Tũnug-y ne seb-vãadã n sɩng sõsse
1 Y ka sak tɩ kaset kũun sẽn womd biis bee wʋsg ne y sẽn na n dengd n sɩngd sõss sɩda? Yellã toog yaa tõog n yeel bũmb sẽn na n nek nedã ratem n paam t’a soabã kẽes a meng sõasgã pʋgẽ. La wãn to la d tõe n maan dẽ sõma-sõma?
2 Koe-moondb wʋsg yãame tɩ b sã n tũnug ne gom-biis a wãn b sẽn tũus sõma, la b kãab tõnd seb-vãadã sẽn tik Biiblã zugã a yembre, b tõe n sɩnga sõsse. Gom-zutã nekda ratem, tɩ fot rãmbã tar gʋlem sõma la b be yamleoogo. Seb-vãoog ka pigd ned ne tagsa wʋsg n kɩtdẽ t’a tags tɩ kɩbayã a sẽn na n karmã labsame ye. Baasgo, seb-vã-kãensã tara koees takɩ tɩ b kareng be yamleoog wʋsgo, la b sẽn tõe n tũnug ne n sɩng Biibl zãmsgo.
3 Kaset soab a yembr togsa woto: “Dũni kãngã pʋgẽ neb sẽn ka tar sẽkã, neba ka nong n dɩkd sẽk n karemdẽ ye. Seb-vãadã tagsa wã waooglem seka b na taas koɛɛg sẽn tar yõodo, la b waooglmã ka sek a na maan tɩ neba ka rat n karem-b ye. Mam karma seb-vãadã wʋsgo, n wa baas n bãng sɩdã.” Ra tall-y pa-nandem ne Wẽnnaam Gomdã tõog b sẽn wilg seb-kãensã sẽn yaa koeesã pʋsẽ ye.—Heb. 4:12.
4 Zĩ-longds sẽn yaa nana a naase: Koe-moondb wʋsg tũnuga ne manesem sẽn yaa nana n paam n sɩng sõsse. 1) Wilg-y nedã seb-vãad a wãn n sʋk n ges a sẽn dat a soaba. 2) A soabã sã n yãk a yembr poore, bɩ y maan-a sʋkr y sẽn segl sõma, sẽn gomd n tadgd seb-vãoogã tags-kãseng zugu. 3) Karm-y sull bɩ verse sẽn zems sẽn be seb-vãoogã pʋgẽ n leok sʋkrã. 4) Y sã n paam t’a soaba kelg sõma, bɩ y kẽng taoor n sõs seb-vãoogã tagsa zutu, walla y sõs Baood seb-bilã zãmsg bɩ Bãngr sebrã sak sẽn kõt tagsa a taab zutu. Ne manesem a woto, tõeeme tɩ wa tall n kẽng Biibl zãmsg zĩigẽ. Sagls nins sẽn pʋgdã na n sõng-y lame tɩ y segl bũmb nins y sẽn na n yeel n tũnug ne seb-vãad a naase.
5 Seb-vãoog ning gom-zug sẽn yaa “Ãnd n sɩd so dũniyã?”, b tõe n dɩk-a lame tɩ lebg sʋkre:
◼ Y sẽn gomd ne ned ningã sã n leok tɩ yaa “Wẽnnaam” bɩ a yeel t’“a ka mi,” bɩ y karem pipi goam a yiibã sẽn be seb-vã-neng a 2 wã, la pipi sullã sẽn be seb-vã-neng a 3 pʋgẽ wã. Gom-y n tadg 1 Zã 5:19 la Wilgri 12:9 wã zutu. Sẽn zems ne a soabã sã n maanda sãmb-sãmb ne a Sʋɩtãan Munaafɩɩk belem bɩ a sã n sak n deegame t’a tara pãn-tusdg dũniyã zugu, y tõe n kẽnga taoor ne tagsg ning sẽn be gom-zu-bil ning sẽn yaa “Dũniyã yɛl yẽgre” tẽngrã. Nedã sã n wilg ratem, kãab-y tɩ y na n wilga Munaafɩɩkã sẽn yiẽ, n tũnug ne tagsa sẽn be seb-vãoogã seb-vã-nens a 3 ne a 4 pʋgẽ.
