Ned y sẽn nong sã n wa bas a Zeova tũubu

1. Neb kẽer manesem yaa wãna, b sã n yiis ned b sẽn nong tigingã pʋgẽ?

NED y sẽn nong la b yiis tigingã pʋgẽ bɩ? Woto sãamda sũur hal wʋsgo. Saam-bi-poak a ye yʋʋr sẽn boond t’a Hilda yeelame: “Mam sɩdã sẽn maan kaalem d kãadmã yʋʋm 41 poorã, mam tagsame tɩ m pa le tõe n paam sũ-sãang tɩ yɩɩg woto ye.b La b sẽn wa n yiis m bi-riblã tigingã pʋgẽ t’a raag a pagã la a kambã me n basã, m toogã ra pa tõe n bãng n bilg ye.”

2-3. Wa Yɩɩn-sõamyã 78:40, 41 wã sẽn wilgdã, a Zeova manesem yaa wãna, ned sã n wa bas a tũubu?

² Tags-y n ges-y a Zeova sũur sẽn sãam to-to, malɛgs kẽer sẽn da naag a zakã rãmb sẽn wa n bas a tũubã. (Ziid 6) Leb-y n tags-y n ges-y a sũur sẽn sãam to-to, Israyɛll nebã sẽn da yaa a nin-buiid a sẽn nong wʋsgã sẽn kɩɩs-a naoor wʋsgã. (Karm-y Yɩɩn-sõamyã 78:40, 41.) Y tõe n kɩsa sɩd tɩ d saasẽ Ba wã sẽn nong-dã me sũur sãamdame, ned y sẽn nong sã n wa bas a tũubu. A mii y sũ-sãangã sẽn ta zĩig ninga. A sẽn yaa nimbãan-zoɛtã yĩnga, a na n gesame tɩ y paam raood kengr la sõngre.

³ Sõs-kãngã pʋgẽ, d na n yãa d sẽn tõe n maan n paam a Zeova sõngre, ned d sẽn nong sã n wa bas a tũubu, la d sẽn tõe n maan n sõng tigingã neb nins sẽn maood ne zu-loe-kãngã buudã. Bɩ d reng n gom tags-kɛg d sẽn pa segd n tall yelle.

RA NING-Y Y MENG TAAL YE

4. Roagdb wʋsg manesem yaa wãna, b biig sã n wa bas a Zeova tũubu?

⁴ Bi-ribl bɩ bi-pugl a roagdb sẽn nong wʋsg sã n wa bas a Zeova tũubu, naoor wʋsgo a roagdbã tagsdame tɩ b ra segd n maana b sẽn tõe fãa n kell n sõng b biigã t’a ket n tũud a Zeova. Saam-biig a ye yʋʋr sẽn boond t’a Luk biig la b ra yiis tigingã pʋgẽ. Ad a Luk sẽn yeele: “Mam da ningda m meng taale. M sã n da kẽ yʋng fãa, gõeem kae ye. Wakat ning menga m yãbdame, hal tɩ m sũurã zabdẽ.” Saam-bi-poak a ye yʋʋr sẽn boond t’a Elizabɛt me maoo ne zu-loe-kãng buudu, b sẽn wa n yiis a bi-ribl tigingã pʋgẽ wã. A yeelame: “Mam da tagsda wakat fãa tɩ bũmb la m maan tɩ pa zemse. Mam da yetame tɩ m pa maan m sẽn tõe fãa n sõng m biigã t’a nong a Zeova ye.”

5. Ned sã n wa bas a Zeova tũubu, yaa ãnd yelle?

⁵ D segd n tẽegame t’a Zeova naana ned kam fãa t’a tõe n yãk a toorẽ yam. Woto rat n yeelame tɩ d tõe n yãka yam n sak-a, wall d kɩɩs-a. Kamb kẽer pa tall roagdb sẽn kõ-b mak-sõng ye. Baa ne rẽ, b yãka yam n na n tũ a Zeova la b maan sɩd ne-a. Kẽer paamame tɩ b roagdbã sõng-b tɩ b nong a Zeova. La kaoosg zugẽ, b wa n yãka yam n bas a Zeova tũubu. Dẽnd yaa ned fãa n segd n yãk a sã n na n tũu a Zeova. (Zoz. 24:15) Y biig sã n basa a Zeova tũub tɩ y sũur sãam wʋsgo, bɩ y ra tags tɩ yaa yãmb yell ye.

