D paas d koe-moonegã minim: D sõng karen-biigã t’a wa rɩk a meng n kõ wẽnnaam, n deeg lisgu

SAGLGÃ YÕODO: Biibl karen-biig sã n dat n ta a Zeova yam, a tog n dɩka a meng n kõ-a, n deeg lisgu. (1 Pɩy. 3:21) A Zeova sõngda neb nins sẽn sakd a noyã, tɩ b tar zood sõma ne-a. (Yɩɩn. 91:1, 2) Yaa a Zeova la kiris-ned rɩkd a meng n kõ, pa ninsaal bɩ siglg ye. Rẽ n so tɩ Biibl karen-biig tog n modg t’a sẽn nong Wẽnnaam to-to wã paasdẽ.—Rom. 14:7, 8.

AD Y SẼN TÕE N MAAN DẼ TO-TO:

• Y sã n wa zãmsd bũmbu, naag-y taab n sõs rẽ sẽn wilgd a Zeova zugu. Wilg-y-yã-a tɩ tara yõod t’a karemd Biiblã daar fãa, la a pʋʋsd a Zeova wakat fãa “n da bas ye.”—1 Tes. 5:17; Zak 4:8.

• Sõng-y y Biibl karen-biigã t’a yãk yam n wa rɩk a meng n kõ a Zeova n deeg lisgu. Sõng-y-yã-a me t’a yãk a sẽn tõe n maan nananda. Wala makre, n kõt leoor tigissã sasa, wall n taas koɛɛgã a yags bɩ a tʋmd-n-taase. Da yĩm-y t’a Zeova pa modgd ned baa a ye t’a maan a raabã ye. Yaa ned fãa n yãkd a sã n na n dɩka a meng n kõ a Zeova.—Tõo. 30:19, 20.

• Kɩt-y tɩ y Biibl karen-biigã rat n toeem bũmb kẽer a vɩɩmã pʋgẽ n paam n ta a Zeova yam, n wa tõog n deeg lisgu. (Yel. 27:11) Sã n mik tɩ yɩl n bas minim wall zʋg kẽer pa nana ne-a, y tog n kell n sõng-a lame t’a tõog n bas nin-kʋdgã n yeelg nin-paalgã. (Efɛ. 4:22-24) Gũusg Gasgã sõss nins gom-zut sẽn yet tɩ “Biiblã toeemda neda” tõe n sõng-a lame.

• Togs-y-yã-a sũ-noog ning yãmb sẽn paamde, y sẽn tũud a Zeova wã.—Eza. 48:17, 18.