D tʋm ne seb-vãadã tɩ wom biis wʋsgo

¹ Tõnd wakatã, a Zeova siglgã minim n tʋmda ne seb-vãadã tɩ womd biis wʋsgo. Sosiete wã yʋʋr meng sẽn yaa Watch Tower Bible and Tract Society (Gũusg Gasgã Biibl la Seb-vãad Lagem-taabã) wilgdame tɩ seb-vãadã tara yõod koe-noogã yelgr pʋgẽ. Sẽn sɩng ne yʋʋmd 1881 n tɩ ta yʋʋmd 1918, a Zeova nin-buiidã sẽn pʋɩ seb-vãad sõor yɩɩda milyõ 300. Wakat kãnga, neb nins sẽn lebg Kirist ba-biisã kellã neb sʋka, wʋsg waa sɩdã pʋgẽ pipi ne seb-vãadã maasem.

² Yʋʋmd 1987 wã, d le yika seb-vãadã pʋɩɩb wʋsgo, b sẽn wa n yiis seb-vãad a naas sẽn maan ne kulɛɛrã, tɩ ket n be rũndã mengã. B ra wilga yʋʋmd 1992 “Vẽenem zãadbã” tigims-gĩn sull tigis-kãsengẽ tɩ seb-vãad a naas sẽn maan ne kulɛɛr la sẽn kɩtd tɩ ned tags la b na n wa ne n paase. Seb-vã-kãens yaa, De l’aide pour les déprimés, Une vie de famille agréable, Ãnd n sɩd so dũniyã?, la Masã dũniyã na n põsame bɩ? Rẽ poore, seb-vãad a taab la b yiis n paase. Seb-vã-kãens yaa: A ZEOVA yaa ãnda?, A ZEZI KIRIST yaa ãnda?; Avez-vous un esprit immortel ?, Aimeriez-vous en savoir plus sur la Bible ? Yãmb tʋmda ne seb-vã-kãensã fãa sẽn na yɩl n wom biis y koe-moonegã wakat bɩ?

³ D sã n tʋmd ne seb-vãadã sõma, rẽ tõe n woma biis sẽn yaa sõma. Yaa tɩlae tɩ tõnd mengã bãng sẽn be seb-vãoog fãa pʋgẽ sõma. Wala makre, yãmb maaga y yĩng n karem seb-vãoog fãa sõma n bãng a sẽn gomd bũmb ning yell bɩ? Yãmb zoe n tagsa seb-vãoog fãa sẽn na n zĩnd yamleoog ne ned ning buud bɩ? Yãmb sã n karem seb-vãoog fãa neere, na n kɩtame tɩ y tall bas-m-yam n paase, n tʋm ne-b zak-zak moonegã wakate, la wakat wʋsg a taab y sẽn tõe n tũnug ne-b n kõ kaset sẽn ka yãk wakate.

⁴ Seb-vãadã rɩk-n-tʋm zak-zak moonegã wakate: Tigims gĩnd yel-gɛt gʋlsa woto: “Mam paamdame n sõsd ne nebã sõma, m sẽn sɩngd m sõssã wʋsg ne seb-vãadã yĩngã.” Yãmb zoe n maka rẽ maaneg bɩ? Bõe yĩng tɩ y ka na n tũnugd ne seb-vãadã n sɩngd sõasg ne neba? Seb-vãadã sõngda tõnd tɩ d tõe n tall sɩngr-goam sẽn tõe n kɩt tɩ neba tʋlg n kelg tõndo. Seb-vãoog fãa tõe n sõnga tõnd tɩ d sɩng Biibl zãmsg pipi kẽngrẽ wã bɩ lebg-n-tɩ-gesã wakate.

