Karengã la ligdã n tõe n kɩt tɩ ned beoog yɩ neer bɩ?

Neb wʋsg tagsdame tɩ yaa sẽn karem-b n zãag n tar ligdã n tõe n paam tɩ b beoog yɩ neere. B tagsdame tɩ ned sã n kẽng inivɛrsite, a nafda a zakã neb la a sakã neba. B tõe n tagsdame tɩ neb nins sẽn karem n zãagã paamda tʋʋmd sẽn yaood sõma, la tɩ neb nins sẽn tar ligd wʋsgã tara sũ-noogo.

NEB WƲSG SẼN MAANDE

Ad rao a ye sẽn yit Sin, t’a yʋʋr boond t’a Zhang Chen sẽn yeele: “M da getame tɩ yaa tɩlɛ tɩ m paam inivɛrsite dipolom n tõog n yi naongã pʋgẽ, la tɩ yaa m sã n paam tʋʋmd sẽn yaood sõma la m na n paam sũ-noogo, tɩ m vɩɩmã me tar barka.”

Neb wʋsg sẽn dat n wa paam tɩ b beoog yɩ neerã yĩnga, b modgdame n na n kẽng inivɛrsite bɛda, baa yaa tẽn-zẽnga, n tagsdẽ tɩ rẽ n na n sõng-b n yɩɩda. Woto ra yaa bũmb sẽn wae, hal n wa tãag koronavirisã bã-longdgã sẽn wa n kɩt tɩ so-toakã lebg toog dũniyã gill zugã. Yʋʋmd 2012 wã, siglg a ye maana vaeesgo, n wilg tɩ b sã n pʋɩ karen-biis nins fãa sẽn be tẽn-zẽms n karemdẽ wã sõor zĩis a yiibu, sẽn yɩɩd pʋɩ-sʋkã fãa yita Aazi.”

Naoor wʋsgo, roagdbã maanda b sẽn tõe fãa, sẽn na yɩl tɩ b kambã kẽng tẽn-zẽms n tɩ karem inivɛrsite. Bi-bɩɩg a ye sẽn yit Taiwan t’a yʋʋr boond t’a Kisiyãng yeelame: “Baa ne m roagdbã sẽn da pa são wã, b maana b sẽn tõe fãa tɩ tõnd d naasã fãa tɩ karem inivɛrsite Etazĩni.” Wa roagdb a taabã sẽn mi n maandẽ wã, a Kisiyãng me roagdbã kẽe sam-bɛda, sẽn na yɩl n paam ligd n yao b kambã karengã.

KARENGÃ TÕE N KƖTAME TƖ NED BEOOG YƖ NEER BƖ?

Bi-pugl a ye sẽn zĩ a ordinatɛɛr taoor ne yʋngo, n yɛ zãnga, t’a sũur me sãame. — Neb wʋsg sẽn karem n zãag n baood arzɛgsã vɩɩm wat n baasa ne sũ-sãamse

Yaa sɩd tɩ karengã tõe n manega d vɩɩmã zĩis kẽer wɛɛngẽ. La pa wakat fãa la karengã kɩtd tɩ karen-biisã paamd b sẽn datã ye. Wala makre, kẽer tʋma wʋsgo, la b kẽ sama, n na n paam ligd n yao b karengã. La yʋʋm wʋsg poore, b pa paam tʋʋmd ning b sẽn da ratã ye. Pag a ye yʋʋr sẽn boond t’a Rachel Mui togsa bũmb Sẽngapʋʋr zʋrnall a ye pʋgẽ. A yeelame: “Sẽn karem-b inivɛrsite n paam dipolom n yaool n pa tar tʋʋmã sõor paasdame.” A Ziyãnzii, sẽn yaa rao sẽn be Taiwan, n karem inivɛrsite n tar dipolom-dãmb wʋsgã me yeelame: “Neb wʋsg sakda tʋʋm sẽn pa zems baa bilf ne b dipolom-dãmbã ye. Bala sẽn maand ka ye.”

Baa neb nins sẽn paam n tʋmd tʋʋmd ning b sẽn da ratã tõe n getame tɩ b vɩɩmã pa wa b sẽn da ratã ye. D gom rao a ye yʋʋr sẽn boond t’a Niran yelle. A yita Taiwan. A sẽn kẽng Ãngeletɛɛr n tɩ karem inivɛrsite n sa poore, a paama tʋʋmde. La ad a sẽn yeele: “Dipolom ning m sẽn paamã sõng-m lame tɩ m paam tʋʋmd sẽn yaood sõma, wa m sẽn da ratã. La tʋʋmdã ra yaa toogo, la rɩkd sẽk wʋsgo. Kaoosg zugẽ, tʋʋmdã taoor-dãmb wa n basa neb wʋsg tʋʋma. Mam da naaga b sẽn bas-b rãmbã. M bãngame tɩ tʋʋmd ka be n tõe n kɩt tɩ ned beoog yɩ neer ye.”

