Lebg-n-tɩ-ges wata ne Biibl zãmsgo
1. Bõe yĩng tɩ tar yõod tɩ d lebgd n tʋgd n get nebã?
1 A Zezi tʋma a karen-biisã tɩ b tɩ moone, la ka rẽ bal ye, a leb n yeelame tɩ b ‘maan karen-biisi, n zãms-ba.’ (Mat. 28:19, 20) Koe-moond moondame bala, la ned sẽn kõt zãmsg ka tekd woto bal ye. A kõta sagls la noyã, a wilgda yɛla võore, la a kõt kaset sẽn wilgd t’a sẽn yeta yaa sɩda. Manesem a yembr sẽn na yɩl n zãms neb a taabã, yaa d sẽn na n lebgd n tʋgd n get b rãmb nins sẽn dat n bãng n paasã, sẽn na yɩl n wa tõog n sɩng Biibl zãmsg ne-ba.
2. Ãnda la y segd n lebg n tɩ gese?
2 Ãnda la y segd n lebg n tɩ gese? Modg-y n lebg n tɩ ges ned ning fãa sẽn deeg sebre, bɩ sẽn wilg baa yaa bilf t’a rat n wʋma koe-noogã n paase. Sã n yaa yɩng la y yã ned n kõ-a kaset t’a wilg raab ne sɩdã, bɩ y bao n bãng a soabã adɛrs bɩ a telefõn nimero, sẽn na yɩl n wa tõog n ket n sõngd-a. Ra tags-y tɩ Biibl zãmsg sɩngr ne neb yaa toog ye. Ket-y n gẽesd neb nins sẽn na n sak n zãms Biiblã tɩ y na n yã-b lame.—Mat. 10:11.
3, 4. Bõe la d segd n maan sẽn na yɩl tɩ d lebg-n-tɩ-ges rãmbã yɩ sõma?
3 Wilg-y t’a soabã yell sɩd pak-y lame: Yaa pipi kẽngrẽ wã la lebg-n-tɩ-ges sõng seglg sɩngda. Koe-moondb nins sẽn mi tʋʋmdã gũusd n geta bũmb nins sẽn pak ned ning b sẽn moondã, tɩ b nindaar sõssã sasa bɩ b tik rẽ zugu. Koe-moondb kẽer yãame tɩ yaa sõma tɩ b baas ne sokre, sẽn na yɩl t’a soabã tʋlg tɩ b lebg n wa nindaare. Neda yell sã n sɩd pak-d lame, baa d sã n yi a soabã nengẽ, d na n ket n tagsda a yelle, la rẽ na n kɩtame tɩ d tʋlg n lebg n wa tao-tao. Sã n tõe, bɩ y lebg n tɩ ges a soabã tɩ sɩdã tʋlsem ket n be a yamẽ, tõe n yɩɩ vẽk-n-beoog bɩ rayɩt-n-daar menga.
4 Y sã n lebg n kẽng a soabã nengẽ, bɩ y bao n tik y sẽn sõs bũmb ning nindaarẽ wã zugu. Modg-y tɩ wakat fãa bɩ y taas a soabã baa yaa tagsg a yembr sẽn tik Biiblã zug n keng a tẽebo, la y sak n kelgd-a me. Bao-y n bãng nedã sõma. Rẽ poore, y sã n na n wa tɩ ges-a wakat a taaba, bɩ y taas-a Wẽnnaam Gomdã zãmsg nins sẽn tɩ loe ne yɛl nins sẽn pak-a wã.
5. Wãn-wãn la d tõe nana-nana bal n sɩng Biibl zãmsg ne neba?
5 Bao-y wakat fãa n sɩng Biibl zãmsg ne neda: Lebgd-y n tʋgd n get nebã sẽn na yɩl n wa tõog n sɩng Biibl zãmsg ne-ba. Wãn-wãn la y tõe n maan dẽ? Wilg-y tɩ y ratame t’a bãng bũmb sẽn na n yɩ-a noog wʋsgo, la y lak Bãngr sebrã bɩ Baood seb-bilã n karem sull y sẽn tagsd tɩ na n zĩnda yamleoog ne-a. Karengã poor bɩ y sok sokrã, la y sõs verse a yembr bɩ a yiib b sẽn sõdg zugu. Woto yaa bũmb y sẽn tõe n kell n maan yĩngr-yĩngr ne a soabã bal minit a nu n digd piiga. Baasgẽ wã bɩ y sok sokr ning sẽn pʋgdã, la y maan segls sẽn na yɩl n wa kẽng taoor ne sõasgã wakat a to.
6. Wãn to la d tõe n wilg tɩ d miimi tɩ tara yõod tɩ d maan lebg-n-tɩ-ges rãmba?
6 Koe-moonegã neng a yembr sẽn tar yõod wʋsg yaa d sẽn na n sõngd neb nins fãa sẽn dat n bãng sɩdã. Woto yĩnga, bɩ d bao wakat semen fãa n maand lebg-n-tɩ-ges rãmba. D sã n maan woto, d koe-noogã mooneg na n yɩɩ sõma n paase, la kõ-d sũ-noog hakɩka.