Y sã n yaa nin-sõngo, rẽ n na n kɩt tɩ y beoog yɩ neer bɩ?

Na maan yʋʋm kobse, neb wʋsg tagsdame tɩ yaa f sã n yaa nin-sõng la f na n paam tɩ f beoog yɩ neere. Wala makre, Aazi neb wʋsg saka filozofi wã karen-saamb a ye sẽn da yeel bũmb ningã. A yʋʋr la a Kõnfisius. A vɩɩmda yʋʋmd 551-479 sẽn deng a Zeezi rogmã. Ad a sẽn yeelã: “Fo sẽn pa rat tɩ b maan foo bũmb ningã, bɩ f ra maan f taabã rẽ ye.”a

NEB WƲSG SẼN YÃK YAM N MAANDẼ

Neb wʋsg tagsdame tɩ b sã n tar manesem sẽn yaa sõma la b beoog na n yɩ neere. Rẽ n so tɩ b modgd n sõngd b taabã, n bɩɩsd zʋg-sõma, n sak n deeg tɩ ned fãa tara a sẽn tog n maan vɩɩmã pʋgẽ, la b modgdẽ n tar sũur-kaset sẽn yaa sõma. Pag a ye sẽn be Viɛtnam ta yʋʋr boond t’a Linn yeelame: “M da tẽedame tɩ m sã n yaa pʋ-peelem soaba, rẽ la m vɩɩmã na n tall barka.”

Pagã sẽn kõt naong rãmb la neb sẽn pa tar zĩig n gãe rɩɩbo.

Neb kẽer modgdame n maand sẽn yaa sõma, b tũudmã sẽn sagend-b tɩ b maan rẽ wã yĩnga. Rao a ye sẽn be Taiwan t’a yʋʋr boond t’a Suyun yeelame: “Mam da tẽedame tɩ ned sã n maan sẽn yaa sõma, a kũumã poore a vɩɩmã na n yɩɩ noogo, la t’a sã n maan sẽn yaa wẽnga, a kũumã poore a na n kẽe bug-tẽnga.”

F SÃ N YAA NIN-SÕNG LA F NA N PAAM TƖ F BEOOG YƖ NEER BƖ?

Pagã sẽn wa n ta yir zaabre, n zãad a biig n zĩ ne yaams la sũ-sãanga.

Yaa sɩd tɩ d sã n maand d taabã neere, nafd-d-la wʋsgo. La neb wʋsg sẽn modgd ne b sũy fãa n maand b taabã neer yãame tɩ naoor wʋsgo, b pa paamd tɩ b maan-b neer n lebs ye. Pag a ye sẽn be Hõng Kõng t’a yʋʋr boond t’a Shiu Pin yeelame: “Bũmb ning sẽn maan m vɩɩmã pʋgẽ wã kɩtame tɩ m bãng tɩ pa wakat fãa la sẽn maand-b b taabã neerã paamd tɩ b maan-b neer n lebs ye. M da maanda m sẽn tõe fãa n get m zakã rãmb yelle, la m maand sẽn yaa sõma. Baa ne rẽ, mam sɩdã wa n daaga maam ne m bi-riblã n base.”

Neb wʋsg wa n bãngame tɩ pa wakat fãa la tũudmã sõngd ned t’a lebg nin-sõng ye. Pag a ye sẽn be Zapõ t’a yʋʋr boond t’a Ɛtsuko yeelame: “Mam kẽe tũudum a ye pʋgẽ, n da sigind tʋʋm kẽer kom-bɩɩsã yĩnga. Tũudmã nebã ra yoodame, b ra wagsda taaba, la b zuud egiliizã ligd menga. Woto sãama m sũur wʋsgo.”

“M da maanda m sẽn tõe fãa n get m zakã rãmb yelle, la m maand sẽn yaa sõma. Baa ne rẽ, mam sɩdã wa n daaga maam ne m bi-riblã n base.”—A SHIU PIN, HÕNG KÕNG

Neb kẽer sẽn yaa wẽn-tũudba, la sẽn modgd n maand b taabã neer sũy sãamame, yel-beed sẽn baas n paam-bã yĩnga. Yɩɩ woto ne pag a ye sẽn yit Viɛtnam t’a yʋʋr boond t’a Van. Ad a sẽn yeele: “Daar fãa, mam da raada tɩɩs biisi, fɩlɛɛr-dãmba, la rɩɩbo, n tɩ rʋʋgd tẽn-kugã zug n na n kõ m yaab-rãmbã sẽn ki wã, n tagsdẽ tɩ rẽ n na n kɩt tɩ m beoog yɩ neere. La baa ne m sẽn da maand nebã neer la m maand tũudmã yel-maandɩ kãensã fãa na maan yʋʋm wʋsgã, bã-kɛgeng n yõk m sɩdã. Rẽ poore, m bi-pugl sẽn da be tẽn-zẽng n karemdẽ n maan kaalem.”

