M paama sũ-noog wʋsg a Zeova tʋʋmdã pʋgẽ

M ROAGDBÃ TŨUDUM RA YAA TOOR-TOORE

Mam doga yʋʋmd 1934. Mam roagdbã yii Sʋwɩs n tɩ zĩnd Timins sẽn yaa Õntariyo sẽn be Kanada wã tẽn-bilã pʋgẽ. Yʋʋmd 1939 wã sẽnese, m ma sɩnga Gũusg Gasgã karengo, la a kẽnd a Zeova Kaset rãmbã tigissã. A ra tallda maam ne m kẽem-dãmb a yiibã la m yap a naasã n kẽnd tigissã. Pa yã n kaoos la a lebg a Zeova Kaset soab ye.

M baaba sũur da pa noom ne a yam-yãkrã ye. La m ma ra nonga sɩdã n dat n tũ a Zeova ne a sũur fãa. A kell n maana sɩd ne a Zeova, baa b sẽn wa n gɩdg a Zeova Kaset rãmbã tũudmã yʋʋmd 1940 Kanada wã. Wakat fãa, a ra waoogda m baaba la a gomd ne-a ne bʋgsem, baa a sẽn mi n tʋʋd-a wã. M ma mak-sõngã sõnga maam ne m kẽem-dãmbã la m yapã tɩ tõnd me yãk yam n na n tũ a Zeova. Bilf-bilfu, m baaba wa n toeemame n lebg nin-bʋgsgo, n get a zakã rãmb yell sõma hal tɩ d sũur noome.

M KẼESA M MENG ZÃNG A ZEOVA TƲƲMDÃ PƲGẼ

Yʋʋmd 1950 wã, m kẽnga L’accroissement de la théocratie tigis-kãsengã sẽn zĩnd Niuyorkã. Mam sẽn sõs ne saam-biis la saam-bi-pogs sẽn yi dũniyã ween-vɩɩs a naasã, la m kelg b sẽn bool neb sẽn kẽng Galaad lekollã n sokã, kɩtame tɩ m dat n tʋm a Zeova tʋʋmdã ne m sũur fãa. M maneg n dat n kẽesa m meng zãng a Zeova tʋʋmdã pʋgẽ. M sẽn lebg n kuilã bala, m kosame n na n lebg wakat fãa so-pakda. Kanada filyallã leoka maam tɩ yɩta sõma tɩ m deeg lisg nanda. M deega lisg yʋʋmd 1950 zĩ-likr kiuugã pipi daarã. Kiuug poore, m lebga wakat fãa so-pakda, tɩ b kɩt tɩ m kẽng Kapuskasing. Tẽn-kãng ra zãra wʋsg ne tõnd sẽn da beẽ wã.

Yʋʋmd 1951 wã, filyallã kosa koe-moondb nins sẽn wʋmd Farendã tɩ b tags n ges b sã n tõe n yik n kẽnga Kebɛk sẽn yaa zĩig b sẽn gomd Farendã. B ra rata koe-moondb wʋsg beenẽ. M da wʋmda Farend la Ãngilindi. Rẽ n so tɩ m yeel tɩ m na n kẽngame, tɩ b tʋm-m Ruyin. M da pa mi ned baa a ye be ye. Saam-biig ning yell m sẽn gom sɩngrẽ wã adɛrs bal la b ra kõ maam. La baasa neere. Maam ne a Marcel wa n lebga zoodo. Mam zĩnda Kebɛk yʋʋm a naase, hal tɩ ra noome. M wa n lebga zall so-pakda.

M KẼNGA GALAADE, LA M GŨU BŨMB KẼER N KAOOSE

M sẽn wa n be Kebɛkã, b boola maam Galaad lekollã sẽn be Saflãnsĩng sẽn be Niuyorkã tɩ m maan lekoll 26 soabã. D karem n saa yʋʋmd 1956 wao-fugdg kiuug rasem 12, tɩ b tʋm maam tẽng ning b sẽn boond rũndã-rũndã tɩ Gãnab wã sẽn be Afirikdeluwɛstã. La nand tɩ m looge, m da segd n leba Kanada n tɩ maan semen a wãn bala, tɩ b manes m sɛbã.

