D kãab nebã Biibl zãmsg wakat fãa
1. A Zezi sẽn yeel bũmb ning Matɩe 28:19, 20 wã baoodame tɩ d maan bõe?
1 A Zezi kõo tõnd noor tɩ d kẽng n maan ‘karen-biisi . . . , la d zãms-ba.’ (Mat. 28:19, 20) Woto yĩnga, d segd n kãabda nebã Biibl zãmsg wakat fãa, la pa daar ning tigingã sẽn yãk n na n kãabd nebã Biibl zãmsgã bal ye. Bɩ d ges sagls sẽn tõe n sõng-d rẽ wɛɛngẽ.
2. Ãnd dãmb la d tõe n kãab Biibl zãmsgo?
2 D kãab nebã Biibl zãmsgo: D sã n kãabd neb wʋsg Biibl zãmsgo, d na n paama neb wʋsg sẽn dat n zãms Biiblã. (Koɛ. 11:6) Yãmb zoe n kãaba ned Biibl zãmsg y pipi sõsgã sasa bɩ? Etazĩni, tiging a ye modgame n maan woto kiuug tõre. B sũur yɩɩ noogo, b sẽn paam neb 42 sẽn sak n na n zãms Biiblã. Ra tags-y tɩ neb nins fãa yãmb sẽn nong n sõsd ne wã miime tɩ y zãmsda nebã Biiblã ye. Y sã n lebg n kẽng b nengẽ nindaar bɩ y kãab-b Biibl zãmsgo. Baa b sã n pa sake, pa sãam ye. Y tõe n ket n kẽnda b nengẽ n sõsd ne-ba. Yãmb zoe n kãaba y zakã neba, y yagse, y tʋmd-n-taas bɩ y karen-bi-taas Biibl zãmsg bɩ? Y tõeeme me n sok y Biibl karen-biisã n gese b sã n tara zo-rãmb bɩ zak neb sẽn dat Biibl zãmsgo.
3. Seb-vã-bʋg n tõe n sõng tõnd tɩ d sɩng Biibl zãmsg ne nebã, la wakat bʋg la d tõe n zã seb-vãoogã?
3 Bũmb sẽn tõe n sõng-do: Bũmb sẽn tõe n sõng tõnd tɩ d sɩng Biibl zãmsg ne nebã yaa Yãmb dat n bãnga sɩdã bɩ? seb-vãoogã. Baa ned sã n deeg sebr bɩ a pa reege, d tõe n kõ-a-la seb-vãoogã. Y sã n moond koosem zĩigẽ, sor noore, bɩ y sã n lebg n na n tɩ ges neda, y tõe n kõo seb-vãoogã. Y sã n wa gʋls ned lɛt n na n kɩs kasetã, y tõe n naagame n toole. Zĩis kẽere, y sã n pa mik ned a zakẽ y tõe n basa seb-vãoogã. Zã-y seb-vãoogã, y sã n na n dɩk tagsɩ bɩ biisi, y sã n na n kẽng raag bɩ tʋʋma. Seb-vãoogã poorẽ wã b wilga nebã Biibl zãmsg sẽn maand to-to, la b sẽn tõe n paam Biiblã yetame sebrã to-to.
4. Wãn to la d tõe n tũnug ne Yãmb dat n bãnga sɩdã bɩ? seb-vãoogã n sɩng Biibl zãmsg ne neda?
4 Y sã n kõ ned seb-vãoogã, bɩ y wilg-a sogsgã sẽn be a zugã la y sok-a n gese bʋg leokr la a rat n bãnge. Rẽ poor bɩ y naag taab n ges leokrã sẽn be seb-vãoogã pʋgẽ wã, la y karem bɩ n kʋms goam nins sẽn be seb-vãoogã poorẽ wã n wilgd Biiblã zãmsg sẽn maand to-to wã. Rẽ poor bɩ y wilg-a Biiblã yetame sebrã la y lak zĩig ning a sẽn tõe n paam vẽnegr n paasã. Kõ-y a soabã sebrã la y yãk wakat y sẽn na n lebg n wa sõs ne-a.
5. Bõe yĩng tɩ d segd n kãabd nebã Biibl zãmsg wakat fãa?
5 Neb sẽn dat n bãng Biiblã sẽn sɩd yetã ne b sũur fãa ket n beeme. D sã n kãabd nebã Biibl zãmsg wakat fãa, d na n paama zu-noog n tõog n sõng neb kẽer tɩ b bãng vɩɩm sẽn kõn sa wã sore.—Mat. 7:13, 14.