D tara seb-paalg sẽn na n sõng-d tɩ d sɩng Biibl zãmsg ne neba!
1 Etazĩni pag a yembr n da tar yẽesem wʋsg a Katolik tũudmã pʋgẽ. A ra teenda egiliizã zãmsg ne kɩs-sɩda. A tol n kẽnga pelerinaas Vatikã. Ne rẽ fãa a Zeova Kaset soab n wa a zakẽ wã n kãab-a Biibl zãmsg t’a sake. Bõe yĩng t’a sake? A sakame, bala a ra rat n bãnga Biiblã sẽn yet bũmb ningã, la a egiliizã pa kãab-a Biibl zãmsg ye. Bõe la yel-kãngã zãmsd tõndo? Tɩ tõnd ka tol n tõe n bãng ned ning sẽn na n saka Biibl zãmsg ye.—Koɛ. 11:6.
2 Yãmb zoe n maana yam-yoog ne togs nebã tɩ d sakame n na n zãms Biiblã ne ned ning fãa sẽn dat bɩ? Rẽ yĩnga, neba fãa sẽn be yãmb babgẽ wã miimi tɩ tõnd maanda Biibl zãmsg woto zaalem ne neba bɩ? Wãn to la d na n maan n bãng b sã n sɩd miimi? Masã d tara seb-paalg n tõe n dɩk n tʋme! Yaa seb-nens a yoob seb-vãoog sẽn yaa neer t’a gom-zugã yaa Aimeriez-vous en savoir plus sur la Bible ? (Y ratame n bãng Biiblã n paas bɩ?) Bɩ d vaees seb-vãoog kãngã gom-zu-bil fãa n bãng sẽn be a pʋgẽ:
3 “Bõe yĩng tɩ d segd n karem Biiblã?” Seb-vãoogã togsda yɛl sẽn be yamleoog sẽn kɩt tɩ d segd n zãms Biiblã. A wilgdame tɩ Biiblã tara “zãmsg b sẽn kõ ne nonglem sẽn yit Wẽnnaam nengẽ,” sẽn wilgd d sẽn tõe n pʋʋs Wẽnnaam to-to n kos sõngre, la d sẽn na n maan to-to n paam vɩɩm sẽn-kõn-sa wã. (1 Tes. 2:13) Seb-vãoogã gomda Biiblã “sɩd kẽer sẽn kõt vẽnegr” yelle, wala bũmb ning sẽn maand ned a kũum poorã, la bũmb ning sẽn kɩt tɩ namsg wʋsg be tẽngã zugã. A wilgda “no-sõma sẽn be Biiblã pʋgẽ,” tɩ d sã n tũ-b bɩ b nafd tõnd yĩngã wɛɛngẽ, la a kɩtdẽ tɩ d tõe n tall sũ-noogo, saagre, la zʋg-sõma a taaba. Seb-vãoogã leb n goma bũmb a to sẽn segd n kɩt tɩ d karem Biiblã yelle. Bõn-kãng yaa bãngr-goam nins sẽn tɩ loe ne beoog-daarã, sẽn wilgd bũmb nins sẽn wat ka la bilfã.—Wil. 21:3, 4.
4 “Sõngr sẽn na yɩl tɩ d wʋm Biiblã võore”: Seb-vãoogã yeelame: “Tõnd fãa rata sõngr sẽn na yɩl n wʋm Wẽnnaam Gomdã võore.” Rẽ poore, a bilgda tõnd sẽn zãmsd Biiblã to-to ne nebã woto: “Naoor wʋsgo, sẽn yaa sõma n yɩɩd yaa b sẽn na n zãmsd Biiblã n kẽngd taoor bilf-bilfu, n deng n sɩng ne zãms-kãsemsã.” Sebrã wilga vẽeneg tɩ yaa “Biiblã zug la zãmsgã tik-yã,” la a gom Baood seb-bilã yelle, n wilgdẽ t’a yaa sebr sẽn tõe n sõng karen-biig “t’a wʋm verse rãmb sẽn tɩ loe ne gom-zut toɛy-toɛy võore.” Gom-zu-bil ning sẽn pʋgdã sʋka sʋkr sẽn tar pãnga.