6. Biig manesem tõe n yɩɩ wãna, a roagd sã n wa bas a Zeova tũubu?

⁶ Wakat ninga, roagd a ye tõe n basa a Zeova tũubu, la a pʋd n daag a zakã rãmb n base. (Yɩɩn. 27:10) Woto tõe n yɩɩ toog wʋsg ne kambã, sã n mikame tɩ b ra waoogda b roagdã la b nong-a hal wʋsgo. Saam-bi-poak a ye yʋʋr sẽn boond t’a Ɛstɛɛr baaba la b yiis tigingã pʋgẽ. Ad a Ɛstɛɛr sẽn yeele: “M da yãbdame. Bala m bãngame tɩ pa sɩdã bal la a zãag a meng ne ye. Yaa a Zeova me la a yãk yam n pa na n le tũ. Mam nonga m ba wã wʋsgo. Rẽ n so tɩ b sẽn wa n yiis-a tigingã pʋgẽ wã, m da tagsda a yell wakat fãa n maand yɩɩre. M pɛlengã ra yɩgdame menga.”

7. A Zeova tagsg yaa wãn ne kom-bɩɩs nins b sẽn yiis b roagd tigingã pʋgẽ wã?

⁷ Kom-bɩɩse, b sã n yiisa y roagd a ye tigingã pʋgẽ, bɩ y bãng tɩ d kʋmd-y lame. Kɩs-y sɩd t’a Zeova mii y toogã sẽn ta zĩig ninga. A nonga yãmba, la a sũur nooma y sẽn ket n maand sɩd ne-a wã. Tigingã neb me sũy nooma ne-yã. Tẽeg-y tɩ y roagdã sẽn yãk yam n bas a Zeova tũubã, pa yãmb yell ye. Wa d sẽn zoe n togsã, a Zeova basame tɩ ned kam fãa tõe n yãk a sã n na n tũ-a lame. Kiris-ned fãa sẽn dɩk a meng n kõ a Zeova n deeg lisg segd n “tʋka a meng zɩɩbo.”—Gal. 6:5.

8. Bõe la zak rãmb tõe n maane, b sã n wa gũudẽ tɩ b ned b sẽn yiis tigingã pʋgẽ lebg n wa? (Ges-y zĩ-gũbrã me: “Lebg n wa a Zeova nengẽ.”)

⁸ Ned y sẽn nong sã n wa bas a Zeova tũubu, sãmbg kae tɩ y na n ket n saagdame t’a na n lebg n waa a Zeova nengẽ. La nananda, bõe la y tõe n maane? Y tõe n kell n modgame tɩ y tẽebã ket n tar pãnga. Woto, y kõta y zakã neb a taabã mak-sõngo, la baa b sẽn yiis a soab tigingã pʋgẽ wã. Leb n na n sõng-y lame tɩ y paam pãng n mao ne y sũ-sãangã. D gom bũmb kẽer y sẽn tõe n maan tɩ y tẽebã kell n tall pãnga.

Y SẼN TÕE N MAAN TƖ Y TẼEBÃ KELL N TALL PÃNGA

9. Bõe la y tõe n maan tɩ y tẽebã kell n tall pãnga? (Ges-y zĩ-gũbrã me: “Vɛrse-rãmb sẽn tõe n keng y raoodo, ned y sẽn nong sã n basa a Zeova tũubu.”)

