Neb mak-sõng maasem yĩnga, mam paama bark ka tɛka!

Mam doga Kebɛk na-tẽngã pʋgẽ. Yaa Kanada soolmã babg b sẽn gomd farende. M baaba yʋʋr la a Louis, tɩ m ma yʋʋr la a Zélia. B ra nonga maam, n get m yell sõma. M baaba ra yaa ned sẽn pa nong goama, la a ra nonga sɛb karengo. Mam da nonga sɛb gʋlsgo, n da saagdẽ tɩ m na n wa yɩɩ kiba-kɩta.

Mam sẽn wa n zems yʋʋm 12 woto, m baaba tʋmd-n-taag a Rodolphe Soucy ne a zoa n wa tõnd zakẽ wã n na n sõs ne-do. B ra yaa a Zeova Kaset rãmba. M da pa mi bũmb wʋsg a Zeova Kaset rãmbã zugu, b tũudmã yell me ra pa pak-m woto ye. La b sẽn tall Biiblã n leok d sogsgã ne bʋgsem, tɩ yaa vẽenegã ra noom-m-la wʋsgo. Yɩɩ m roagdbã me noogo. Rẽ n so tɩ d sak tɩ b na n wat n zãmsd-d Biiblã.

Wakat kãng tɩ m sẽn da be lekoll ningã yaa katolik-rãmbã n so. M da mi n dɩka bũmb nins m sẽn bãng Biiblã zãmsg sasa wã n taasd m karen-bi-taasã. Tarẽ-n-tarẽ, karen-saam-dãmbã sẽn da yaa prɛtr-dãmbã wa n bãngame. B pa bao n na n tall Biiblã n wilg tɩ m sẽn yetã pa sɩd ye. A ye meng n pʋd n dõd maam karen-biisã fãa taoor tɩ m yaa kɩɩsda! Yellã sãama m sũur yaa sɩda, la baasa neere. Bala, sõnga maam tɩ m bãng tɩ b sẽn da zãmsd nebã bũmb nins tũudmã wɛɛngẽ wã pa zems ne Biiblã sẽn yetã ye. M bãngame tɩ pa m zĩig la be ye. M roagdbã sakame n toeem maam lekolle.

SẼN YƖ TO-TO TƖ M WA NONG KOƐƐGÃ MOONEGO

M da ket n wɩngda ne Biiblã zãmsgo, la m tẽebã bɩʋʋng ra yaa maasga, bala, zak-zak moonegã ra kẽesd-m-la rabeem. Katolikã tũudmã rãmb ra tara pãng wʋsgo, n da gɩdg d koe-moonegã. A Maurice Duplessis sẽn da yaa Kebɛk permiye ministrã ra yaa katolikã taoor dãmbã zoa. A pirsa neb tɩ b bugs a Zeova Kaset rãmbã, la b pʋd n nams kẽere. Wakat kãngã, f sã n pa tar raood meng-menga, f pa moond koɛɛgã ye.

Saam-biig a ye sẽn sõng-m tɩ m tõog m rabeemã yaa a John Rae. A ra paam n kẽnga Gileyaad lekoll a 9 soabã. A John ra tara minim hal sõma, la a ra yaa nin-bʋgsgo, sik-m-meng soaba, la ned pẽnegr sẽn yaa nana. A ra pa wae n sagend-m woto, la ne a mak-sõngã maasem, m bãnga bũmb wʋsgo. A ra pa gomd farendã sõma ye. Rẽ n so tɩ m da nong n yãagd-a tɩ d moond koɛɛgã, n sõngd-a farendã goamã wɛɛngẽ. D sẽn da nong n tũud taabã sõnga maam, tɩ m wa paam raood n yãk yam n na n dɩk m meng n kõ a Zeova. Yʋʋm piig mam sẽn seg a Zeova Kaset rãmbã poor la m yaool n na n deeg lisgu. Yɩɩ yʋʋmd 1951 sig-noy kiuug rasem 26.

Tõnd tigingã neb ra pa waooge, la b fãa la bal ra yaa so-pakdba. B mak-sõngã kɩtame tɩ ma-me sɩng so-pakrã. Wakat kãngã, yaa Biiblã bal la d ra tar n moond zak-zaka. Sɛb a taab sẽn da kae wã, ra yaa tɩlɛ tɩ d bãng n tall Biiblã n taas koɛɛgã sõma. Rẽ n so tɩ m da modgd n na n bãng m sẽn tõe n tũnug ne vɛrse-rãmbã to-to n gom n teel d sẽn tẽed bũmb ninsã. La neb wʋsg ra pa sakd n karem Biibl sẽn pa katolik-rãmbã meng n yiisi, wall b sẽn kõ sor tɩ b karem ye.

