Sõng-y neb nins sẽn tar yam-sõngã
1. Ãnda rãmb la a Zeova tigimd a sɛɛgẽ tõnd wakatã?
1 Ned kam fãa tara yam-tagsg sẽn kɩ yẽg sõma a sũurã pʋgẽ. (Mat. 12:35) Biiblã gomda ‘zabr sẽn be ned sũurẽ’ yelle. (Yɩɩl 55:22) Neb kẽer ‘sũy yikda tao-tao.’ (Yel. 29:22) La neb n be n ‘tar yam-sõng vɩɩm sẽn-kõn-sa wã yĩnga.’ (Tʋʋ. 13:48, NW ) A Zeova tigimda nin-kãensã sẽn tar yam-sõngã a sɛɛgẽ tõnd wakatã. (Azze 2:7) Wãn to la d tõe n sõng-b tɩ b lebg a Zeova balemdba?
2. Karen-biisã maaneg tʋʋmd baoodame tɩ d maan bõe?
2 Maan-y lebg-n-tɩ-ges rãmbã neere: D sã n tall tagsg ning sẽn zemsã lebg-n-tɩ-ges rãmbã wɛɛngẽ, na n sõng-d-la sõma tɩ d tʋm tʋʋmd ning sẽn yaa maan karen-biisã. (Mat. 28:19, 20) Tõnd lebgda tao-tao n tɩ sõng neb nins sẽn dat n bãng n paasã bɩ? Tõnd lebgd n tʋgd n geta neb nins fãa sẽn sak sɛbã bɩ sẽn wilgd b raabã ne koe-noogã bɩ? Tõnd ket n modgdame n na n sõng nebã tɩ b bɩ tẽebã wɛɛngẽ bɩ? Sẽn mik tɩ neb vɩɩm n be yell pʋgẽ wã, d segd n baoome n sõng neb nins sẽn wilg tɩ b rat n bãng n paasame wã.
3. Yãmb sã n sõs ne ned koe-moonegã wakat n sa, bõe la y segd n maane?
3 Yãmb sã n sõs ne ned paalem tɩ sõasgã ket n be y yamẽ wã, bɩ y rɩk sẽk n gʋls a soabã yʋʋr la a adɛrse. Gʋls-y yãmb sẽn sõs bũmb ning zugã, verse nins y sẽn karmã, la sɛb nins y sẽn basã. Rẽ poor bɩ y tẽeg n lebg n tɩ ges a soabã tao-tao.
4. Wãn-wãn la d tõe n maan lebg-n-tɩ-ges rãmb tɩ yɩ sõma?
4 D sẽn na n maan lebg-n-tɩ-ges to-to: Y sã n wa lebg n na n tɩ ges neda, yɩta sõma tɩ y tall zood manesem ne a soabã la y wilg ne pʋ-peelem t’a soabã yell pak-y lame. Sõs-y sõasg sẽn yaa nana sẽn tik Gʋlsg Sõamyã zugu. Segl-y Biiblã gom-zug sẽn be yamleoog n sõs ne a soabã, tɩ sõasgã baasgẽ bɩ y maan sokr sẽn na n paam leokr nindaar gesgã wakate. Yɩta sõma tɩ y ra bao n wẽ no-koeemd ne nedã, tagsa sẽn kɩɩsd Biiblã a sẽn togs yĩng ye. Tik-y bũmb nins yãmb y yiibã fãa sẽn sakã zug n zãms a soabã sɩdã n paase.—Kol. 4:6.
5. Wãn-wãn to la so-pakd a ye maan modgre, la rẽ waa ne bi-bʋse?
5 Lebg n tɩ ges nebã baooda modgre, la bark nins d sẽn paamdã kõt-d-la sũ-noogo. So-pakd sẽn be Zapõ yãka bõn-datl t’a na n maanda lebg-n-tɩ-ges rãmb n paasd kiuug fãa. A sɩngame n gʋlsd neb nins fãa a sẽn segd zak-zakã moonegã wakatã adɛrs rãmba, tɩ rasem a yopoe pʋgẽ bɩ a lebg n tɩ ges-ba. A segla bũmb nins a sẽn da na n yeelã sõma, la a maana a tʋʋmdã, n tar bas-yard zãng-zãng ne koɛɛg ning a sẽn taasd nebã. Zĩig a yembre, a tõog n sɩnga Biibl zãmsg ne ned sẽn dag n yeel tɩ: “Wakat fãa mam ka sakd n kelgd yãmb ye. Pipi mam sẽn sak n kelgd yãmb la woto.” So-pakdã sẽn pẽdg ne nonglmã, woma biisi. Pipi kiuugã kũumẽ t’a ra tara Biibl zãmsg piiga.
6. Bõe yĩng tɩ d tog n pẽdgd ne lebg-n-tɩ-ges rãmbã maanego?
6 Neba yɛl toeemda wakat fãa. (1 Kor. 7:31, Sebr Sõngo) Naoor wʋsgo, rẽnda d kẽng ned sẽn dat n bãng sɩdã nengẽ naoor yak n tõog n le yã-a yiri. D sã n maand lebg-n-tɩ-ges rãmbã neere, d na n tõog n sõnga neb nins sẽn tar yam-sõngã tɩ b sɩng sor ning sẽn tar n debd vɩɩm sẽn-kõn-saẽ wã zug kẽnde.—Mat. 7:13, 14.