6 Seb-vãoog ning gom-zug sẽn yaa “Quel espoir y a-t-il pour nos chers disparus?” wã tõe n neka ned ratem zĩig pʋgẽ. Y tõe n sʋka woto n sɩng sõasga:
◼ “Yãmb tagsdame tɩ tõnd na n tol n yãa d nin-nongdsã sẽn ki wã yɛs bɩ? Nedã sã n leok poore, bɩ y wilg sull a yiib soabã sẽn be seb-vãoogã seb-vã-neng a 4 pʋgẽ la y karem Zã 5:28, 29. Rẽ poor bɩ y wilg t’a sõngda tõnd tɩ d wʋm tagsa nins sẽn pʋgd seb-vãoogã pipi gom-zu-bilã võore. Yeel-y-yã-a tɩ y rat n sõsa a zug ne-a.
7 Zĩig fãa “Une vie de famille agréable” seb-bilã tara yamleoog ne zagsã. Y sã n tũnug ne-a y tõe n yeelame:
◼ “Tõeeme tɩ y sak tɩ rũndã-rũndã yɛl sẽn sãamd zags n wat zagsã zutu. Bõe la yãmb tagsd tɩ b tõe n maaname n keng zagsã loetse?” Nedã leokr poor bɩ y tak a yamã n sik tagsa wã sẽn be pipi sullã pʋgẽ seb-vã-neng a 6 zugu. Yãk-y verse a yembr verse rãmbã b sẽn togs b goamã seb-vãoogã seb-vã-nens a 4 la a 5 wã pʋgẽ sʋk n wilg a võore. La y kãab-a yirẽ Biibl zãmsg zaalem.
8 B tõe n tũnuga ne “Pourquoi avoir confiance en la Bible” seb-vãoogã wilg-kãngã pʋgẽ:
◼ “Neb wʋsg sẽn yɩɩd wʋma a Kayẽ ne a Abɛll kɩbarã, sẽn be Biiblã pipi sebrã pʋgẽ. Kɩbarã sẽn be Sɩngr sebrã pʋgẽ wã me leb n gomda a Kayẽ pagã yelle. Yãmb zoe n sʋka y meng n gese, yɛ la a ra yit bɩ?” Tũnug-y ne yaoolem sullã sẽn be seb-vãoogã seb-vã-neng a 2 wã pʋgẽ n kõ leoorã. Wilg-y tɩ seb-vãoogã leb n gomda tags-kãsems sẽn tɩ loe ne bũmb ning sẽn wat beoog-daarã yelle, sẽn be Biiblã pʋgẽ. Sɩng-y ne sull a tãab-n-soabã sẽn be seb-vã-neng a 5 wã pʋgẽ n kẽng taoor ne sõasgã, n tũnug ne verse nins sẽn teend tagsa wã.
9 Hal daar zãra b mikame tɩ seb-vãad sẽn tik Biiblã zug pʋɩɩb yaa manesem sẽn womd biis koe-noogã wilgr pʋgẽ. B sẽn tõe n zɩ-b nana n kẽng zĩig fãa wã yĩngã, y tõe n tʋma ne-b sõma-sõma y zak-zak moonegã pʋgẽ, la y sã n wa kõt kaset ne manesem sẽn ka yãk wakate. Seb-vãadã tara tʋʋmd sẽn tar yõod wʋsg tõnd ministɛɛrã pidsg pʋgẽ. Modg-y n zã seb-vãad buud toɛ-toɛya, la y tũnug ne-b sõma n sɩng sõsse.—Kol. 4:17.