõe tɛk fãa segb kãngã sẽn yaa kãseng n yɩɩd a taabã fãa d balengã pʋgẽ wã sasa, n bool neb a taabã tɩ b wa naag-d n pʋʋs a Zeova barka, a ‘nonglem tʋʋm kãsemsã’ yĩnga.—Yɩɩl. 31:22.