“Yãmb sẽn yaa [a Zeova] neba, bɩ y nong bãmba”
D segd n maana a Zezi kũumã Tẽegr tʋʋl-nif kiuug rasem a 4
1 Yʋʋm sẽn loog pʋgẽ, kominist rãmbã sẽn da wa n dɩt naam Ukrɛnnã, pãn-soaadbã ra gũusda saam-biisã neere, bala b ra rat n bãnga b sẽn tigisd taab zĩig ninga. Kiristã kũumã Tẽegr daar sã n da kolgdẽ la b gũusd-b n yɩɩda. Pãn-soaadbã sẽn da mi Tẽegrã maaneg wakatã yĩng kɩtame tɩ ra yaa yell meng n kõ saam-biisã. Bõe la saam-biisã ra tõe n maane? Saam-bi-poak a yembr roog n da kẽ koom. Pãn-soaadbã ra ka tẽed tɩ neb na tõog n tigim taab ro-kãng pʋgẽ ye. Rẽ n so tɩ saam-biisã tilg ra-pɛgd sẽn yalem koomã sẽn da tat rũma zugu. Baa ne b sẽn da segd n zĩnd ra-pɛgdã zug la b vãbend bilf roogã sugr yĩngã, tigingã neb tõog n maana Tẽegrã ne sũ-noog tɩ pãn-soaadbã ka yã-b ye.
2 Ukrɛn saam-biisã sẽn da rɩk sard sẽn ka vigsd tɩ b na n saka a Zezi noorã n maan Tẽegrã sɩd wilgame tɩ b nonga Wẽnnaam wʋsgo. (Luk 22:19; 1 Zã 5:3) Tõnd sã n wa segd zu-loees d vɩɩmã pʋgẽ, mak-sõma a woto tõe n kenga tõnd raood n kɩt tɩ d rɩk sard sẽn ka vigsd n zĩnd a Zezi kũumã Tẽegrẽ tʋʋl-nif kiuugã rasem a 4. Woto, d wilgdame tɩ d tagsda wa yɩɩl-gʋlsdã sẽn da yɩɩl tɩ: “Yãmb sẽn yaa Zusoaba neba, bɩ y nong bãmba”—Yɩɩl 31:24.
3 Sõng-y neb a taabã tɩ b nonglmã ne Wẽnnaamã paase: Tõnd sẽn nong Wẽnnaamã leb n kɩtame tɩ d rat n bool nebã tɩ b wa naag tõnd n maan Tẽegrã. Wao-fugdg kiuugã Rĩungã Tʋʋmd seb-paasdem sagla tõnd ned kam fãa t’a gʋls a sẽn dat n bool neb nins fãa tɩ b wa Tẽegrã yʋya. Rẽ yĩnga rẽ poore y modgda neer n tʋgd n boond neb nins fãa yʋy y sẽn da gʋlsã bɩ? Rɩk-y sẽk n wilg nin-kãens Tẽegrã võore. Tẽeg-y-b Tẽegrã raar la a wakate, la sã n yaa tɩlae, tõeeme tɩ y sã n kãab-b tɩ y na n yãag-b lame, bɩ rẽ keng b raood tɩ b wa.
4 Tẽegrẽ wã bɩ y maan modgr sõma n pʋʋs neb nins sẽn sak tõnd boollã, n kɩt tɩ b sũy yɩ noog ne b waoongã. Wãn to la y tõe n sõng-b tɩ b nonglmã ne a Zeova paase? Sak-y n leok sogsgã. Sã n zemsame bɩ y modg n kãab a soabã Biibl zãmsgo. Bool-y-b tɩ b wa tõnd tigingã semen fãa tigissẽ. Sẽn yɩɩd fãa kãsem dãmbã na n modgame n ges kiris-neb nins sẽn ka leb n moondã sẽn wa Tẽegrã yelle. Kãsem dãmbã tõe n zemsa ne-ba, n yãk wakat sẽn na yɩl n tɩ ges-ba, sẽn paase b tõeeme n tik Tẽegrã sõasg zug n sagl-b tɩ b lebs n sɩng b kiris-ned tʋʋmã ne tigingã.—Rom 5:6-8.
5 D paas tõnd mengã nonglem ne a Zeova: D sã n tags rondã b sẽn kõ wã zugu, rẽ tõe n paasa tõnd nonglmã ne a Zeova la ne a biriblã. (2 Kor. 5:14, 15) Saam-bi-poak sẽn da sɩng n wat Tẽegrã hal sẽn kaoos yeela woto: “Tõnd gẽegda Tẽegrã. Yʋʋmd fãa, Tẽegrã tara yõod n yɩɩd ne tõndo. Mam tẽrame tɩ yʋʋm 20 sẽn looge, m da yasa kũumã roogẽ n get m ba wã sẽn ki n gãe wã, hal tɩ rẽ kɩt tɩ rondã tall yõod ne maam n paase, la kɩt tɩ m tall mi-beoog wʋsg rondã yĩnga. Sẽn deng rẽ, m da geta Kirist maoongã sẽn yaa rondã wala tẽeb zãmsg sẽn yaa zug bãngr bala. Yaa sɩd tɩ m da mii verse nins fãa sẽn gomd rondã yellã, la m sẽn da tõe n wilg b võor to-to! La yaa mam mengã sẽn wa n bãng kũum sẽn wat ne sũ-sãang ningã bala la rondã sẽn tar yõod wʋsgã sẽn na n pids bũmb ning tõnd yĩngã kõ maam sũ-noogo.”—Zã 5:28, 29.
6 Rɩk-y sẽk n segl y sũurã rõandã Tẽegrã sẽn kolgdã yĩnga. (2 Kɩb. 19:3) Verse rãmb la b yãk tɩ d karem Tẽegrã yĩnga, tɩ be D vaees Gʋlsg Sõamyã daar fãa—2004 la Calendrier 2004 pʋsẽ. Bʋgs-y verse kãens zutu. Zags kẽer neb lebgd n zãmsda Nin-kãseng sẽn ka to sebrã sags 112-6 b zak pʋgẽ zãmsgã wakate. Neb a taab zãmsda sɛb a taab tʋm-tʋmd sẽn tũud sɩd la sẽn tar yamã sẽn yiisã n paase. (Mat. 24:45-47) Tõnd fãa tõe n goma rondã b sẽn kõ d yĩnga yell pʋʋsg pʋgẽ. (Yɩɩl 50:14, 23) N-ye, rõandã Tẽegrã wakat bɩ d ket n tagsd nonglem ning a Zeova sẽn tar ne-dã zugu, la d bao soay n wilg tɩ tõnd me nong-a lame.—Mark 12:30; 1 Zã 4:10.