5 “Y sakame n na n dɩk sẽk rasem a yopoe fãa n wʋm Biiblã võor bɩ?” B wilga a pʋgẽ tɩ b tõe n ninga Biibl zãmsgã wakat la zĩig ning sẽn zems ne karen-biigã raabo. Tõe n yɩɩ a meng zakẽ bɩ ne telefõn tũnugri. Ãnda n tõe n naag zãmsgã pʋgẽ? Seb-vãoogã leokda woto: “Yãmb zaka neb fãa. Y tõe n boola y zo-rãmb nins fãa y sẽn dat me tɩ b wa naag be. B tõe n maana zãmsgã ne yãmb y yembr bala, tɩ sã n yaa woto la y rata.” Zãmsgã segd n kaoosa wakat a wãna? Seb-vãoogã wilgda woto: “Neb wʋsg rɩkda lɛɛr a yembr rasem a yopoe fãa n zãmsd Biiblã. Y sã n da tõe n dɩka sẽk sẽn yɩɩd bɩ sẽn ka ta woto rasem a yopoe fãa, Kaset rãmbã na n sakame n wa sõng-yã.” Ka la yellã meng nifu! Tõnd sakame n na n maan toeeng tɩ zems ne karen-biigã yɛl sẽn yaa to-to.
6 “B boond-y lame tɩ y wa zãmse”: B yãka zĩig seb-vãoogã pʋgẽ n bas tɩ seb-vãoogã rɛɛgd tõe n kʋrg n gʋls n kos Baood seb-bilã bɩ n kos tɩ ned wa wilg-a tõnd sẽn zãmsd Biiblã ne nebã b yiyã zaalmã na-kẽndre. B ninga Baood seb-bilã fot a pʋgẽ. Rẽ yĩnga yãmb ka ne tɩ seb-kãngã tõe n tusa pʋ-peelem dãmb wʋsg tɩ b sak tõnd sõngrã sɩda? Masã wãn to la tõnd tõe n tʋm ne seb-paalg kãngã sõma n yɩɩda?
7 Ãnd soab la yãmb tõe n kãab sebrã? D tõe n dɩka seb-vãoogã n ning neba nusẽ, bɩ d bas-a b yiya, b sã n ka be yiri. D tõe n pʋɩ-a-la zak-zaka, soay zutu, la toleng zĩisẽ. D sã n kãab nebã tõnd sɛbã, b reeg tɩ b ka reeg me bɩ d bas ne-b seb-vãoogã. Sẽgemd-y-yã-a zʋrno rãmbã bɩ sɛb a taab pʋsẽ. Y sã n wa gʋlsd neb lɛta bɩ y naag-b lɛta wã pʋsẽ. Kãab-y neb nins y sẽn tõogd n paamd ne telefõnã tɩ y na n tool-b-la a yembre. Wakat fãa bɩ y tar seb-vãad tɩ be ne-yã, tɩ y sã n wa tɩ raad teedo, n dɩk mobill n dabd zĩig ninga, bɩ y sã n wa paam sor n kõt kaset ne manesem sẽn ka yãk wakat bɩ y pʋɩ-ba. Ned sã n wa y yir fãa bɩ y kõ-a a yembre. Kõ-y-yã-a y roagdba, y yagse, y tʋmd-n-taase, y karen-bi-taase, la y mitins a taaba. Modg-y tɩ ned ning fãa y sẽn seg bɩ y kõ-a seb-vãoogã! La y maan bõe rẽ poore?
8 A soaba sã n sak zĩig pʋgẽ: Neb kẽer tõe n saka zĩig pʋgẽ, n yeel tɩ b ratame tɩ b zãms-b Biiblã. Yaa rẽ n so tɩ y sã n wa moond koe-noogã, bɩ y modg n tall Baood seb-bi a yiibu: a yembr karen-biigã yĩnga, a to wã yãmb meng yĩnga. A soabã sã n sakame bɩ y sɩng zãmsgã zĩig pʋgẽ ne-a. Lak-y seb-neng a yiibẽ wã n karem zĩig ning b sẽn yeel tɩ “D sẽn na n tʋm ne seb-bi-kãngã to-to” wã. Rẽ poor bɩ y kell n kẽng pipi zãmsgẽ wã n mak zãmsgã sẽn maand to-to n wilgi. Rẽ yĩnga ka woto n yaa nana n yɩɩd sɩda?
9 La nedã sã n dat n deng n tags nanda: Ra bas-y tɩ kaoos wʋsg n yaool n leb n bao n yã a soabã yɛs ye. Modg-y n tall Baood seb-bilã tɩ y sã n leb n paam a soabã bɩ y lak seb-neng a yiibã sẽn tar gom-zutã zĩigã n wilg-a. Bas-y t’a karem gom-zutã n yãk zãmsg ning a sẽn dat n bãng n yɩɩdã. Lak-y zĩ-kãng n sɩng zãmsg ne-a be.
