Yʋʋm koabg la woto d sẽn moond Rĩungã koɛɛgã!
1. Sẽn kolg yʋʋm koabga, bõe la b sagl a Zeova nin-buiidã tɩ b modg n maane?
1 Sẽn kolg yʋʋm koabga, saam-biig a Rutherford sõsg a ye pʋgẽ, a yeela kɛlgdbã: “Rĩmã rɩta naam masã! Yãmb yaa a koe-taasdba. Woto yĩnga, moon-y-yã, moon-y-yã, moon-y Rĩmã la a Rĩungã.” A yeela woto n na n keng a Zeova nin-buiidã raood tɩ b moon Rĩungã koɛɛg tɩ ta zĩ-zãrsẽ, la b sɩd maana woto! Wa pipi kiris-nebã, d moona Rĩungã koe-noogã tɩ ta “dũniyã fãa.” (Kol. 1:23) Bõe la d tõog n maan yʋʋm koabgã sẽn loogã? La bõe la d tõe n maan n ket n moond Rĩungã koɛɛga?
2. Bõe yĩng tɩ d tõe n yeel tɩ tõnd sɛbã gomda Wẽnnaam Rĩungã yell n yɩɩda?
2 D sẽn maan pĩnda: Hal sẽn na maan yʋʋma, tõnd sɛbã gomda Wẽnnaam Rĩungã yell n yɩɩda. Yʋʋmd 1939 tɛkã, sebr ning d sẽn yiisd n yɩɩdã gom-zug yaa: Gũusg Gasgã moonda a Zeova Rĩungã. A wae n gomda Rĩungã yelle, la a wilgd a sẽn na n maan bũmb ningã. Réveillez-vous ! wã me wilgda nebã tɩ yaa Wẽnnaam Rĩungã bal n na n wa ne ãdem-biisã zu-loees tɩɩm. Dẽnd pa zaalem tɩ dũniyã gill zugu, yaa seb-kãensã b yiibã la d lebgd la d yiisd n yɩɩd sebr buud fãa ye.—Wil. 14:6.
3. Tʋʋm-teed tõnd sẽn tall n moon Rĩungã koɛɛgã kẽer la bʋse?
3 A Zeova nin-buiidã tũnuga ne tʋʋm-teed buud toor-toor n taas nebã Rĩungã koɛɛgã. Sɩngrẽ wã, d tʋma ne radio-rãmba, fõnograf-rãmba, la mobila sẽn tar mikoro-rãmba. Woto sõng-d lame tɩ d tõog tɩ neb wʋsg wʋm Rĩungã koɛɛgã, baa koe-moondbã sõor sẽn da paoodã. (Yɩɩl 19:5) Yʋʋmã noore, d tũnugda ne tõnd sɩtã (jw.org) n taasd neb milyõ-rãmb koɛɛgã, hal baa neb nins sẽn be tẽnsẽ b sẽn gɩdg tõnd tʋʋmdã.
4. Yam bʋs la d bao n moond koɛɛgã?
4 A Zeova nin-buiidã leb n baoa yam-paalse, n moond Rĩungã koɛɛgã. Wala makre, yʋʋmd 1990 la zakã tɛka, d maneg n wɩnga ne koɛɛgã mooneg zak-zaka, zãma sʋka, la koosem zĩisẽ. Sẽn nan pa kaoose, galʋ-tẽn-bɛdã kẽer pʋsẽ, d yãka yam n dʋʋgd d sɛbã zãma zĩisẽ, n paamd n moond koɛɛgã. Sẽn paase, tigims kẽer sẽn tar zĩis nebã sẽn waoogã yãka yam n dʋʋgd tõnd sɛbã puus-puus-rãmb zut wall taabl-dãmbẽ, sẽn na yɩl tɩ koɛɛgã ta so-loaadbã. La baasgo, ket n yaa zak-zak la d moond koɛɛgã n yɩɩda.—Tʋʋ. 20:20.
5. Bõe la d na n tõog n maan tʋʋmdã yʋʋmd sẽn na n sɩngã?
5 D sẽn magd n na n maane: D tʋʋmdã yʋʋmd sẽn na n sɩng bõn-bɩʋʋng kiuugã tɛkã, neb wʋsg na n yɩɩ wakat fãa so-pakdba. Yãmb me tõe n bao n yɩɩ wakat fãa so-pakd bɩ? Rẽ sã n yaa toog ne-yã, y tõe n mi n yɩɩ sõngr so-pakda. Bãng-y tɩ y tõog n yɩɩ so-pakd tɩ y pa tõog me, y sã n mao n moon Rĩungã koɛɛg sõma, a Zeova na n ninga y modgrã barka.—Mal. 3:10.
6. Bõe yĩng tɩ zĩ-likr kiuugã sẽn watã pa na n wõneg a taaba?
6 Yʋʋmd 2014 zĩ-likr kiuugã sẽn watã, na n yɩɩ yʋʋm koabg woto Wẽnnaam sẽn lugl a Rĩungã. Rẽ n so tɩ ki-kãng Gũusg Gasgã na n maneg n gom Wẽnnaam Rĩungã yelle. Sã n tõe bɩ y bao seb-kãng tɩ seke, n moon koɛɛgã. D sẽn gũud bark nins sẽn wat beoog daarã, bɩ d fãa modg n moon “Wẽnnaam soolem koe-noogã,” tɩ sẽn dat-a fãa wʋme.—Tʋʋ. 8:12.