“Mam nonga koɛɛgã mooneg masã!”

M SŨ-NOOGÃ WA N SAAME

Zu-bʋko, m sẽn wa n zems yʋʋm 13, m zoodã ne a Zeova wã pãng boogame. Ra wõnda mam karen-bi-taasã tara lohorem n tõe n maan b sẽn datã fãa, la ma-me ra rat n yɩ wa bãmba. M da getame tɩ m roagdbã sẽn lugl noy ninsã, kiris-nebã sẽn tũud noy ninsã la bũmb nins d sẽn maand d tũudmã yĩngã fãa yaa zɩɩbo. Baa ne m sẽn zɩ n kɩɩs t’a Zeova beeme wã, m da neeme tɩ m zoodã ne-a ra pa le tar pãng ye.

M da pa tolg n bas koɛɛgã mooneg zãng ye. La m da tũuda a Zeova ne rok-m-zugẽ bala. M da pa segend m meng n yaool n yi koɛɛgã mooneg ye. Kɩtame tɩ ra yaa toog tɩ m tõog n sɩng sõsg ne neba, wall m kell n kẽng taoor ne sõsgã. Woto kɩtame tɩ m koɛɛgã mooneg ra pa womd biisi, tɩ m da pa le tar sũ-noog me ye. M wa n pʋd n pa le nong koɛɛgã mooneg baa bilfu. M da yetame yaa: ‘Ned na n yɩɩ wãn n moond semen fãa la kiuug fãa?’

M sẽn wa n tar yʋʋm 17, m da tʋlla ne m sũur fãa n soog m menga. Rẽ kɩtame tɩ m wʋk m teedo, n yi zakẽ, n tɩ zĩnd Ostrali. Mam loogrã sãama m roagdbã sũur wʋsgo. B ra maanda yɩɩre, la b ra tagsdẽ tɩ m na n ket n tũuda a Zeova.

Ostrali wã, m tẽebã boogame n yɩɩd pĩndã. M wa n sɩngame n vaand tigissã. M wa n yõga zood ne kom-bɩɩs sẽn da maand wa maam. D da mi n kẽnga tigsgã ne yʋngo, tɩ vẽkembeoogã yʋng bɩ d kẽng boat de nui n tɩ sao la d yũ. M sã n lebg n tẽege, m neeme tɩ m karg a ye ra bee sɩdã pʋgẽ t’a to wã be dũniyã pʋgẽ. La m da pa tar sũ-noog zĩig baa a ye.

M WA N DƖKA YAM

Sẽn zems yʋʋm a yiib poore, m paam n sõsa ne saam-bi-poak koɛɛg-koɛɛga, tɩ yẽ mengã pa bãng la a sõng maam tɩ m maneg n tags m vɩɩmã sẽn teesd neng ningã ye. Tõnd da yaa pʋg-sadb a nu sẽn pa kẽ kãadem, n naag taab n vɩ roog a ye pʋgẽ. Tõnd wa n deega tigims sull yel-gɛtã ne a pag a Tamara, tɩ b zĩnd tõnd zakẽ wã n maan rasem a yopoe. A sɩdã sã n da wa tʋmd tigingã tʋʋma, a Tamara wat n naaga tõnd tɩ d sõsd n laadẽ. Ra nooma maam wʋsgo. A ra yaa sik-m-meng soaba, t’a pẽnegr me yaa nana. A sẽn da yaa ned tẽeb sẽn tar pãng la a maand laadã, linga maam wʋsgo.

A Tamara ra tara yẽesem wʋsgo. A ra nonga sɩdã la koɛɛgã moonego, hal tɩ f sã n yã-a bɩ f rat n maan wa yẽ. A ra maanda a Zeova raabã ne a sũur fãa, t’a sũur noomẽ, tɩ mam yẽ ra tũud a Zeova ne rok-m-zugẽ, tɩ m sũur pa noomẽ ye. A sẽn da tar manesem-sõng la sũ-noog hakɩɩkã talla pãng wʋsg mam zugu. A mak-sõngã kɩtame tɩ m maneg n tags bũmb Biiblã sẽn yeel tɩ tar yõod wʋsg zugu: Yaa t’a Zeova ratame tɩ d fãa tũ-a ne “ne sũ-noogo,” la “ne sũ-noog kilsgu!”—Yɩɩn. 100:2.

