Seb-vãad sẽn pa wõnd b taaba!

1. Seb-vã-paal a wãn la d paam koe-moonegã yĩng tɩ b pa wõnd b taaba?

¹ Yʋʋmd 2013 rasem a tãab tigis-kãsengã gom-zug sẽn yɩ “Wẽnnaam goamã yaa sɩda!” sasa, d paama seb-vã-paal a nu. Sẽn paase, d paama Rĩungã kibay N^o 38 soabã gom-zug sẽn yaa “Sẽn ki-bã tõe n sɩd vʋʋgame bɩ?” wã. Yẽ me yaa seb-vãoogo. Seb-vã-kãensã b yoobã fãa sẽn yaa to-to wã pa wõnd b taab ye. La bõe yĩng tɩ b yaa toore? D sã n wa pʋɩt-b zak-zaka, wãn to la d tõe n tik b sẽn wɛgs seb-vãoog fãa sõsg to-to wã n moon koɛɛgã tɩ wom biisi?

2. B yiisa seb-vã-paalã bõe yĩnga?

² B sẽn yaa toorã võore: Zak-zak moonegã sasa, d sã n dat n kãab ned sɛbã tɩ yɩ sõma, bũmb a naas n yaa tɩlae: 1) D sokda sokr tɩ kɛlgdã togs a tagsgo. 2) D karemda vɛrse. 3) D kõta kɛlgdã sebr t’a karme. 4) D sokda sokr la d rɩk sɛk n lebg n wa leoke. Seb-vã-paalã na n sõng-d lame tɩ d tõog n maan bõn-kãensã b naasã.

3. Wãn-wãn la d tõe n kãab ned seb-vã-paalã koe-moonegã sasa?

³ D sẽn na n tall-b n moon koɛɛgã to-to: 1) Y sã n pʋʋs kɛlgdã n sa, bɩ y sok-a sogsgã sẽn be seb-vãoogã pipi nengã, la y bas t’a leoke. 2) Lak-y seb-vãoogã tɩ y ges “Biiblã sẽn yete.” Sã n tõe bɩ y karem vɛrse wã Biiblã pʋgẽ. Kɛlgdã sã n tar sẽk bɩ y sõs “Rẽ sẽn tõe n naf-y to-to” wã zugu. 3) Kõ-y-yã-a seb-vãoogã la y yeel-a t’a yõd n karem sẽn ketã. 4) Nand tɩ y looge, zĩig a ye la b gʋls tɩ “Ad sokre.” Wilg-y-yã-a sokrã la y rɩk sɛk n lebg n wa sõs ne-a, t’a bãng Biiblã sẽn leokd sokrã to-to.

4. D sã n lebg n na n tɩ kaag neda, wãn to la d tõe n tik seb-vã-paalã n sõng-a?

⁴ Y sã n lebg n na n tɩ kaag ned me, yaa nana. Tik-y vɛrse-rãmbã sẽn be yaoolem nengã n leok sokr ning y sẽn da sokã. Nand tɩ y loog bɩ y wilg-a Koe-noogã sebr foto sẽn be be wã, n yiis sebrã n wilg-a sõsg ning sẽn tõe n sõng-a t’a paam kibay n paasã, la y yeel-a t’a sã n dat sebrã, a tõe n paamame. A sã n deeg sebrã bɩ y rɩk sɛk n lebg n tɩ kaag-a. Yaa Biibl zãmsg la y sẽn sɩngã. Y leb n tõe n basame n pa wilg-a sebrã, la y kõ-a seb-vãoog a to, n dɩk sɛk n lebg n tɩ kaag-a.

5. Seb-vãadã yõod yaa bõe koe-moonegã pʋgẽ?

⁵ Yaa hal sẽn yɩɩd yʋʋm 130 la tõnd moond koɛɛgã ne seb-vãadã. Baa d sẽn mi n toeemd-bã, b sõngd-d-la koe-moonegã pʋgẽ wʋsgo. Woto yĩnga, bɩ d tall d seb-vã-paalã n ket n moond Biiblã koɛɛg sẽn kõt yamã dũniyã gill zugu.—Yel. 15:7a.