Toeemd-y y sõsgã tɩʋʋsg tɩ zemsd ne nebã

1. Pipi kiris-nebã sẽn da toeemd b sõsgã tɩʋʋsgã kõta tõnd yam-bʋgo?

¹ Pipi kiris-nebã moona koɛɛgã neb sẽn yaa buud toor-toore, n da be tũudum toɛy-toɛy pʋgẽ. (Kol. 1:23) Yaa Wẽnnaam Rĩungã koɛɛg la b ra taasd zĩig fãa, la b ra toeemda b sẽn tɩʋʋsd b sõsgã to-to wã tɩ zemsd ne b kɛlgdbã. Makre, a Pɩɛɛr sẽn wa n na n sõs ne zʋɩf rãmbã, a sẽn da mi tɩ b nanda Gʋlsg sõamyã yĩnga, a sɩnga ne gomd no-rɛɛs a Zoɛll sẽn da togse. (Tʋʋ. 2:14-17) D sã n karem Tʋʋm 17:22-31 wã, d yãta a Poll me sẽn tɩʋʋs a sõsg ne gɛrk neb to-to. Rũndã-rũndã, zĩis kẽere, nebã nanda Gʋlsg sõamyã, tɩ d sã n wa moond zak-zak bɩ d tõe n tall Biiblã n sõs ne-b tɩ yell kae ye. La wakat ninga, d sã n na n sõs ne neb sẽn pa nand Biiblã bɩ tũudum buud fãa, wall sẽn pa be kiris-neb tũudum pʋgẽ, rẽnda d maan gũusg wʋsgo.

2. Wãn to la d tõe n tall sɛb nins d sẽn na n kãabã n sõng sẽn nong-b Biiblã, la sẽn pa nong-bã me?

² D tʋm ne sɛb nins d sẽn na n kãabã sõma: Bõn-bɩʋʋng kiuugã tɛka, na n lebga kiis a yiib fãa la b na n toeemd sɛb toor-toorã d sẽn tog n kãab nebã, la noor wʋsgo, na n yɩɩ periodik rãmbã, seb-vãadã la brochure dãmbã. Baa tõnd moonegã zĩigẽ neb sã n pa nong Biiblã, d na n yãa sõs seb-kãensã pʋgẽ sẽn na n yɩ-b noogo. Baa d pa karem vɛrse d pipi sõsgã sasa, bɩ d pʋd n pa gom Biiblã yelle, a soabã sã n wilg t’a rat n bãng n paasame, d tõe n lebg n kẽngame n tɩ sõng-a t’a bao n bãng Naandã n paase, la a tẽ Biiblã sẽn yaa a Gomdã. Sã n mik tɩ d moonegã zĩig neb nonga Biiblã, d tõe n wilga sɛb sẽn gomd Biiblã yelle, la d tɩʋʋsd d sõsgã tɩ zemsd ne bãmb me. La d tõe n kãaba Biiblã yetame sebrã bɩ Kelg-y Wẽnnaam wall Kelg-y Wẽnnaam n paam n vɩɩmd wakat sẽn kõn sa sɛbã, baa tɩ pa seb-kãens la d wilgd kiuugã pʋgẽ. Sẽn tar yõod n yɩɩdã yaa d we n bãng n tɩʋʋs sõsgã tɩ tall yamleoog ne ned fãa.

3. Bõe yĩng tɩ d tõe n mak ninsaal sũur ne zĩig b sẽn dat n bʋd bũmbu?

³ Reng-y n maneg-y zĩigã: D tõe n maka ninsaal sũurã ne zĩig b sẽn dat n bʋd bũmbu. (Luk 8:15) La yɩl n bʋd bũmb zĩis kẽer tɩ wom biisi, yaa tɩlae tɩ b reng n maneg zĩigã. Woto me, neb n be tɩ yɩl tɩ Biiblã goamã tõog n kẽ b sũurẽ n wom biisi, yaa tɩlae tɩ b sũurã reng n paam manegre. Pipi kiris-nebã wakatẽ, koe-moondbã tõogame n bʋd Wẽnnaam goamã neb buud toor-toor sũyẽ, hal tɩ rẽ kõ-b sũ-noog wʋsgo. (Tʋʋ. 13:48, 52) Tõnd me na n tõog n maana woto, d sã n gũusd n tɩʋʋsd d sõsgã tɩ zemsd ne ned fãa.