M gũu seb-kãens Torõnto n kaoos kiis a yopoe. Saam-biig a Cripps zakã rãmb n deeg maam ne sũ-noogo. Maam ne b bi-pugl a Sheila wa n lebga zo-rãmba. D yamã kẽe taaba. Mam sẽn wa n segend m meng n na n yeel-a tɩ m datame tɩ d kẽ kãadmã, sɛbã waame. Maam ne a Sheila pʋʋsa rẽ wɛɛngẽ. D yãka yam tɩ m na n kẽng zĩig ning b sẽn tʋm maamã. La d yãka yam me n na n gʋlsd taab lɛta, n ges d sã n na n wa tõog n kẽe kãadem. Pa yɩ nana ye. La d wa n mikame tɩ d yam-yãkrã yaa sõma.

Sẽn na yɩl n ta Akra sẽn be Gãna wã, mam kẽe tẽre, batayo la sɩlga. So-toakã kaoosa kiuugu. B yãka maam tɩ m lebg tigims sull yel-gɛt beenẽ. Tigims nins mam sẽn da segd n kaagdẽ wã ra bee Gãna, Kodivoaar ne Togo sẽn yaa Gãna tẽn-yagsã. Naoor wʋsgo, m da togda sor m yembre, ne Betɛllã mobilli. M sẽn da kẽnd n kaagd saam-biisã ra nooma maam wʋsgo.

Wɩkɛn-dãmbã, m da wɛgsda sõss tigims sull tigis-kãsems sasa. D ra pa tar tigis-kãseng roog ye. Rẽ n so tɩ saam-biisã mi n maan zãnd ne bãmbu raado, n pil-a ne koms vãado, sẽn na yɩl n kogl b mens ne wĩndgã sẽn zabdã. B sẽn da pa tar firgo rɩɩbã seglg zĩigẽ wã yĩnga, b ra wata ne rũm-vɩɩse, tɩ b sã n wa rat n segl rɩɩb n kõ kɛlgdbã bɩ b yõk n kʋ.

Tigis-kãsemsã sasa, d mi n yãa bũmb kẽer sẽn maand laado. Daar a yembre, saam-biig a Herb Jenningsc sẽn yaa misioneerã ra wɛgsda sõsg tigis-kãseng a ye sasa, tɩ naaf kaoog n yi rɩɩbã seglg zĩigẽ, n zoe n wa ɛstaraadã ne kɛlgdbã sʋka. Saam-biig a Herb sĩndame n pa le gomda, tɩ naafã me yirb n zoet n yuusdẽ. Saam-biis a naas sẽn da tar pãng n yik n yõk naafã, n tall-a n leb rɩɩbã zĩigẽ tɩ kɛlgdbã laadẽ.

Semennã pʋgẽ, m da yiisda La Société du Monde Nouveau en action filmã tẽn-bõones nins sẽn pẽ be wã pʋsẽ. M da mi n sẽba fu-pɛɛlg ra-lugs a yiib wall tɩɩs a yiib sʋka, n yiis filmã. Tẽngã rãmb ra nonga rẽ. B wʋsg ra nan zɩ n yã filim ye. B sã n wa ne nebã sẽn deegd lisgã, b wẽeda nug-pogs wʋsgo. Film-kãng sõnga neb nins sẽn ges-a wã tɩ b bãng t’a Zeova Kaset rãmbã bee dũniyã gill zugu, la tɩ b zemsda taaba.

Mam sẽn zĩnd Afirikã yʋʋm a yiib poore, m paam n kẽnga tigis-kãseng sẽn tigim tẽns toɛy-toɛy neb Niuyork yʋʋmd 1958, hal tɩ yɩ-m noog wʋsgo. M sũur yɩɩ noog wʋsgo, m sẽn yã a Sheila wã. A ra yaa zall so-pakd Kebɛke, n yi be n wa tigis-kãsengã. D ra gʋlsda taab lɛta. La masã d sẽn yã taabã, m yeel-a lame tɩ m datame tɩ d kẽ kãadem t’a sake. M gʋlsa saam-biig a Nathan Knorrd n kos-a tɩ sã n tõe bɩ b sak t’a Sheila kẽng Galaad lekollã, tɩ rẽ poor bɩ a wa bʋʋg-m Afiriki. A sakame. A Sheila wa n waa Gãna. D kẽe kãadem yʋʋmd 1959 zĩ-likr kiuug rasem a 3 Akra. D ra neeme t’a Zeova ningd-d-la bark wʋsgo, d sẽn lʋɩɩs a raabã taoor d vɩɩmã pʋgẽ wã yĩnga.

