D sẽn tõe n wilg to-to tɩ d nonga d taabã

D fãa sẽn yaa d yaab a Ãdem yagensã, d yaa zak a ye neba. Segdame tɩ zak rãmb nong taaba. La rũndã-rũndã, yɩl n yã zak rãmb sẽn sɩd nong taab yaa toogo. Yaool n pa woto la Wẽnnaam sẽn nong-dã da rat ye.

WẼNNAAM SEBRÃ SẼN YET NONGLMÃ WƐƐNGẼ

“Nong f to wa f menga.”—MAAN-KƲƲRE 19:18.

“Nong-y y bɛɛbã.”—MATIYE 5:44.

NONG F TO SẼN DAT N YƐƐLGA

Ges-y Wẽnnaam sẽn gomd nonglmã yell to-to a Gomdã pʋgẽ tɩ be 1 Korẽnt rãmb 13:4-7:

“Nonglem maanda sũ-mare, la a maand neere.”

Tags-y n ges-y: Ned sã n tar sũ-mar ne-yã, n maand-y neere, tɩ y sã n beeg-a me bɩ a pa yikd a sũur ne-yã, y manesem na n yɩɩ wãna?

“Nonglem pa maand sũ-kiir ye.”

Tags-y n ges-y: Ned sã n gũusd a meng ne-yã, bɩ n maand sũ-kĩir ne-yã, y manesem na n yɩɩ wãna?

Nonglem “pa baood a meng nafr ye.”

Tags-y n ges-y: Ned sã n sakd n kelgd yãmba, la a pa baood tɩ yẽ sẽn yeel fãa n be, y manesem na n yɩɩ wãna?

Nonglem “pa bĩngd wẽng b sẽn maan-a a sũurẽ ye.”

Tags-y n ges-y: Ned sã n beeg Wẽnnaam n wa tek yam n kos sugri, Wẽnnaam sakd n kõ-a-la sugri. “Bãmb ka zabd ne ned n zãage, la b ka yikd b sũur n ka basdẽ ye.” (Yɩɩn-sõamyã 103:9) Ned d sẽn beeg sã n sak n kõ-d sugri, d sũur yɩta noog wʋsgo. Rẽ wã, ned sã n beeg-do, d segd n sak n kõ-a-la sugri.—Yɩɩn-sõamyã 86:5.

Nonglem “pa kɩdemd sũ-noog ne bũmb sẽn pa tɩrg ye.”

Tags-y n ges-y: Yell sã n paam-do, d pa rat tɩ neb a taabã kɩdemd sũ-noog rẽ yĩng ye. Rẽ n so tɩ d pa rat n kɩdem sũ-noogo, yell sã n paam neda, baa sã n mikame t’a soabã ra beega tõndo.

D sã n dat n paamd Wẽnnaam barkã, d segd n nonga d taabã woto n pa bakd ned ye. Bũmb d sẽn tõe n maan n wilg rẽ vẽenega, yaa d sẽn na n sõngd neb nins sẽn dat sõngrã.