⁹ Maan-y y sẽn tõe fãa tɩ y tẽebã kell n tall pãnga. Tara yõod tɩ y modg n kell n tall raoodo, la y kengd y zakã neb a taabã me raoodo. Wãn to la y tõe n maan rẽ? Sẽn na yɩl tɩ y tẽebã kell n tall pãnga, karemd-y Wẽnnaam Gomdã wakat fãa la y bʋgsd a zugu, la y kẽnd tigissã me n pa vaandẽ ye. Saam-bi-poak a ye yʋʋr sẽn boond t’a Zoana ba wã ne a tão wã fãa wa n basa a Zeova tũubu. Ad a Zoana sẽn yeele: “Mam sã n wa karemd a Abigayill, a Ɛstɛɛr, a Zoob, a Zozɛf wall a Zeezi kibar Biiblã pʋgẽ fãa, m yamã gãandeda bãane. B mak-sõngã kengda m raoodo, la sõng-m tɩ m tall tagsg sẽn yaa sõma. Yɩɩn-nood nins sẽn be d sɩtã pʋgẽ wã me kengda m raood wʋsgo.”

10. Bõe la Yɩɩn-sõamyã 32:6-8 yeta, tɩ wilgd d sẽn tõe n maan tɩ sõng-do, d sũur sã n wa sãame?

¹⁰ Togs-y a Zeova bũmb nins fãa sẽn namsd yãmbã. Y sũur sã n wa sãam wʋsgo, bɩ y ra bas a Zeova pʋʋsg ye. Kos-y d saasẽ Ba wã sẽn nong-dã t’a sõng-y tɩ y ges yellã wa yẽ sẽn get-a to-to wã, la a ‘zãms-y la a wilg-y sor ning y sẽn tog n tũ’ wã. (Karm-y Yɩɩn-sõamyã 32:6-8.) Yaa sɩd tɩ tõe n yɩɩ toog tɩ y bãng n togs a Zeova y sẽn tagsde. La bãng-y t’a Zeova mii yellã sẽn namsd-y to-to wã sõma. A nong-y-la wʋsgo, n dat tɩ y pelg y pʋg n gom ne-a.—Yik. 34:6; Yɩɩn. 62:8, 9.

11. Wa Ebre-rãmb 12:11 sẽn yetã, bõe yĩng tɩ d tõe n kɩs sɩd tɩ b sẽn yiisd yel-wẽn-maandbã tigingã pʋgẽ wã wilgdame t’a Zeova nong-d lame? (Ges-y zĩ-gũbrã me: “B sẽn yiisd yel-wẽn-maandbã tigingã pʋgẽ wã wilgdame t’a Zeova nong-d lame.”)

¹¹ Teel-y kãsem-dãmbã yam-yãkrã. Yaa a Zeova n kɩt tɩ b yiisd yel-wẽn-maandbã tigingã pʋgẽ. Yaa ned ning sẽn bas a Zeova tũubã sõngr yĩnga, la neb a taabã me neer yĩnga. (Karm-y Ebre-rãmb 12:11.) Kãsem-dãmbã sã n wa yiis ned tigingã pʋgẽ, neb kẽer tõe n tagsame tɩ b yam-yãkrã pa zems ye. La d tẽeg tɩ naoor wʋsgo, nin-bãmbã buudã pa sakd n togs bũmb kẽer sẽn pa sõma sẽn maan-a yel-wẽndã zug ye. Yaa d sak n deeg bal tɩ d pa mi yɛlã fãa vɩʋʋg ye. Rẽ wã, y segd n kɩsa sɩd tɩ kãsem-dãmb nins sẽn zĩnd bʋ-kaoorã sull pʋgẽ wã maana b sẽn tõe fãa n tũ Biiblã sẽn yetã, la b kao bʋʋdã ‘a Zeova yĩnga.’—2 Kib. 19:6.