B KƖTAME TƖ D KẼNG KAMERUN

Yʋʋmd 1961 wã, b tʋma tõnd Kamerun. B kosa maam tɩ m sõng n lugl filyall-paall beenẽ. Kɩtame tɩ m da tʋmd wʋsgo. B sẽn yãk maam tɩ m yaa filyallã yel-gɛtã yĩnga, bũmb wʋsg la m da segd n zãmse. La yʋʋmd 1965 wã, d wa n bãngame t’a Sheila tara pʋga. D sẽn bãng tɩ d na n lebga roagdbã ra kẽesd-d-la rabeem. La d sũur sẽn wa n lebg noog ne d sẽn na n paam biigã, tɩ d magd n na n leb Kanada wã, yel-beed n maane.

A Sheila pʋgã sãamame. Logtorã togs-d lame tɩ yaa bi-ribla. Yellã sẽn maanã yɩɩda yʋʋm 50 masã, la d pa tol n yĩm rẽ ye. Baa sẽn sãam d sũur wʋsgã, d kell n paa d tʋʋmdã d sẽn nong wʋsgã pʋgẽ.

Kamerun tẽngẽ wã, b ra wae n namsda d saam-biisã, b sẽn pa kẽesd b toog politikã yɛlẽ wã yĩnga. Naamã baoob sasa la b paamd namsg n tɩ yɩɩda. Bũmb ning d sẽn da yɛɛsd n yɩɩdã maana yʋʋmd 1970 sig-noy kiuug rasem 13 daare. B gɩdga a Zeova Kaset rãmbã tũudmã. Goosneema wã reega d biru-paallã sẽn da yaa neerã. Rẽ tɩ d sẽn yik n kẽng be wã zemsa kiuug a nu bala. Semen a ye pʋgẽ bala, b riga maam ne a Sheila la misioneer-dãmb a taabã n yiis tẽngã. Pa yɩ nana tɩ d loog n bas saam-biisã la saam-bi-pogsã ye. Bala d ra nong-b-la wʋsgo, n da maand yɩɩr bũmb nins sẽn tõe n yõd n paam-bã yĩnga.

D zĩnda Fãrens Betɛllẽ wã kiuug a yoobe. D ra ket n maanda d sẽn tõe fãa n sõngd d saam-biisã sẽn be Kamerunnã. Yʋʋm-kãng yʋʋm-sar kiuugã, b kɩtame tɩ d kẽng Nizeriya Betɛllẽ wã. Ra lebga Nizeriya Betɛllã n get koe-moonegã yell Kamerun. D tẽed-n-taasã sẽn be Nizeriya wã reeg-d-la sõma. D tʋma beenẽ yʋʋm wʋsg ne sũ-noogo.

YAM-YÃKR SẼN PA YƖ NANA

Yʋʋmd 1973, yɩɩ tɩlɛ tɩ d yãk yam bũmb sẽn pa nana wɛɛngẽ. Bãas n da namsd a Sheila. D wa n kẽnga Niuyork tigis-kãseng yĩnga. D sẽn wa n be be wã, a Sheila yeela mam ne nintãm yaa: “M pa le tõe n tʋm tʋʋmdã ye! M yaame. M yĩisã zabda wakat fãa.” Rẽ t’a sẽn be ne maam n tʋmd tʋʋmdã Afirik wĩndg sẽn lʋɩtẽ babgã yɩɩda yʋʋm piig la a naase. M sũur da nooma ne-a a sẽn maand sɩd tʋʋmdã pʋgẽ wã yĩnga. La d ra segd n toeema bũmb kẽere. D goma rẽ yelle, la d pelg d pʋg n pʋʋse. Rẽ poore, d yãka yam n na n leb Kanada. Be d ra na n tõog n gesa a laafɩ wã yell sõma n yɩɩda. D ra kẽesa d mens zãng a Zeova tʋʋmdã pʋgẽ n yaa misioneer-dãmba. Rẽ basgã sãama d sũur wʋsgo.

D sẽn ta Kanada wã, d paamame tɩ rao a ye sẽn sɩng n yaa m zoa rɩk-m tʋʋma. A ra bee tẽng a ye sẽn be Torõnto nug-goabg sẽnesã n koosd mobila. D luwaasa roog n da te-kʋda, tɩ kɩt tɩ d tõog n yik n kẽng be n pa kẽ sam ye. D ra pa rat n gĩd d vɩɩmã ne bũmb wʋsg ye. Bala d ra ratame tɩ sã n wa tõe bɩ d le kẽes d meng zãng a Zeova tʋʋmdã pʋgẽ. Pa yã n kaoos la d le tõog n kẽes d meng zãng a Zeova tʋʋmdã pʋgẽ hal tɩ ling-d ye.