Yʋʋmd 1952, m kẽe kãadem ne d tigingã saam-bi-poak sẽn maand sɩd ne a Zeova. A yʋʋr la a Simone Patry. D yik n kẽnga Moreyalle. Pa yã n ta yʋʋmde, la d paam bi-pugla. A yʋʋr la a Lise. Yaa sɩd tɩ d kãadmã daar sẽn wa n kolgdẽ wã, m basa so-pakrã. La maam ne a Simone ra maanda d sẽn tõe fãa, n pa baood bõn-bɛd d vɩɩmã pʋgẽ, sẽn na yɩl tɩ d zakã neb tõogd n kẽesd b meng zãng tũudmã yɛl pʋgẽ.

Yʋʋm piig poor la m wa n le tagsd m sẽn tõe n maan n paas m koe-moonegã. Yʋʋmd 1962, m kẽnga Rĩungã tʋʋmd lekoll kãsem-dãmbã yĩngã sẽn da kaoosd kiuugã, Kanada Betɛllẽ wã. Maam ne saam-biig yʋʋr sẽn boond t’a Camille Ouellette n da gõe ro-yɛnga. A Camille sẽn da tar yẽesem to-to koɛɛgã mooneg pʋgẽ wã yɩ-m-la noogo! Sẽn yɩɩd fãa, m sẽn bãng t’a tara pag la kambã. Wakat kãngã tɩ Kebɛk tẽngã, roagd sẽn yaa so-pakda, n yaool n ket n tar kamb sẽn nan yaa bõoneg ra pa wae ye. La rẽ la a Camille ra magd n na n maane. Sasa kãng d sẽn zĩnd ne taabã, a yeela maam tɩ m tags n ges ma-me sã n pa tõe. Kiis a wãn poor bala, m sɩd mikame tɩ m tõe n le yɩɩ wakat fãa so-pakda. Neb kẽer da yetame tɩ sã n yaa ne bãmb tagsgo, m yam-yãkrã pa sõma ye. La m kell n nanga pãnga, n da kɩs sɩd tɩ m sẽn modgd n na n paas m koe-moonegã, a Zeova na n ninga m modgrã barka.

D LEBA KEBƐKE, N DA YAA ZALL SO-PAKDBA

Yʋʋmd 1964, b kɩtame tɩ maam ne a Simone lebg zall so-pakdba, n tɩ zĩnd Kebɛk sẽn yaa d meng tẽngẽ wã. D moona koɛɛgã be n maan yʋʋm a wãna. Wakat kãng tɩ koe-moonegã ra pa le yaa toog woto, la neb n da ket n namsd tõnd d tũudmã yĩnga.

Sibr a yembr zaabre, polɩɩs n yõk maam Sẽntmaari sẽn yaa tẽn-bil sẽn pa zãr ne Kebɛk na-tẽngã. A talla maam n kẽng polɩɩs-rãmbã zakẽ, n tɩ kẽes-m roogo, bala, m da moonda koɛɛgã zak-zaka, n yaool n pa tar sebr sẽn kõt-m sor ye. B wa n talla maam n kẽng bʋ-kaood yʋʋr sẽn boond t’a Baillargeon taoore. Ra yaa rao tɛkẽ! A soka maam tɩ yaa ãnd n na n yɩ mam avoka. M leokame t’a Glen How.a Ra yaa a Zeova Kaset rãmbã avoka nebã sẽn mi sõma. A sẽn wʋm yʋʋrã bala, rabeem yõk-a lame t’a yeel yaa: “Wo! Sã n yaa yẽ waa!” Wakat kãngã tɩ neb wʋsg ra miime tɩ saam-biig a Glen How gomd n fãagda a Zeova Kaset rãmbã bʋ-kaoodbã taoore. Sẽn yɩ bilfu, bʋ-kaoodbã yeela maam tɩ taal pa le be m zug ye.

B sẽn da gɩdg d tʋʋmdã Kebɛk na-tẽngẽ wã, ra yaa toog me tɩ d paam ro-sõng n luwaas d tigissã yĩnga. Tõnd tigingã sẽn wa n tɩ paam yaa zĩig sẽn da yaa mobila bĩngr zĩiga, la maagda wʋsg waoodã wakate. Saam-biisã kong n baoo masĩn sẽn wɩngd zĩigã bilf waoodã sasa. Naoor wʋsgo, tigissã ket tɩ lɛɛr a wãna, d wat n karg n gũbga masĩnã, n togsd kibay sẽn kengd raoodo.