12. Neb kẽer sẽn teel a Zeova sẽn kɩt tɩ b yiisd yel-wẽn-maandbã tigingã pʋgẽ wã, wãn to la naf-ba?

¹² Kãsem-dãmbã sã n yiis ned y sẽn nong tigingã pʋgẽ tɩ y teel b yam-yãkrã, tõe n sõnga a soabã t’a lebg n wa a Zeova nengẽ. A Elizabɛt, saam-bi-poak ning yell d sẽn zoe n gomã yeelame: “D sẽn da segd n lak d meng ne d bi-riblã yɩɩ toog wʋsg ne-do. La a sẽn wa n lebg n wa a Zeova nengẽ wã, a sak n deegame tɩ b sẽn da yiis-a tigingã pʋgẽ wã zemsame. A wa wilgame tɩ sõng-a lame t’a rɩk yam. A yeelame t’a bãngame t’a Zeova kiblgã yaa sõma.” A Elizabɛt sɩd a Mark paasame: “Kaoosg zugẽ, d biigã yeela maam t’a sẽn da rat n lebg n wa wã, yaa d sẽn kell n maan bũmb ning d sẽn da segd n maanã bal kɛpɩ wã. M sũur nooma wʋsg a Zeova sẽn sõng-d tɩ d kell yɩ sakdbã.”

13. Bõe n tõe n sõng-y tɩ y tõog n mao ne y sũ-sãamsã?

¹³ Sõsd-y ne y zo-rãmb sẽn wʋmd y yellã võore. Nong-y n sõsd-y ne y tẽed-n-taas sẽn tar minim, n tõe n sõng-y tɩ y ra koms raood n basã. (Yel. 12:25; 18:24) Saam-bi-poak a Zoana ning yell d sẽn zoe n gom yeelame: “Mam yamẽ, m da lebga m yembre. La m sẽn da sõsd ne m zo-rãmb, sõnga maam wʋsgo.” Tigingã neb kẽer sã n gomd goam sẽn kɩt tɩ y tagsdẽ tɩ y ka võore, bõe la y tõe n maan tɩ sõng-yã?

14. Bõe yĩng tɩ d segd n ‘maand sũ-mar ne taaba, la d sakd n kõt taab sugri’?

¹⁴ Tall-y su-mar ne y tẽed-n-taasã. Bãng-y tɩ pa nebã fãa n na n gom goam sẽn na n yɩ-y noog ye. (Zak 3:2)D fãa pa zems zãng ye. Rẽ wã, neb kẽer sã n wa pa tar b sẽn yete, wall b sã n yeel bũmb tɩ sãam y sũuri, pa segd n ling-y ye. Tẽeg-y tʋm-tʋmd a Poll saglgã. A yeelame: “Bɩ y maand sũ-mar ne taaba, la y sakd n kõt taab sugr baa ned sã n wa tar yell ne a to.” (Kol. 3:13) Saam-bi-poak a ye b sẽn da yiis a ned tigingã pʋgẽ yeelame: “M tẽed-n-taas kẽer n da modgd n na n keng m raoodo, la b goamã yaool n da sãamda m sũuri. La a Zeova sõnga maam tɩ m tõog n kõ-b sugri.” Bõe la tigingã neb tõe n maan n sõng ned ning b sẽn yiis tigingã pʋgẽ wã zakã neb nins sẽn ket n tũud a Zeova wã?

TIGINGÃ NEB SẼN TÕE N MAAN N SÕNGE

15. Bõe n tõe n sõng zak rãmb nins b sẽn yiis b ned tigingã pʋgẽ tɩ nan pa kaoosã?

¹⁵ Maand-y ned ning b sẽn yiis tigingã pʋgẽ wã zakã neb nins sẽn ket n tũud a Zeova wã neere. Saam-bi-poak a ye yʋʋr sẽn boond t’a Miryam wilgame tɩ b sẽn wa n yiis yẽ tão tigingã pʋgẽ wã, yẽ ra maanda yɩɩr ne tigissã kẽnde. A yeelame: “Mam da yɛɛsda nebã sẽn na n tags bũmb ning mam zugu. M tẽed-n-taas wʋsg sũy ra sãama wʋsg me ne yell ning sẽn maanã. B pa gom m tão wã yell wẽng ye. Woto kɩtame tɩ m da pa le tagsd tɩ m yaa m yembr m sũ-sãangã pʋgẽ ye. Saam-bi-poak a to me yeelame: “B sẽn wa n yiis d bi-riblã tigingã pʋgẽ wã, d zo-rãmb n wa n bels-do. Kẽer yeelame tɩ b pa mi b sẽn na n yeel ye. Sãnda naaga maam n yãbe, neb a taab tool-m-la lɛta n keng m raoodo. Woto sõnga maam wʋsgo!”

