Ket-y n maand-y karen-biisi
1. Yɩl tɩ ned paam fãagre, bõe la d segd n maane?
1 Tõnd yʋʋmd-yʋʋmd rapoorã wilgame tɩ yʋʋmd 2014 soabã pʋgẽ, a Zeova nin-buiidã modgame n moon Rĩungã koɛɛg ne yẽesem. (Mat. 24:14) D sẽn moond koɛɛgã zak-zakã, d sẽn pʋɩt seb-vãad n boond nebã tɩ b wat d tigis-kãsemsã la a Zezi kũumã tẽegrã, la seb-vãad a taabã, n paas d sẽn moond koɛɛgã zãma sʋkã kɩtame tɩ d tõogd n taasd neb wʋsg koɛɛgã n yɩɩd pĩndã. La yɩl tɩ ned tõog n paam fãagre, rẽndame tɩ d zãms-a Biiblã, n sõng-a t’a lebg a Zezi karen-biiga.—1 Tɩm. 2:4.
2. Sogs-bʋs la y tõe n sok y mense, tɩ sõng-y tɩ y bãng y sã n baooda ned n na n zãms-a Biiblã?
2 Wilg-y tɩ y baooda Biibl karen-biiga: Rẽ yĩnga, ned sã n wilg t’a rat n wʋma koɛɛgã n paase, y reegda a adɛrse, la y modg n tɩ kaag-a pĩnd-pĩnda, sẽn na yɩl n zãms-a Biiblã bɩ? Zak-zak moonegã sasa, y nong n wilgda y kɛlgdbã tõnd sẽn zãmsd nebã Biiblã to-to bɩ? Rẽ yĩnga yãmb wae n kãabda neb nins y sẽn kẽnd n kõt periodik-rãmbã Biiblã zãmsg bɩ? Yãmb zoe n wilga y tʋmd-n-taaga, y karen-bi-taaga, y yaka, pa rẽ bɩ y roagd wall ned y sẽn mi Bõe yĩng tɩ y tog n zãms Biiblã? ne Wãn to la d zãmsd ned Biiblã? video-rãmbã bɩ? Y sã n wa rʋʋg tõnd sɛbã n moond zãma sʋka, tɩ ned yãk sebr d sẽn tar n zãmsd nebã Biiblã, y wilgd-a lame tɩ tõnd tara sebrã n zãmsd nebã Biiblã zaalem bɩ?
3. Yɩl n moon koɛɛgã tɩ wom biisi, bõe n yaa tɩlɛ?
3 A Zeova ne a Zezi na n sõng-y lame: Nand t’a Zezi yeel tɩ ‘maan karen-biisã,’ a yeelame tɩ ‘kẽnge.’ Yɩl n tũ a Zezi gom-kãngã, d segd n modgame, la d tall yam koɛɛgã mooneg pʋgẽ. Baasgo, tõnd pa d yembr tʋʋmdã pʋgẽ ye. A Zezi pʋlmame t’a na n paa ne-do. (Mat. 28:19, 20) Sẽn paase, a Zeova kõo tõnd a vʋʋsem sõngã, tʋʋm-teedo, la a sõngd tõnd tɩ d paamd minim n tõe n sõng nebã tɩ b bãng sɩdã. (Zak. 4:6; 2 Kor. 4:7) D tõeeme me n pʋʋs n kos ‘ratem, la pãnga,’ n tõog n moon koɛɛgã.—Fil. 2:13, Kãab-paalgã Koe-noogo.
4. Bõe yĩng tɩ d segd n ket n maood n maand karen-biisi?
4 Koɛɛgã mooneg kõt-d-la sũ-noog wʋsgo. La d sã n sõng ned t’a bãng sɩdã, n naag tõnd sor sẽn ‘dabd vɩɩm zĩigẽ’ wã, paasda d sũ-noogã. (Mat. 7:14; 1 Tes. 2:19, 20) Sẽn yɩɩda, d sã n ket n maood n maand karen-biisi, d na n ta a Zeova yam, bala, Biiblã yetame t’a ‘ka rat tɩ ned ba a ye sãam ye. A maanda sũ-mar ne yãmb n dat tɩ yãmb fãa yam tek tɩ y kos sugri.’—2 Pɩɛ. 3:9.