D sã n get koɛɛgã mooneg sẽn paam pãng to-to masã wã, kõta sũ-noogo. Yʋʋmd 1960 la zakã sẽnese, ra yaa tigin-bõones a wãn bal n da be Kebɛk na-tẽngã pʋgẽ, la tẽngã babg ning b sẽn boond tɩ Kotnoorã, n paas Gaspe babgã. La rũndã-rũndã wã, tigimsã sõor lebga zembal zĩ-kãense. Rẽ me, saam-biisã tigimda taab Rĩung ro-neeb pʋgẽ.

B KOSA TÕND TƖ D GILGD N KAAGD TIGIMSÃ

Yʋʋmd 1970 wã, b kosa maam ne a Simone tɩ d gilgd n kaagd tigimsã. La yʋʋmd 1973, b kɩtame tɩ m lebg distrik yel-gɛta. Yʋʋm-kãens pʋgẽ, m bãnga bũmb wʋsg ne saam-biis sẽn tar minim maasem. Wala makre, a Laurier Saumurb ne a David Splanec. B fãa yɩɩ tigims sull yel-gɛtba. Tigis-kãseng poor fãa, maam ne a David sõsdame, tɩ ned fãa togs a to bũmb kẽer a sẽn tõe n maan t’a minimã paas nebã zãmsgã wɛɛngẽ. M tẽra vugr a David sẽn yeel-m yaa: “Léonce, fo yaoolem sõsgã yɩ-m-la noogo. Yɩɩ sõma, la sã n pa hal sõss a tãab pʋgẽ, mam kõn tõog n wɛgs goam nins fo sẽn wɛgsã fãa ye.” Sɩd me, m bao n na n togsa bũmb ka tɛk sõs-yɛngã pʋgẽ. M da segd n maoome tɩ m sã n na n wɛgs sõsg bɩ m togs bũmb a wãn bala.

Distrik yel-gɛt tʋʋmd me yaa a keng tigims sull yel-gɛtbã raoodo. La Kebɛk koe-moondb wʋsg mii maam hal sẽn kaoose. M sã n tɩ kaag tigims sulli, b nong n datame tɩ d tũ taab n tɩ moon koɛɛgã. M sẽn da paamd n tũud-b tɩ d moond koɛɛgã ra noom-m lame, la ra kɩtame tɩ m pa tõe n yã sẽk sõma n sõs ne tigims sullã yel-gɛtã ye. Vugri, tigims sull yel-gɛt sẽn nong neb sõma n kong n yeel-m yaa: “Fo sẽn yãt sẽk saam-biisã yĩngã yaa sõma, la ra yĩm tɩ fo sẽn wa ka semen-kãnga wã yaa mam yĩng ye. Ma-me rata raood kengre!” A sẽn tẽeg-m woto wã sõngame tɩ m dɩk yam.

Bʋko, yʋʋmd 1976, yel-lingdem n paam maam. A Simone mam sẽn da nong wʋsgã yika bã-kɛgenga, n maan kaalem. A sẽn da sakd n mongd a meng a taabã yĩngã, la a sẽn da nong a Zeova to-to wã kɩtame t’a ra yaa pʋg-sõng tɛkẽ! M sẽn kell n wɩng ne koe-moonegã sõng-m lame tɩ m mao ne sũ-sãangã. M pʋʋsda a Zeova barka, a sẽn wilg t’a nong-m lame, n teel-m yellã sasa wã. M wa n lebg n kẽe kãadem ne a Carolyn Elliott. Ra yaa so-pakd sẽn gomd ãngilindi. A waa Kebɛk n na n sõng ne koe-moonegã. Yaa ned pẽnegr sẽn yaa nana. Sẽn paase, a taabã yell pak-a lame. Sẽn yɩɩd fãa neb nins sẽn yaa yãn-zoɛtba, wall sẽn tagsd-b tɩ b yaa b yembrã. A sẽn da tũud maam tɩ d gilgd n kaagd tigimsã, sõng-m-la wʋsgo!

YEL-KÃSEMS YƲƲMDE!

Yʋʋmd 1978 yʋʋm-vẽkr kiuugã la b maan so-pakrã tʋʋmd lekoll Kebɛk tẽngẽ wã pipi. Maam la b kos tɩ m yɩ lekollã karen-saamba. Rabeem n da tar-ma, bala, maam ne karen-biisã fãa ra zɩ n yã bũmb nins sẽn be lekollã sebr pʋgẽ wã ye. Zu-noogo, yʋʋm-kãng karen-biisã wʋsg ra yaa so-pakdb sẽn tar minim. Maam n da yaa karen-saambã, la m zãmsa bũmb wʋsg karen-biisã nengẽ!