Baa rakã-rãmbã, wall neb nins sẽn wõnd b vɩɩmã yaa sõma wã ket n tara zu-loees b zagsã pʋsẽ, b laafɩ wã pa lebd be, b ket n maanda yɩɩr me ligdã wɛɛngẽ.” Rao a ye sẽn yit Zapõ, t’a yʋʋr boond t’a Katsutosi yeelame: “Mam da tara arzɛk wʋsgo, la m da pa tar sũ-noog ye. Bala nebã ra wagsda ne maam, n maand sũ-kiiri, la b ra namsd-ma.” Pag a ye sẽn be Viɛtnam t’a yʋʋr boond t’a Lam yeelame: “M nee neb wʋsg sẽn maand b sẽn tõe n na n paam ligd tɩ sek-ba. La togs sɩdã, woto pʋd n wata ne yɩɩre, bãase, la sũ-sãamse.”

BŨMB NING SẼN KƖT TƖ KARENGÃ PA TÕE TƖ NED BEOOG YƖ NEERÃ

Yaa sɩd tɩ karem n paam ligd n ges f meng yell la f zak rãmb yell pa wẽng ye. La rẽ bal pa tõe n kɩt tɩ ned beoog yɩ neer ye. Bõe yĩng tɩ d yet woto? D ges Wẽnnaam Gomdã sẽn yete.

KAREN-BƐDÃ BAL PA TÕE TƖ NED VƖƖM TALL BARK YE.

“Ka neb sẽn zoet tao-tao n tõogd zoees ye. . . . Ka bãngdbã n paamd arzegse, la ka nin-yẽesems n paamd pẽgr me ye. Bala, bãmb fãa paamda toog wall noogo.”—KOƐƐG SOABA 9:11.

Baa ned sã n karem n zãage, a vɩɩmã tõeeme n pa tall bark ye. Bala yɛl kẽer n maand t’a pa tar b tɩɩm ye. Baa ned sã n karem n zãage, ligd zu-loeese, gudgri, wall bu-welsg tõe n kɩtame t’a pa tõog n maan a sẽn da rat n maan bũmb ningã ye.

ARZƐK TÕE N SAAME.

“Da nams f meng n pʋg arzegs ye, la ra sak tɩ bõn-kãng lebg f zu-loɛɛg ye. Fo yonga f nin n get arzegse? Bãng tɩ b na n wa loogame, bala, b mii pɩgs pusbu, la b na n yɩka wa sɩlga, n loog saasẽ.”—YEL-BŨNÃ 23:4, 5.

Ligdã sẽn tõe n kõ ned bãan ningã pa kaoosd ye. Dũni-kãngã pʋgẽ, ned tõe n bõna a paoong zĩig pʋgẽ. Sabab-wẽng wa tẽn-digimdgu, weoog sẽn yõk bugum, bɩ sob-kãseng tõe n kɩtame tɩ ned wa pa le tar wakɩre, la a pa le tar zĩig n gãe meng ye.

NAOOR WƲSGO, LIGDÃ WATA NE ZU-LOEESE.

“Arzɛk soab tɩgrã ka basd-a t’a gũs ye.”—KOƐƐG SOABA 5:11.

Rao a ye sẽn be Hõng Kõng, t’a yʋʋr boond t’a Frãnklẽ wilgame tɩ gom-kãngã yaa sɩda. A karem n zãagame, n da tar tʋʋmd sẽn yaood sõma. La daar a ye, b yãk-a lame t’a na n yɩ taoor soaba. A yeelame: “Yaamsã ra yaa wʋsgo, hal tɩ m da pa le tar laafɩ ye. M yɩɩrã me ra lebga wʋsgo, tɩ m da pa le tõe n gũs ye.” Kaoosg zugẽ, a wa n gesame t’a pa le tõe n kẽng taoor ne tʋʋmdã ye. Ad a sẽn yeele: “Mam wa n sokda m meng bõe yĩng tɩ m tʋmd tʋʋm-kãngã. Rẽ kɩtame tɩ m maneg n tags vɩɩmã võor yelle.”

“Da nams f meng n pʋg arzegs ye.”—YEL-BŨNÃ 23:4

Wala a Frãnklẽ, neb wʋsg wa n bãngame tɩ bũmb kẽer n tar yõod wʋsg vɩɩmã pʋgẽ n yɩɩd karen-bɛdã la arzɛkã. Sãnda tagsdame tɩ yaa b sã n modg n lebg nin-sõngo, la b maand b taabã neer la b na n paam tɩ b beoog yɩ neere, la pa b sã n lʋɩɩs arzɛkã baoob taoor ye. La rẽ yĩnga, rẽ n sɩd tõe n kɩt tɩ b beoog yɩ neer bɩ? Sõsg ning sẽn pʋgdã leokda sok-kãngã.