⁵ D tõe n tʋma ne seb-vãadã wakat a taab me. Tõeeme tɩ y sã n wa sõsd ne neda, bɩ y bãng t’a soabã nin-nongr n maan kaalem sẽn pa kaoose, bɩ tɩ zakã ned n bẽede. Naoor wʋsgo, neb sẽn paam sũ-sãang kãseng bɩ sẽn maood ne zu-loees sẽn pa sat sɩngd n tara yam-wẽnse, n lebgd yam-ka-m-meng rãmba. Ad sɩd na yɩ nonglem tʋʋmd tɩ d taas nebã koɛɛg ning sẽn kengd pɛlgã sẽn be De l’aide pour les déprimés seb-vãoogã pʋgẽ wã! Tõeeme tɩ y bãng t’a soabã kãadem kaoo sẽn nan pa kaoose, bɩ t’a tʋʋm n sãame. Zu-loees a woto tõe n waa ne sũ-sãamse, hal tɩ rẽ yɩ toog wʋsg n kõ zakã rãmba. Sok-y a soabã sogsg nins sẽn be Une vie de famille agréable seb-vãoogã seb-neng a 2 pʋgẽ wã sẽn yaa: “Bõe yĩng tɩ zu-loe-kãsems wʋsg woto paamd zagsã tõnd wakatã? Wãn to la d tõe n paam zak vɩɩm sẽn tar sũ-noogo?” Tõeeme tɩ yaa sogs-kãensã n be a soabã yamẽ n yɩɩda. Ba a soabã tʋlsem ne sebrã sã n pa yɩ vẽeneg zĩig pʋgẽ, tõeeme t’a na n wa karm-a-la kaoosg zugẽ.—Koɛ. 11:6.

⁶ Tigims kẽer neb tʋmda b moonegã zĩig n yɩlemd naoor wʋsgo, tɩ neb wʋsg zoe n tar tõnd sɛbã. D sã n tʋm ne seb-vãadã, d na n paam n sõsa ne-b bũmb sẽn pak-b zugu, n paam tɩ b togs b sẽn tagsde, la d kɩt tɩ b tags Rĩungã saagr zugu. Maan-y-b sokre, n lebg n wa sõs ne-b nindaar sokrã zugu. Lebg-y n tɩ ges a soabã, n gʋʋl ratem kãng a sẽn wilg ne sɩdã. D wat n tõog n sɩnga zãmsg ne-b ne seb-bil bɩ ne sebr b sẽn zoe n tarẽ.

⁷ Tʋm-y ne seb-vãadã wakat fãa: Tõnd sã n ning seb-vãadã yambẽ wala d gɩfẽ bɩ d kor-bilẽ, d tõe n tʋma ne-b wakat fãa zĩig ning d sẽn yãẽ neba. Tʋm-y ne-ba, y sã n wa kẽng teed raabo, y sã n wa togd sore, bɩ y sã n wa sõsd ne y roagdb bɩ ne sãamba. Seb-vãadã kõta tõnd sor tɩ d tõe n paam n kõ kasetã koɛɛg-koɛɛga. Seb-vãoog kareng ka rɩkd sẽk wʋsg ye, a leb n tara tagsa takɩ b sẽn togs ne yam. Rẽ n so tɩ ned tõe n sak seb-vãoog nana-nana n yɩɩd sebr bɩ zʋrno rãmba.

⁸ Gũusd-y n tũnugd ne soay y sẽn paam fãa n kãab seb-vãadã ne manesem sẽn ka yãk wakat lekollẽ bɩ tʋʋm zĩigẽ, rɩɩbã koosg rotẽ, esãens ɛstasiõ rãmbẽ la zĩis a taaba. Saam-bi-poak sẽn da wa n segend n na n tall a yaab-poak n kẽng n tɩ yã logtore, a modgame n zɩ seb-vãado. Logtor yirã, a sɩnga sõasg ne pag sẽn tʋta. A wilga pagã Laafɩ Vɩɩm Dũni Paalg Pʋgẽ seb-vãoogã, la a sok-a: “Yãmb nongẽ lame n wub y biigã dũni ning buud b sẽn bilg ka wã pʋgẽ bɩ?” Sõs-kãngã poore, a lebg n tɩ gesa pagã a yiri. Rẽ sõng-a lame t’a maan lebg-n-ges rãmb naoor wʋsgo.