Yʋʋm-kãng bala, b sigla tẽns toɛy-toɛy tigis-kãseng Moreyall ɛstaad olimpikẽ wã. Gom-zugã yɩɩ “ La foi victorieuse. ” Kɛlgdbã sõor yɩɩga tus 80. A buud ra zɩ n zĩnd Kebɛk ye. B yãka maam tɩ m na n yẽsd ne kiba-kɩtbã, n leokd sogsg nins b sẽn tar tigis-kãsengã wɛɛngẽ wã. M paam n sõsa ne kiba-kɩtb wʋsgo. M sẽn wa n wʋm bũmb nins b sẽn gʋls n pẽgd tõndã, m sũ-noogã ra pa tõe n bãng n bilg ye. Kiba-kɩtbã sẽn sõs ne-d tɩ b yiis radio wã la tele wã pʋgẽ wã sã n naag taaba, yɩɩda lɛɛr 20. Zʋrno-rãmb b sẽn yiis me yaa kobse. Kɩtame tɩ neb wʋsg bãng a Zeova la a nin-buiidã!

B KƖTAME TƖ D KẼNG ZĨIG A TO

Bũmb la b kɩt tɩ m maan yʋʋmd 1996, la yɩɩ toeeng meng-menga! Hal m lisgã tɛka, m zĩnda Kebɛk tẽngã b sẽn gomd farendã. La yʋʋm-kãngã, b kɩtame tɩ m kẽng Torõnto, n da lebg distrik yel-gɛt sẽn get tigims sula sẽn gomd ãngilindi. M da yɛɛsdame tɩ m pa tõe n wɛgs sõsga, bala, m da getame tɩ mam ãngilindã pa sõma ye. Yɩɩ tɩlɛ tɩ m pʋʋs a Zeova naoor wʋsg n yɩɩd pĩndã, la m maneg n teeg-a me n yɩɩda.

Yɩɩ rabeem yẽ, la masã wã, m tõe n yeelame tɩ m sẽn paam n tʋm tʋʋm-kãng Torõnto yʋʋm a yiibã kõ-m-la sũ-noog wʋsgo. A Carolyn maana sũ-mare, n sõng-m hal tɩ m wa bas m yam n gomd ãngilindã. Saam-biisã me sõng-m-la sõma, la b ra kengd m raoodo. Tao-tao bal tɩ d paama zo-rãmba.

Baa ne tigis-kãsengã sẽn da yaa sibr ne hato, tɩ m da tar tʋʋm wʋsg tigis-kãens seglg yĩngã, naoor wʋsgo, m da moonda zak-zak arzũm zaabre, n tõe n ta lɛɛre. Tõe tɩ nina sok yaa: ‘Bõe yĩng tɩ m na n yi koe-mooneg tigis-kãseng ket tɩ beoogo, n yaool n tar tʋʋm wʋsg tigsgã yĩnga?’ La m neeme tɩ m sã n sõs ne neb sõma koe-moonegã sasa, kengda raoodo. Baa ne rũndã, m sã n yi koe-moonegã n lebg n wa, m sũ-noogã waoogame.

Yʋʋmd 1998 wã, b kɩtame tɩ d leb Moreyalle, n yaa zall so-pakdba. Yʋʋm wʋsg pʋgẽ, m tʋʋmd me ra yaa sigl koe-moonegã zãma wã zĩisẽ, la m yẽsd ne kiba-kɩtbã sẽn na yɩl n dems tags-kɛg nins nebã sẽn yelgd a Zeova Kaset rãmbã zugã. Masã, maam ne a Carolyn sã n paam n na n taas sãamb sẽn wa Kanada paalem koe-noogã, nooma tõndo. Naoor wʋsgo, yaa neb sẽn dat n bãng Biiblã sõma.

Yʋʋm 68 la woto mam sẽn deeg lisgu. M sã n lebg n tagse, m neeme t’a sɩd ning-m-la barka. M sẽn tõog n paam minim koe-moonegã pʋgẽ, la m sõng neb wʋsg tɩ b bãng sɩdã, m sũ-noogã pa tõe n bilg ye. A Lise ne a sɩdã me sẽn wa n paam tɩ b kambã bɩ wã, b lebga wakat fãa so-pakdba. Mam sẽn ne t’a ket n wɩngda ne Wẽnnaam tʋʋmdã, m sũur nooma wʋsgo. M pʋʋsda m tẽed-n-taas nins sẽn sõng maamã barka. Ne b mak-sõngã la b saglsã maasem, m paama zood sõma ne a Zeova, la m tʋm tũudmã tʋʋm toor-toore. M bãngame tɩ sẽn na yɩl n kell n tʋm a Zeova tʋʋmd n ka base, yaa tɩlɛ tɩ d teeg a vʋʋsem sõngã. (Yɩɩn. 51:13) M ket n pʋʋsda a Zeova barka, a sẽn sak tɩ ma-me naag n tʋmd a yʋʋrã waoogr yĩngã!—Yɩɩn. 54:8.