Bõe yĩng tɩ y segd n bao n bãng Wẽnnaam Rĩungã sõma?

Dũniyã gill zugu, neb milyõ rãmb teega Wẽnnaam Soolmã bɩ a Rĩungã, n saagdẽ tɩ b vɩɩmã na n yɩɩ sõma beoog-daare. B tũuda bũmb ning a Zezi sẽn yeel a karen-biisã. A yeel-b lame tɩ b pʋʋs tɩ ‘Wẽnnaam soolem wa, t’a raab maan dũniyã zugu.’—Matɩe 6:10.

Yaa sɩd tɩ neb wʋsg baoodame n na n bãng Wẽnnaam Rĩungã sõma. La tũudmã fãa la bal pʋsẽ, b pʋd n pa gomd a yell ye. Kʋdemd yɛl-mit a H. G. Wells yeela woto: “A Zezi sẽn zãms nebã bũmb ninsã pʋgẽ, a wilga wakat fãa tɩ Wẽnnaam saasẽ Rĩungã tara yõod hal wʋsgo. La baa ne rẽ, Egiliiz-rãmb wʋsg pʋsẽ, b pa gomd a yell ye.”

La a Zeova Kaset rãmbã gomda Wẽnnaam Rĩungã yell wakat fãa. Wala makre, b yiisda sebrã yãmb sẽn karemdã buud-goam 220 pʋgẽ. Sẽn kolg bãmb milyõ 46 la b yiisd kiuug fãa. Rẽ kɩtame tɩ dũniyã gill zugu, yaa seb-kãng la b pʋɩt n yɩɩd sɛb a taabã fãa. La sẽn yɩɩ fãa, bõe la b rat tɩ nebã bãng ne sebrã maasem? Sebrã meng gom-zugã yeta woto: Gũusg Gasgã moonda a Zeova Rĩungã.a

Bõe yĩng tõnd a Zeova Kaset rãmbã modgd n moond Wẽnnaam Rĩungã? Bala d miime tɩ yaa Wẽnnaam Rĩungã yell la Biiblã gomd n yɩɩda. Biiblã yaool n yaa sebr ning sẽn tar yõod n yɩɩd sebr buud fãa. Sẽn paase, d kɩsa sɩd tɩ yaa Wẽnnaam Rĩungã bal n na n wa welg ninsaalbã zu-loeesã fãa.

A Zeova Kaset rãmbã maanda b sẽn tõe n tũud a Zezi mak-sõngã, n sõngd nebã tɩ b bãngd Wẽnnaam Rĩungã sõma. A Zezi sẽn da be tẽngã zugã, Wẽnnaam Rĩungã yell n da pak-a n yɩɩda. Rẽ yell la a ra gomd n yɩɩda. (Luk 4:43) Bõe yĩng tɩ Rĩungã ra tar yõod wʋsg ne a Zezi? Bõe la y tõe n maan tɩ Rĩungã naf yãmba? Bɩ y karem sõss nins sẽn pʋgdã, tɩ y na n bãnga Biiblã sẽn yet rẽ wɛɛngẽ.