BÕE YĨNG TƖ YƖ NIN-SÕNG BAL PA SEKE?

Y sã n yaa nin-sõngo yaa sõma, la rẽ bal pa sek na kɩt tɩ y beoog yɩ neer ye. Bõe yĩng tɩ d yet woto? Bɩ d ges Wẽnnaam Gomdã sẽn yet bũmb ningã.

PA NEBÃ FÃA N YÃKD YAM N MAAND SẼN YAA SÕMA YE

“Yel-wẽn maand a yembr sãamda bõn-sõama wʋsgo.”—KOƐƐG SOABA 9:18.

Baa d sã n maand d sẽn tõe fãa n na n yɩ nin-sõngo, nebã sẽn maand bũmb nins b mengã nafr yĩngã tõe n wa waa ne yell n kõ-do. Wala makre, bã-longdg sasa, d segd n tũu noy nins tẽngã taoor dãmb sẽn gãnegã, n modgd n pa pẽnegd nebã wʋsg ye. La neb kẽer sã n zãgs no-kãens tũubu, b manesmã tõe n kɩtame tɩ bãagã wa long neb nins sẽn tũud noyã.

NEBÃ TÕE N TUDGA SẼN YAA SÕMA BƖ WẼNGÃ WƐƐNGẼ

“Ned tõe n tagsdame t’a rɩka so-sõngo, n mik yaool n yaa sor sẽn dabd ne-a kũum zĩigẽ.”—YEL-BŨNÃ 14:12.

Hal pĩnd n tãag masã, neb kẽer maana bũmb kẽer b sẽn da tagsd tɩ yaa sõma, n yaool n wa mik tɩ b tudgame. Baa b sẽn da tagsd tɩ b sẽn maandã yaa sõma wã, b pa tõe n põs zu-loees nins rẽ sẽn na n wa ne wã ye.

VƖƖMÃ PIDA NE YEL-LINGDEM

“Yãmb yaool n pa mi y vɩɩmã sẽn na n yɩ a soab beoog ye.”—ZAK 4:14.

Baa nin-sõng tõe n tiig n maana kaalem. Wala makre, koronavirisã bã-longdgã sasa, neb wʋsg maana kaalem b sẽn wa n modgd n na n sõng b taabã. Sẽn paase, pag a ye sẽn be Sɩn t’a yʋʋr boond t’a Liting baaba maana kaalem mobill agsɩdã pʋga. Ad a sẽn yeele: “Mam da sokda m meng bõe yĩng tɩ nin-sõng a woto maan kaalem? M baaba ra yaa ned sẽn tʋmd wʋsgo, sik-m-meng soaba, la pʋ-peelem soaba. Neb nins sẽn da be mobillã pʋgẽ wã sʋka, yaa yẽ a ye bal n ki.”

Modg n yɩ nin-sõng sã n pa tõe n kɩt tɩ ned beoog yɩ neere, dẽnd yaa bõe n tõe n kɩt tɩ ned beoog yɩ neere? Sẽn na yɩl n paam sok-kãngã leoore, d segd n paama kibay sẽn yaa sɩda, sẽn tõe n sõng-d tɩ d paam d sogsgã leoore, la sõng-d tɩ d bãng d sẽn tog maan n paam tɩ d beoog yɩ neere. Yɛ la d tõe n paam kiba-kãense?

a Y sã n dat n bãng bũmb a taab n paas a Kõnfisius sẽn da zãmsd nebã bũmb ningã wɛɛngẽ, bɩ y ges L’humanité à la recherche de Dieu sebrã sak a 7, sull 31-35. A Zeova Kaset rãmbã n yiis seb-kãngã. A bee tõnd sɩt wɛɛbã sẽn yaa www.jw.org pʋgẽ.