Bũmb nins sẽn be tõnd sɩtã pʋgẽ tɩ d tõe n kelgã: D sẽn tõe n dɩ b nafa to-to

1. Tõnd sɛbã toor sẽn kae, bõe me la d tar tɩ tõe n sõng-do?

¹ Ne tõnd sɩtã maasem, neb wʋsg paamd n karemda gom-noodo, la goam sẽn yaa sɩda, tɩ b sũy noome. (Koɛ. 12:10) La rẽ yĩnga yãmb zoe n talla bũmb nins sẽn be tõnd sɩtã pʋgẽ tɩ d tõe n kelgã n tʋm bɩ? Bõn-kãens tõe n sõng-y lame tɩ y kelg kibay wʋsg tõnd sɩtã pʋgẽ. Wãn to la b tõe n naf-do?

2. Wãn to la sɛb nins b sẽn karmã tõe n naf tõnd ne d zagsã rãmbã?

² Tõnd ne d zakã rãmb sõngr yĩnga: D sã n wa togd sor wall d tʋmd d raasenkam tʋʋmã la d kelgd Biiblã b sẽn karme, pa rẽ bɩ periodik-rãmbã wall sebr a to b sẽn karme, na n sõng-d lame tɩ d ra sãam d sẽkã ye. (Efɛ. 5:15, 16) Tõnd zak pʋgẽ Biibl zãmsgã sasa me, d tõe n mi n kelga sebr b sẽn karme, la d get sebrã pʋgẽ n tũud karengã. D sã n dat n bɩɩs d karengã, wall d sã n zãmsda buud-gomde, d meng Biibl zãmsgã sasa, d sã n kelgd sɛb toor-toorã b sẽn karem tɩ be sɩtã pʋgẽ wã, na n sõng-d-la wʋsgo.

3. Ãnd dãmb n be tõnd moonegã zĩisẽ tɩ sɛbã b sẽn karmã tõe n naf-ba?

³ Koɛɛgã mooneg yĩnga: Tõnd koe-moonegã zĩigẽ neb nins sẽn yet tɩ b pa tar sẽk n karemd sɛbã, tõe n sak n kelga sɛbã b sẽn karem tɩ be sɩtã pʋgẽ wã. D tõeeme me n seg neb sẽn gomd buud-gom-zẽnga, tɩ b sã n wʋm koɛɛgã ne b ‘mens goam b sẽn dog ne-a wã,’ bɩ b na n maneg n kelge. (Tʋʋ. 2:6-8) Buud kẽer pʋsẽ, kelgr tara yõod wʋsgo. Wala makre, Hmong buudã pʋgẽ, b togsda b kambã kʋdemdã yɛl tɩ b kelgd sõma tɩ paad b yamẽ. Afirik tẽnsã wʋsg pʋgẽ me, wae n yaa woto.

4. D sã n dat n sõng ned tõnd moonegã zĩigẽ, sogs-bʋs la d segd n sok d mense?

⁴ Rẽ yĩnga, koɛɛgã mooneg sasa, d sã n ning bũmb toor-toorã b sẽn karem tɩ be tõnd sɩtã pʋgẽ wã tɩ ned kelg a meng buud-gomd pʋgẽ, na n naf-a lame bɩ? D sã n tall ẽntɛrnetã n tool ned sebr b sẽn karme, na n naf-a lame bɩ? Rẽ yĩnga ned sã n dat n wʋm koɛɛgã n paase, d tõe n telesarza sebr b sẽn karem n ning CD zug n kõ-a, la d kõ-a sebr ning b sẽn karmã me bɩ? D sã n kõ ned sebr b sẽn karme, pa rẽ bɩ borsiire, periodik wall seb-vãoog b sẽn karme, yaa wa d sẽn kõ ned sebre. B yiisa sɛbã b sẽn karmã n na n sõng tõnd mengã d Biibl zãmsgã sasa, la d sõng nebã tɩ b bãng sɩdã.—1 Kor. 3:6.