⁹ Y tõe n dɩka seb-vãadã n sɩng Biibl zãmsg ne neba: Tigims gĩnd yel-gɛt a yembr n yeel tɩ yẽ kaagrã semenne, tigingã neb tõog n sɩnga yirẽ Biibl zãmsg 64 ne neba, b sẽn tũnug ne seb-vãoog n sɩng sõasg ne nebã, b sẽn pʋʋs-b n sa poor bala.

¹⁰ Rẽ yĩnga yãmb zak-zak moonegã wakate, yãmb kãabda neb nins yãmb sẽn segd pipi wã Biiblã zãmsg bɩ? Y tõe n tũnuga ne seb-vãoog n wilg a soabã Biibl zãmsg sẽn maand to-to koɛɛg-koɛɛga. Saam-bi-poak a ye tũnuga ne Laafɩ Vɩɩm Dũni Paalg Pʋgẽ seb-vãoogã n maan dẽ. A wilga a sõsd-n-taagã yimaasã n sok-a n ges a tagsda tõnd tẽngã sã n na n lebga woto raar a yembre. Nedã leokr poore, saam-bi-poakã kos-a lame t’a karem 2 Pɩɛɛr 3:13 la Ezai 65:17, b sẽn wilg seb-vãoogã pʋgẽ wã. Tõnd saam-bi-poakã yeelame: “Kãab-kãensã ka belgr ye, yita Biiblã sẽn yaa Wẽnnaam Gomdã pʋgẽ.” Rẽ poore, a seglame n na n lebg n wa kẽng taoor ne sõasgã semen ning sẽn pʋgdã. A sẽn lebg n kẽng pagã nengẽ wã, a leoka a sogsg wʋsg la a bas sebr ne-a. Rẽ wa n baasa ne Biibl zãmsgo.

¹¹ Yãmb yaa ned sẽn deeg lisg paalem bɩ, bɩ y yaa koe-moond sẽn pa reeg lisg sẽn baood n na n paam minim koe-moonegã pʋgẽ? Sã n yaa woto, tõe tɩ y na n tʋlgame n kos neb nins sẽn tar minim n yɩɩd tigingã pʋgẽ wã tɩ b sagl-y tɩ y bãng y sẽn na n kãab seb-vãadã to-to yãmb tigingã mooneg zĩigẽ. Tõnd tara makr toɛy-toɛy Biiblã pʋgẽ, sẽn wilgd neb sẽn paam sagls la sor-wilgr sẽn bɩ-b tẽebã pʋgẽ wã nengẽ.—Tʋʋ. 18:24-27; 1 Kor. 4:17.

¹² Sẽn yɩɩd fãa, Tigingã sebr zãmsg yel-gɛt tõe n sõngame n bao neb a taab tɩ b sõng-y tɩ y bãng y sẽn na n tʋm ne seb-vãadã to-to. Yaa roagdbã n segd n sõng b kambã tɩ b bãng moonegã tʋʋmd sõma n paase. Kaset soab sẽn yaa biig paamame t’a roagdbã zãms-a Laafɩ Vɩɩm Dũni Paalg Pʋgẽ seb-vãoogã kãabgo. Biigã ma ra peeg-a lame n kẽng n na n tɩ zãms Biiblã ne paga. Zãmsgã wakate, biigã kãaba pagã sɩd seb-vãoogo. Linga rao wã a sẽn yã tɩ biig tõe n talla tẽeb sẽn tar pãng wʋsg woto wã. Rao wã karma seb-vãoogã hal tɩ yɩ-a noog wʋsgo. Bipuglã sã n da leb nedã zakẽ ne a ma wã fãa, a karemda rao wã Biiblã verse bɩ kɩbar a sẽn dag n segl a yĩnga. Masã, ra-kãng karemda tõnd zʋrno rãmbã n ka vaandẽ ye, n wilg a raab ne Révélation : dénouement sebrã, la a wa tigiss kẽere. Yaa roagdbã sẽn dɩk sẽk n maan b tʋʋmd n zãms b bipuglã t’a bãng n tʋm ne seb-vãadã sõma wã n wa ne bi-sõma woto.