10 D lebg n tɩ ges b rãmb nins d sẽn bas zʋrno rãmbã ne wã: Y sã n naaga seb-vãoogã ne zʋrno rãmb n bas ne neda, y lebg-n-tɩ-gesẽ wã y tõe n yeela woto: “Nindaarẽ m sẽn wa yãmb nengẽ wã, m sũur yɩɩ noog m sẽn bas Gũusg Gasgã zʋrnall ne-yã. Tõe tɩ y yãame tɩ zʋrnallã gom-zug zãng yaa Gũusg Gasgã Moonda A Zeova Rĩungã. Rũndã m nongẽ lame n wilg Rĩung kãng sẽn ya a soaba, la a sẽn na n naf yãmb ne y zakã rãmb to-to.” Rẽ poor bɩ y lak Baood seb-bilã zãmsg a 6 zĩigẽ. Sɩng-y ne pipi sullã n karemdẽ la y sõsd sulã zut sẽn zems ne sẽk ning a soabã sẽn tarã. Rẽ poor bɩ y segl n lebg n wa baas zãmsgã raar a to.
11 Ra kong-y seb-vãad ye: Tʋʋmdã yel-gɛt ne saam-biis nins sẽn get-b sɛbã yellã segd n modga wakat fãa tɩ Aimeriez-vous en savoir plus sur la Bible ? (Y ratame n bãng Biiblã n paas bɩ?) seb-vãad sõor sẽn sek zĩnd tigingã pʋgẽ. Ning-y seb-vãad y gɩfẽ wã bɩ y korgẽ wã, y mobillẽ wã, y tʋʋmdã zĩigẽ, lekollẽ wã, roogã noor sẽnese, zĩig ning fãa y sẽn tõe n paam-b tao-tao. Yaa vẽeneg tɩ y na n zãa kẽer y koe-moonegã korg pʋgẽ tɩ y sã n wa seg ned n na n sõs ne Biiblã zug bɩ y kõ-a.
12 Bɩ a Zeova bark d modgrã: Kiris-nebã fãa segd n datame n zãms neb a taabã sɩdã. (Mat. 28:19, 20) Masã yãmb zãmsda Biiblã ne ned bɩ? Sã n yaa woto, rẽ yĩnga rasem a yopoe wã pʋgẽ y tõe n yãa sẽk n zãms ne ned a to n paas bɩ? Y sã n ka zãmsd ned Biiblã, sik kae tɩ y ratame n paam ned n zãms-a ye. Pʋʋs-y n kos a Zeova t’a ning y modgrã bark tɩ y tõog n yã ned n zãms-a Biiblã. Rẽ poor bɩ y tʋm tɩ zems ne y pʋʋsgã.—1 Zã 5:14, 15.
13 D tara seb-paalg sẽn tõe n sõng-d tɩ d sɩng Biibl zãmsg ne neba! Karm-y-yã-a n bãng sẽn be a pʋgẽ wã sõma. Pʋɩ-y seb-vãad wʋsgo. Maan-y y sẽn tõe fãa n ‘maan neer tɩ tʋʋm sõama yɩ y arzɛgse, la y yɩ kõatb sẽn kõt’ neb a taabã bũmb ning y sẽn zãms Wẽnnaam Gomdã pʋgẽ wã ne sũ-noogo.—1 Tɩm. 6:18.
[Zĩ-gũbri, seb-neng a 7]
SOAY Y SẼN TÕE N TŨNUG NE N PƲƖ NEBA SEB-VÃOOGÃ
◼ Y sã n wa sõsd ne neba daar fãa
◼ Ned sã n sak n deeg tõnd sɛbã
◼ Ned sã n ka be yiri
◼ D sã n wa maand lebg-tɩ-ges rãmbã
◼ D sã n wa kõt ned kasetã sor zugu
◼ D sã n kõt kasetã tolengã zĩisẽ
◼ D sã n wa kõt kaset sẽn pa yãk wakate
◼ D sã n wa gʋlsd lɛta
◼ D sã n wa be mobill pʋgẽ n debd zĩig ninga
◼ Ned sã n wa tõnd yiri
◼ D sã n wa sõsd ne roagdba, yagse, tʋmd-n-taase, karen-bi-taase, la ne mitins a taaba