MAM SẼN MAAN TO-TO N LE WA NONG KOƐƐGÃ MOONEGO

M da rat n paama a Tamara sũ-noogã buudu. La sẽn na yɩl n paam rẽ, m da segd n toeema bũmb wʋsg m vɩɩmã pʋgẽ. Sẽn zems yʋʋm a tãab poore, mam sɩnga bũmb kẽer toeeng bilf-bilfu. M sɩngame n segend m meng n yit n moond koɛɛgã, la m mi n yɩ sõngr so-pakd wakat-wakate. Woto sõnga maam tɩ m rabeemã booge, tɩ m maneg n kɩs m meng sɩda. Mam sẽn da nong n karemd Biiblã koɛɛgã mooneg sasa wã yĩnga, kɩtame tɩ m da maneg n nong koe-moonegã. Sẽn pa yã n kaoose, kiuug fãa m da yaa sõngr so-pakda.

Mam sɩngame n yõgd zood ne kamb la kãsemb sẽn tũud a Zeova ne b sũy fãa, la b nong koɛɛgã moonego. B mak-sõngã sõnga maam tɩ m maneg n tags bũmb nins m sẽn da lʋɩɩs taoorã yelle, la m sɩng me n karemd Biiblã daar fãa. Mam sɩngame n nong koɛɛgã mooneg n paasdẽ, hal n wa lebg wakat fãa so-pakda. M da tara sũ-noog wʋsg tigingã pʋgẽ, hal tɩ m yam gãe bãane. M da na zɩ n paam sũ-noog a woto buud ye.

MAM KẼE KÃADEM NE WAKAT FÃA SO-PAKDA

Yʋʋmd poore, mam sega a Alex. A nonga neba, n yaa pʋ-peelem soab la a nong a Zeova ne koɛɛgã moonego. A ra yaa kãsemb-sõngd tigingã pʋgẽ, la yʋʋm a yoob la woto a sẽn da yaa wakat fãa so-pakda. A Alex ra tɩ moona koɛɛgã Malawi, sẽn yaa tẽng b sẽn da rat koe-moondb n paase. Beenẽ, a ra nong n bee ne misioneer-dãmb sẽn kõ-a mak-sõngo, la b keng a raood t’a kell n lʋɩɩs a Zeova Rĩungã tʋʋm taoore.

Yʋʋmd 2003, maam ne a Alex kẽe kãadem. La hal n tãag masã, d kẽesa d sẽkã fãa a Zeova tʋʋmdã pʋgẽ. D bãnga bũmb wʋsgo, la a Zeova me ning-d-la bark naoor ka tɛka.

A ZEOVA NINGA TÕND BARK N PAASE

Yʋʋmd 2009 wã, b yãk-d lame tɩ d lebg misioneer-dãmb n na n tɩ moon Timoor Oriyãntalle, sẽn yaa tẽn-bil sẽn be Ẽndonezi ko-sʋk tẽnsẽ wã. Ling-d lame, d sũur da noomame, la d ra yɛɛsdame. Kiis a nu poore, d siga Dili, sẽn yaa beenẽ na-tẽngã.

Beenẽ vɩɩmã yaa toor fasɩ ne d sẽn yiẽ wã. D ra segd n minima tẽngã neb minundã, b buud-gomdã, b rɩbdã la b sẽn vɩ to-to wã. Koɛɛgã mooneg sasa, naoor wʋsgo d yãta naong rãmba, neb sẽn pa karme, la neb b sẽn namsde. D yãa neb wʋsg me sẽn da vɩ ne sãmpoag la sũ-sãamse, zabrã la nen-kɛglmã yĩnga.a