¹³ Tʋm-y ne tõnd seb-vãadã fãa sõma: Y sã n wa kãabd Masã dũniyã na n põsame bɩ? wã seb-vãoogo, y tõe n wilga a soabã y sẽn yaa ned ning la y sɩng sõasgã woto: “Ne y yibeoogo. Tõnd sõsda ne nebã vɩɩmã sẽn yaa to-to wã zugu. Yãmb tagsdame tɩ vɩɩmã na n lebga noog n paas bɩ, bɩ a na n ket n sãamdame? [Bas-y t’a soabã leoke.] Neb kẽer tagsdame tɩ bũmb ning sẽn maand dũniyã zug rũndã-rũndã wã pidsda Biiblã bãngr-gomde, la tɩ dũniyã saab kolgame. Yãmb yẽ tagsda bõe?” Nedã leokr poore, bɩ y kãab seb-vãoogã la y wilg a soabã sogsg a tãabã sẽn be sull a yiib-n-soabã pʋgẽ wã. Rẽ poor bɩ y kell n tũ seb-vãoogã sẽn wɛgs yɛlã to-to wã n wilg dũni sẽn sa to-to pĩnda, la tɩ masã dũniyã me na n saame. Sõasgã baasgẽ bɩ y bao raar n lebg n wa wilg-a kaset ning sẽn be Biiblã pʋgẽ n wilgdẽ tɩ dũniyã saab kolgame wã.

¹⁴ Naoor wʋsgo, d mikame tɩ d tõe n taasa neb a taabã Rĩungã koe-noog koɛɛg-koɛɛg bala, wala tʋʋm zĩigẽ bɩ lekollẽ. Tʋʋma zĩigẽ, neba tõe n sõsda kɩbay kɩba-kɩtbã sẽn yiis paalem sẽn tɩ loe ne goosneemã wã zugu. Y tõe n sakame tɩ baa taoor dãmb sẽn dat n maan sẽn yaa neerã sẽn maan modgr ning fãa wã, dũniyã neb namsa wʋsg ãdem-biisã sẽn be tẽng zug tɛka. Rẽ poor bɩ y wilg a soabã Ãnd n sɩd so dũniyã? seb-vãoog seb-neng a 2 tẽngr sullã. Karm-y sogsg a tãabã sẽn kɩtd tɩ ned tagsã. Sẽk sã n kae tɩ y tõe n sõs a zug koɛɛg-koɛɛga, bɩ y kɩs a soabã seb-vãoogã la y maan segls n lebg n wa leok sogsgã wakat a to bɩ zĩig a to.

¹⁵ Yãmb mengã la y zaka rãmba, bao-y sẽk n tags y sẽn na n maan to-to n kãab nebã seb-vã-kãensã toɛy-toɛyã fãa. Mak-y seb-vãadã sẽn kãabd to-to wã yir n minim. Wãn to la y tõe n naag seb-vãadã ne sɛb a taabã b sẽn segd n kãab nebã koe-moonegã sasa kiuugã pʋgẽ wã? Zĩis n be y sẽn segd n kẽnge, n tõe n kell n tall seb-vãad a wãn n kẽng be bɩ? Ned la y na n seg semen kãngã tɩ koees sẽn zems ne tõnd wakatã seb-vã-kãensã sẽn tarã tõe n naf-a bɩ?

¹⁶ Tõnd sẽn nong a Zeova wʋsg tɩ nebã yell me pak-dã yĩnga, d na n maana d sẽn na maan n taas neba koe-noogã. D sã n tʋm ne seb-vãadã wakat fãa, na n sõng-d lame tɩ d maan dẽ. Yʋʋm a yopoe biribl n da rat t’a yak kẽ dũni paalgã pʋgẽ, dẽ a kõ-a-la seb-vãoogo tɩ Biibl zãmsg sɩnge. Ka yɩɩd woto! Rẽ yĩnga, yãmb nonga koe-noogã taasg nana-nana woto bɩ? Nindaare y sã n bas seb-vãoog ne neda, tõe tɩ wa baas ne Biibl zãmsgo. Tõnd sã n tʋmd ne seb-vãadã Rĩungã koe-noog mooneg pʋgẽ ne yam, yaa vẽeneg tɩ d na n yãa rẽ nafa.