Wãn to la y tõe n tall seb-vãadã n sɩng sõsg ne nebã?

Sẽn sɩng ne yʋʋmd 2018 yʋʋm-vẽkr kiuugã, Kiris-nebã vɩɩm la b tʋʋma tigissã na-kẽndr sebrã pipi nengã zugu, b ningda sõsg tɩʋʋsgo. B sagenda tõnd tɩ d bao n sõs ne nebã n tɩ yɩɩda, la tɩ d ra kãabd sɛbã woto bal ye. Sẽn na yɩl n sõng koe-moondbã, sõsg tɩʋʋsgã video-rãmbã wilgda b sẽn tõe n tall Biiblã bal n sɩng sõsg ne ned to-to. La rẽ yĩnga, rat n yeelame tɩ d sã n moond zak-zakã, d pa tog n kãab sebr bɩ? Ayo! Wala makre, d tõe n talla seb-vãoog n sɩng sõsg ne neda. Sẽn yaa seb-vãoog ning fãa la y rat n tall n sõs ne neda, ad sagls y sẽn tõe n tũ:

1. Sok-y sogsgã sẽn be pipi nengã zugã.

2. Wilg-y Biiblã leoorã sẽn be seb-neng a yiibẽ wã. Sẽk sã n beẽ, bɩ y sõs bũmb a taab sẽn be seb-vãoogã pʋgẽ wã zugu.

3. Kõ-y kɛlgdã seb-vãoogã, la y yeel-a t’a bao sẽk n karem sẽn ketã.

4. Nand tɩ y looge, wilg-y-yã-a sokr ning sẽn be zĩig ning b sẽn gʋls tɩ “Ad sokre,” la y bao n lebg n wa nindaar n wa sõs Biiblã sẽn yetã zugu.

Y sã n lebg n kẽnge, bɩ y sõs Biiblã sẽn yetã zugu, la y sok sokr a to y sẽn na n wa leok nindaare. Y tõe n soka sokr sẽn be tõnd sɩtã pʋgẽ, wall sokr sẽn be sebr ning b sẽn wilg seb-vãoogã yaoolem nengã zugã. Y sã n wa ges tɩ zemsame, bɩ y kãab-a Koe-noog sẽn yit Wẽnnaam nengẽ! sebrã, wall sebr a to d sẽn tar n zãmsd nebã Biiblã, tɩ naag tõnd Koe-moonegã tʋʋm-teedã pʋgẽ.