Ned fãa ratame t’a beoog yɩ neere
Yãmb ratame tɩ y vɩɩmã yɩ wãn beoog-daare? Wa neb wʋsgo, yaa vẽeneg tɩ yãmb me ratame tɩ yãmb ne y zakã rãmb beoog yɩ neere, rat n yeel tɩ n wa tar sũ-noogo, yĩns laafɩ, bãane, la paoongo.
Neb wʋsg yaool n sãmbda b sã n na n sɩd wa tõog n paama bõn-kãensã fãa. Yel-lingdem wala koronavirisã bã-longdgã wa n zũndga neb kẽer vɩɩm, n wa ne naongo, la kʋ neb wʋsg menga. Woto kɩtame tɩ neb wʋsg tagsdẽ tɩ b pa tol n tõe n paam tɩ b beoog yɩ neer ye.
Nebã sẽn pa mi yɛlã sẽn na n wa yɩ to-to wã yĩnga, b baooda bũmb toor-toor ne b sũy fãa, sẽn na yɩl tɩ sõng-b tɩ b wa paam tɩ b beoog yɩ neere. Neb kẽer teega bũmb nif sẽn pa tõe n yã, wala makre zũ-noogo. Kẽer teega karengã ne arzɛkã, n tagsdẽ tɩ rẽ n na n sõng-b tɩ b wa paam b sẽn datã. Sãnda tagsdame tɩ f sã n lebg nin-sõngo, rẽ bal n na n sõng-f tɩ f vɩɩmã yɩ noogo.
Bũmb nins yell d sẽn gomã tõe n sõnga yãmb tɩ y paam tɩ y beoog yɩ neer bɩ? Sẽn na yɩl n bãng rẽ, ad sogsg y sẽn tõe n sok y menga:
Bõe n kɩtd tɩ ned beoog yɩ neere?
Karengã la ligdã n tõe n kɩt tɩ ned vɩɩm tall bark bɩ?
Y sã n yaa nin-sõngo, rẽ n na n sõng-y tɩ y beoog yɩ neer bɩ?
Bõe n tõe n sɩd sõng-y tɩ y wa paam tɩ y beoog yɩ neere?
Seb-kãngã pʋgẽ, d na n leoka sogs-kãensã.