‘Tẽn-gãongã bõn-koaadl na n womame. Tõnd Wẽnnaamã na n ninga tõnd barka.’ —YƖƖN-SÕAMYÃ 67:7.

Y tõe n paama d Naandã barkã wakat fãa yĩnga

Wẽnnaam ra pʋlma no-rɛɛs a Abrahaam t’a yageng a ye maasem yĩnga, “dũniyã nebã buud fãa” na n paama barka. (Sɩngre 22:18) Yagen-kãng yɩɩ ãnda?

Sẽn kolg yʋʋm 2 000 la woto, Wẽnnaam kõo a Zeezi sẽn yaa a Abrahaam yagengã tõog t’a maan yel-solem-kãsemse. Yel-solem-kãensã wilgame tɩ na n tũu ne a Zeezi, tɩ dũniyã nebã buud fãa paam bark nins Wẽnnaam sẽn pʋlem a Abrahaamã.—Galat rãmbã 3:14.

Yel-soalmã a Zeezi sẽn maanã kɩtame tɩ nebã bãng tɩ yaa ne yẽ maasem la ãdem-biisã na n paam Wẽnnaam barkã. Leb n wilgda Wẽnnaam sẽn na n tũnug ne-a to-to tɩ ãdem-biisã paam bark wakat fãa yĩnga. A Zeezi yel-soalmã sõngda tõnd tɩ d bãng a zʋg-sõma wã. D gom kẽer yelle.

A sũ-bʋgsmã: A Zeezi sãooga bãad-dãmba.

Daar a ye, wãoor n kos a Zeezi t’a sãoog-a. A Zeezi sɩɩs-a lame n yeele: “M datame.” Zĩig pʋgẽ, wãoodã menema rao wã yĩngẽ wã.—Mark 1:40-42.

A yaa kõata: A Zeezi rɩlga neb kom sẽn da tare.

A Zeezi ra pa rat tɩ kom yõk nebã ye. A maana yel-solemd tɩ bur a wãn ne zĩm bõoneg a wãn lebg wʋsgo, hal t’a rɩlg neb tusa. Pa yɩ vugr bal la a maan woto ye. (Matiye 14:17-21; 15:32-38) Nebã fãa rɩɩme n tɩge, hal tɩ rɩɩbã kell wʋsgo.

A nimbãan-zoeerã: A Zeezi vʋʋga neb sẽn da ki.

Nimbãan-zoeer yĩnga, a Zeezi vʋʋga pʋg-kõor bi-ribl-yend sẽn da ki. Pagã ra pa le tar ned sẽn na n ges a yell ye.—Luk 7:12-15.

BARK SẼN NA N ZĨND DŨNIYÃ GILL ZUG WAKAT FÃA YĨNGA

A Zeezi zoe n wilga vẽeneg tɩ Wẽnnaam tara tõog n tõe n kɩt tɩ ãdem-biisã paam barka. Ka la bilfu, a Zeezi sã n wa lebg n wa wa a sẽn pʋlmã, Wẽnnaam Sẽn-tõe-a-fãa wã na n tũnuga ne-a n maan yel-soalem kãsems dũniyã gill zugu.

Wẽnnaam sã n wa pids a sẽn pʋlem a Abrahaam bũmb ningã, vɩɩmã na n lebga wãn tẽngã zugu? Neb nins fãa sẽn nong Wẽnnaam la b waoogd-a wã “n na n soog tẽngã, la b na n paama vɩ-bãane, ne sũ-noog meng-menga.” (Yɩɩn-sõamyã 37:11) “Kũum pa na n le zĩndi, sũ-sãanga, yãbr wall toog pa na n le zĩnd ye.”—Vẽnegre 21:4.

D sã n wa vɩ ne laafɩ wakat sẽn kõn sa tẽngã zugu, na n yɩɩ sũ-noog meng-menga! D kot-y lame tɩ y bao n bãng Wẽnnaam naamã sẽn na n wa ne bark nins tẽngã zug ka la bilfã n paase. Rẽ wã, kẽ-y www.jw.org pʋgẽ.