Koɛɛgã mooneg sasa, d mi n yãame wall d wʋm bũmb tɩ ling-du. Wala makre, daar a ye m sega bi-pugl sẽn tar yʋʋm 13, t’a yʋʋr la a Mariya.b A ra bee sũ-sãams pʋgẽ. A ma ra maana kaalem sẽn pa kaoose, la a ra pa wae n yãt a baaba me ye. Wa kamb wʋsg yʋʋm sẽn zems yẽ, a Mariya me ra pa mi a sẽn na n tees a vɩɩmã neng ning ye. Mam ket n tẽra daar a ye a sẽn wa n sõsd ne maam, n togsd yell sẽn pak-a. A ra yãbdame. La m da pa wʋmd a sẽn yet bũmb ningã võor ye. Bala m da nan pa zãms buud-gomdã n tõe n gom sõma ye. La m pʋʋsa a Zeova, n kos-a t’a sõng-m tɩ m tõog n keng a raoodo. Rẽ poore, m sɩngame n karemd Biiblã vɛrse-rãmb sẽn kengd raoodo, t’a ra kelgdẽ. Yʋʋm a wãn poore, mam yãame t’a Mariya sẽn zãms Biiblã, sõng-a lame t’a tar yel-manesem sẽn yaa sõma, n manegd a meng sõma, la a toeem bũmb kẽer a vɩɩmã pʋgẽ. A wa n deega lisgu. Masã, yẽ me sɩnga Biiblã zãmsg ne neba. Rũndã-rũndã, a Mariya tara tẽed-n-taas wʋsg sẽn yaa wa a zak rãmba, la a getẽ tɩ b sɩd nong-a lame.

A Zeova ninga koe-moonegã bark Timoor Oriyãntall soolmẽ wã. Baa ne neb wʋsg sẽn deeg lisg tɩ nan pa yɩɩd yʋʋm piigã, wʋsg yaa so-pakdba, kãsemb-sõngdba, wall kãsem-dãmba. Kẽer tʋmda Betɛllẽ wã n sõngd n lebgd sɛbã tẽngã buud-goam kẽer pʋsẽ. M sã n wʋmd b sẽn yɩɩnd tigissã sasa, tɩ b nensã be laado, la m neẽ tɩ b tẽebã pãng paasdame wã, m sũur nooma wʋsgo.

M DA ZƖ N TAGS TƖ M VƖƖMÃ TÕE N TALLA BARK WOTO YE

Koɛɛgã mooneg sẽn yaa to-to Timoor Oriyãntallã yaa toor fasɩ ne sẽn da yaa to-to Ostrali wã. La m da zɩ n tags tɩ m vɩɩmã tõe n tall bark woto ye. Wakat ninga, d mi n kẽe biis-bil tɩ nebã sẽg taaba, tɩ neb kẽer zãad zĩm-koeems la zẽ-vãad wʋsg b sẽn tɩ ra raagẽ. Wakat kẽere, d mi n tɩ zãmsa neb Biiblã ro-bil sẽn yaa tʋʋlg pʋgẽ, tɩ d yĩnsã midgdẽ. Roogã pʋg mi n yaa tom, tɩ noosã gilgd zakã pʋgẽ. La baa ne sẽn da mi n pa nana wã, m da nong n yetame yaa: ‘M sũur nooma ne m sẽn be ka wã!’

M sã n lebg n tẽeg pĩndã, m sũur nooma ne m roagdbã sẽn maan b sẽn tõe fãa n sõng-m tɩ m bãng a Zeova la b kell n teel maam, baa sẽn da wa n pa nana ne maam m bi-bɩɩlmã wakatã. Mam bãngame tɩ Yel-bũn 22:6 sẽn yetã sɩd yaa sɩda. M ma ne m baaba fãa sũy yaa noog ne maam ne a Alex. B sẽn ne tɩ d kẽesa d sẽkã zãng a Zeova tʋʋmdã pʋgẽ wã noom-b lame. Yʋʋmd 2016 tɛka, mam sɩdã lebga tigims sull yel-gɛta, tɩ d gilgd Ostralazi filiyallã tẽnsã n kaagd tigimsã.

Pa yaa wa pĩndã maam n da get tɩ koɛɛgã mooneg yaa zɩɩbã ye. Masã, mam nonga koɛɛgã moonego. Mam wa n bãngame tɩ sẽn wa n yaa a soab fãa, yaa f sã n tũud Wẽnnaam la f paamd sũ-noog hakɩɩka. Yʋʋm 18 la woto maam ne a Alex sẽn naag taab n tũud a Zeova. Hakɩɩka, m zɩ n paam sũ-noog n ta woto ye. Masã, m sɩd wʋmda yɩɩn-gʋlsd a Davɩɩd sẽn yeel a Zeova bũmb ningã võore. A yeelame: “Neb nins fãa sẽn paam zĩ-soalgdg yãmb nengẽ wã na n maana sũ-noogo. Bãmb na n kaasa ne sũ-noog wakat fãa. Neb nins sẽn nong yãmb yʋʋrã . . . na n kɩdma ne sũ-noogo!”—Yɩɩn. 5:12.