Y sẽn tõe n maan to-to n sõng y kambã tɩ b bãng Wẽnnaam sõma
1. Tʋʋm-bʋg la Wẽnnaam kõ roagdbã?
1 Biiblã kõta roagdbã saglse, sẽn sõngd-b tɩ b bãng b sẽn na n zãms b kãmbã bũmb ninsi. La pa rẽ bal ye. A leb n sõngd-b lame tɩ b bãng b sẽn na n maan to-to n zãms b kambã tɩ yãk nenga. Daar ne a to fãa, segdame tɩ roagdbã bao b sẽn na n maanega, n gom Wẽnnaam yell ne b kambã. (Tõo. 6:6, 7) D na n yãa sagls a wãn Biiblã sẽn kõte, sẽn sõng roagdb wʋsg tɩ b tõog n zãms b kambã tɩ b bãng Wẽnnaam.
2. Wãn to la roagdbã tõe n tik Wẽnnaam sẽn naanã n zãms b kambã?
2 Tik-y Wẽnnaam sẽn naanã n zãms-ba: Roagdbã sã n wilgd b kambã Wẽnnaam sẽn naan bũmb ninsã, la b sõng-b tɩ b bãng bõn-kãens sẽn wilgd bũmb ning Wẽnnaam zugu, tõe n sõnga b kambã hal sõma tɩ b bãng tɩ Wẽnnaam sɩd beeme. (Rom 1:20) Ad roagdbã sẽn tõe n maane: 1) Sok-y y kambã tɩ b togs yãmb rũms nins la tɩɩs nins b sẽn nonge. 2) Yãmb mengã bao n bãng rũm-kãens la tɩ-kãens sõma n paase. 3) Tags-y n ges-y bõn-kãensã sẽn wilgd bũmb ning Wẽnnaam zugã.
3. Kambã zãmsg wɛɛngẽ, wãn to la roagdbã tõe n dɩk a Zezi togs-n-taare?
3 Rɩk-y-yã a Zezi togs-n-taar zãmsgã wɛɛngẽ: A Zezi sã n da zãmsd nebã, a ra nong n sokd-b-la sogsgo. A ra rata ne a sũur fãa n bãng a kɛldgbã sẽn tagsde. (Mat. 17:24, 25; Mark 8:27-29) Sẽn na yɩl tɩ zãmsgã yãk nenga, roagdbã tog n dɩka a Zezi togs-n-taare, n sõng b kambã tɩ b sakd n togsd b sẽn tagsde. La y sã n wa yã tɩ y kambã tara manesem sẽn pa zemse, wall zãmsg ning la b pa reegd tao-tao? Ges-y a Zezi sẽn maan to-to ne a karen-biisã. A karen-biisã ra nong n wẽeda no-koɛɛma. Sẽn paase, a Zezi wilg-b-la sik-m-mengã yõodo, la b pa reeg tao-tao ye. Baasgo, a Zezi kell n talla sũ-mar ne-ba, n wilg-b sik-m-mengã yõod n yɩlme. (Mark 9:33, 34; Luk 9:46-48; 22:24, 25) Roagdb nins sẽn dɩkd a Zezi togs-n-taarã sagenda b kambã ne sũ-mare, tɩ sã n yaa tɩlae, bɩ b zãms-b bõn-yɛngã n yɩlme, hal tɩ b wa bãng a yõodo.
4. Roagdbã sã n kõt mak-sõngo, wãn to la tõe n sõng b kambã?
4 Kõ-y y kambã mak-sõngo: Kambã geta b roagdbã sẽn maandã n yɩɩd b sẽn yetã. Sɩd me, roagdbã sã n tũud bũmb nins bãmb mengã sẽn yetã, naoor wʋsgo b kambã yɩta kamb sẽn sakd b sẽn zãmsd-bã.—Rom 2:21.
5. Yɛ la roagdbã tõe n paam sõngr n tõog n zãms b kambã?
5 Y sẽn tõe n paam sõngr zĩig ninga: Siglgã yiisda sɛb buud toor-toore, sẽn na yɩl n sõng roagdbã tɩ b tõog n zãms b kambã tɩ b bãng Wẽnnaam sõma. Sɛb kẽer yaa kom-bõonegã yĩnga. Kẽer me yaa sẽn na n sõng roagdbã la b kamb nins sẽn be b bɩʋʋng zugã, tɩ b tõog n ket n sõsd ne taaba. Sẽn tar-b ẽntɛrnetã tõe n kẽe www.jw.org n paam sagls a taab roagdbã la kambã yĩnga.