D rɩk no-rɛɛsdbã togs-n-taare: A Zonas
1. Zʋg-sõma bʋs la a Zonas tall-yã?
1 B sã n gomd no-rɛɛs a Zonas yelle, bõe n wat y yamẽ? Kẽer tõe n tagsdame t’a yɩɩ rabɛɛm bɩ nin-toaaga. La sɩd-sɩda, a yɩɩ sik-m-meng soaba, a talla raoodo, a tʋma a taabã neer yĩng me. Wãn to la d tõe n dɩk a togs-n-taare?—Zak 5:10.
2. Wãn to la d tõe n dɩk a Zonas togs-n-taar sik-m-mengã wɛɛngẽ?
2 A yɩɩ sik-m-meng soaba: Wẽnnaam sẽn tʋm a Zonasã, a zoeeme, n pa kẽng a sẽn da segd n kẽngẽ wã ye. Asiiri nebã ra yaa nin-toose, tɩ b ra boond Niniiv tɩ “nin-kʋʋdb” tẽnga. Dẽnd a Zonas zoeesã pa lingr ne-d ye. (Nah. 3:1-3) A Zeova sẽn kibl a Zonas n lebs n tʋm-a wã, a sika a meng n sak n kẽnge. (Yel. 24:32; Zon. 3:1-3) Baa ne a sẽn da tõdg n zoe n kẽng zĩig a to sɩngrẽ wã, so-kãnga a maana a Zeova raabo. (Mat. 21:28-31) Tõnd me sã n wa paam kiblgu, wall d sã n segd zu-loees d moonegã zĩigẽ, bɩ d da bas koe-noogã mooneg ye.
3. Zĩ-bʋs wɛɛngẽ la raood ne maan-neer yaa tɩlae?
3 A talla raoodo, a tʋma a taabã neer yĩnga: A Zonas sẽn wa n mik t’a kɩɩsgã na n tũu ne koom-koglgã rãmb yõorã, a sakame n na n ki tɩ b paam n põse. (Zon. 1:3, 4, 12) Kaoosg zugẽ, a sẽn wa n kẽng Niniivã, a gilga tẽngã tõre. Tõe t’a ra baooda zĩig a sẽn tõe n yals n taas nebã a Zeova bʋ-kaoorã koeese. Woto wilgdame t’a ra tara raoodo, a pa rabɛɛm ye. (Zon. 3:3, 4) La tõnd yẽ? B sã n wa namsd tõnd koɛɛgã mooneg yĩnga, yaa tɩlae tɩ d paam tɩ Wẽnnaam kõ-d raoodo. (Tʋʋ. 4:29, 31) Yɩl n tõog me n tʋm nebã nafr yĩng koe-moonegã pʋgẽ, rẽnd d sak n dɩk d sẽkã la d tõog toor-toorã n sõng-ba.—Tʋʋ. 20:24.
4. Bõe yĩng tɩ d segd n maag d yĩng n tags a Zeova no-rɛɛsdbã mak-sõngã yelle?
4 Wakat fãa y sã n wa karemd kibar Biiblã pʋgẽ sẽn gomd a Zeova no-rɛɛs yelle, n mams tɩ yaa wa yãmb la no-rɛɛsã, na n naf-y lame. Bɩ y sok y meng woto: ‘M manesem ra na n yɩɩ wãna? Wãn to la m tõe n dɩk a togs-n-taare?’ (Heb. 6:11, 12) Kiis nins sẽn watã, Rĩungã Tʋʋmd na n goma a Zeova no-rɛɛsdb a taab yelle, la d sẽn tõe n dɩk b togs-n-taar to-to.