M wa n tɩ sõngd n meta tigis-kãseng roog Norvall sẽn be Õntariyo wã sibr fãa. B wa n yãka maam tɩ m lebg tigis-kãsengã roog yel-gɛta. Rẽ t’a Sheila bãasã boogame tɩ d tõog n sak tʋʋmdã. D yikame n tɩ zĩnd tigis-kãsengã roogẽ yʋʋmd 1974 sigr kiuugã. M sũur da nooma wʋsg d sẽn le kẽes d meng zãng a Zeova tʋʋmdã pʋgẽ wã.

Zu-noogo, a Sheila keelmã ra ket n tara paasgo. Yʋʋm a yiib poore, m sakame tɩ b yãk-m tɩ m lebg tigims sull yel-gɛta. D tigims sullã ra bee Manitoba sẽn be Kanada soolmẽ wã. Beenẽ, waoodã yaa wʋsgo. La saam-biisã la saam-bi-pogsã nonga neba. D wa n bãngame tɩ pa d sẽn be zĩig ning n tũud a Zeova wã n tar yõod ye. Sẽn tar yõodã yaa d we n ket n tũud-a.

M BÃNGA BŨMB SẼN TAR YÕOD WƲSGO

M sẽn yɩ tigims sull yel-gɛt n kaoos yʋʋm a wãn poore, b bool-d lame tɩ d wa tʋm Kanada Betɛllẽ wã yʋʋmd 1978 wã. Pa yã n kaoos la m maan bũmb sẽn sãam m sũur wʋsg ye. La m dɩka yam bõn-kãng pʋgẽ. B yãka maam tɩ m wɛgs sõsg sẽn kaoosd lɛɛr a ye la minit 30 ne Farende, tigsg sẽn zĩnd Moreyall sasa. Zu-bʋko, m sõsgã pa yɩ kɛlgdbã noog wʋsgo, tɩ saam-biig sẽn tʋmd biru ning sẽn get koɛɛgã mooneg yellã pʋgẽ kõ maam sagls rẽ wɛɛngẽ. Sɩd-sɩda, m da segd n bãngame tɩ m pa ned sẽn sa ne sõss wɛgsg ye. La m pa reeg saglgã neer ye. Maam ne saam-biigã sõsgã pa baas neer ye. M sũurã yikame, bala m da getame t’a sãbsa m sõsgã wʋsgo, n pa tol n pẽg-m ye. M tika b sẽn kõ maam saglgã to-to wã, la sẽn kõ-a maam saglgã manesmã, n pa kelg saglgã ye.

Rasem a wãn poore, filyallã taoor lʋɩtb sull ned a ye n gom ne maam rẽ wɛɛngẽ. M sak n deegame tɩ m manesem sẽn yɩ to-to ne saglgã pa yɩ sõma, n yeel tɩ m kongame. Rẽ poore, m tɩ sõsa ne saam-biig ning sẽn sagl maamã. M kos-a-la sugr t’a sak n deege. Yel-kãngã pʋgẽ, m bãngame tɩ d segd n yɩɩ sik-m-mens rãmba. M pa na n tol n yĩm rẽ ye. (Yel. 16:18) M pʋʋsa a Zeova rẽ wɛɛngẽ naoor wʋsgo. M yãka yam n pa na n tol n le tall manesem a woto buud ye.

Mam sẽn be Kanada Betɛllẽ wã yɩɩda yʋʋm pis-naas masã. Yʋʋmd 1985 wã tɛka, m paam n naaga filyallã taoor lʋɩtb sulli. Yʋʋmd 2021 wã, m pag a Sheila m sẽn nong wʋsgã maana kaalem. A sẽn pa le be ne-mã sẽn namsd-mã sẽn yãk a toogo, m laafɩ wã me pa le waoog ye. La m sẽn tʋmd a Zeova tʋʋmdã wʋsgã kõt-m-la sũ-noogo. M pa ne tɩ ‘wakatã loogdame ye.’ (Koɛ. 5:20) Baa m sẽn paam zu-loees wʋsgã, bũmb nins sẽn kõ-m sũ-noogã n yɩɩda. M sẽn lʋɩɩs a Zeova raabã maaneg taoore, n kẽes m meng zãng a tʋʋmdã pʋgẽ na maan yʋʋm pis-yopoe wã, m paama bark wʋsgo. M saagdame tɩ saam-biis la saam-bi-pogs nins sẽn yaa kom-bɩɩsã na n ket n lʋɩɩsda a Zeova raabã taoore. Bala m kɩsa sɩd tɩ yaa sẽn tũud-b a Zeova wã bal n paamd vɩɩm sẽn tar barka.