16. B sã n yiis ned tigingã pʋgẽ, bõe la tigingã neb tõe n maan n bels a soabã zak rãmb la b keng b raoodo?

¹⁶ Ket-y n sõngd-y ned ning b sẽn yiis tigingã pʋgẽ wã zak rãmba. B ratame tɩ y wilg-b tɩ y nong-b lame la y keng b raoodo. (Ebre. 10:24, 25) Wakat ninga, ned b sẽn yiis tigingã pʋgẽ zak rãmb mikdame tɩ tigingã neb kẽer pa le baood bãmb zĩiga, tɩ yaa wa b yiisa bãmb me tigingã pʋgẽ. D pa segd n maan tɩ b wa tagsd woto ye. Sẽn yɩɩd fãa, d segd n pẽgda kom-bɩɩs nins sẽn tar roagd sẽn bas a Zeova tũubã, la d kengd b raoodo. Saam-bi-poak a ye yʋʋr sẽn boond t’a Mariya sɩd la b wa n yiis tigingã pʋgẽ, t’a yi n bas a zakã rãmba. Ad a Mariya sẽn yeele: “Mam zo-rãmb kẽer ra wat n sõngda maam n segendẽ, la b sõngd-m tɩ m zãmsd m kambã Biiblã. B kʋm-m lame la b naag-m n yãbe. Nebã sã n da rõt maam, b ra gomd n teend-m lame. B kenga m raoodo.—Rom. 12:13, 15.

17. Bõe la kãsem-dãmbã tõe n maan n bels neb nins sũy sẽn sãamã?

¹⁷ Kãsem-dãmba, tũnug-y ne segb buud fãa y sẽn paam n keng ned ning b sẽn yiis tigingã pʋgẽ wã zak rãmb raoodo. Sẽn yɩɩd fãa, yãmb n segd n bels y tẽed-n-taas nins b sẽn yiis b ned tigingã pʋgẽ wã. (1 Tes. 5:14) Keng-y b raood nand tɩ tigissã sɩnge, la tigissã poor me. Kẽnd-y n kaagd-b la y pʋʋsd ne-ba. Moond-y koɛɛgã ne-ba, la y mi n bool-b tɩ b wa naag yãmb n maan y zak pʋgẽ Biibl zãmsgã. Kãsem-dãmbã segd n kʋmda d tẽed-n-taas nins sũy sẽn sãamã, n nong-b la b wilgdẽ tɩ b yell pak-b lame.—1 Tes. 2:7, 8.

KELL-Y N TEEG-Y-YÃ A ZEOVA LA Y RA KOMS RAOOD N BAS YE

18. Sẽn zems ne 2 Pɩyɛɛr 3:9 wã, bõe la Wẽnnaam dat tɩ neb nins sẽn bas a tũubã maane?

¹⁸ A Zeova “pa rat tɩ ned baa a ye sãam ye. A ratame tɩ nebã fãa tek yam n kos sugri.” (Karm-y 2 Pɩyɛɛr 3:9.) Baa ned maana yel-wẽn-kãsenga, a vɩɩmã ket n tara yõod Wẽnnaam nifẽ. Tags-y yaood-kãseng ning a Zeova sẽn yao tõnd ned kam fãa yĩngã yelle. Rat n yeel t’a sẽn kɩt t’a Bi-ribl-nongrã wa ki tɩ yɩ maoongã. A Zeova sõngda neb nins sẽn bas a tũubã, n dat tɩ b lebg n wa a nengẽ. A ratme tɩ b maan woto, wala a Zeezi yel-bũnd ning sẽn gomd biig sẽn menemã sẽn wilgdã. (Luk 15:11-32) Neb wʋsg sẽn da bas sɩdã wa n lebg n waa b saasẽ Ba a Zeova sẽn nong-bã nengẽ. La tigingã neb me reeg-b-la ne sũ-noogo. Elizabɛt ning yell d sẽn gomã wa n paamame tɩ b lebs n deeg a biigã tigingã pʋgẽ. A yeelame: “M sũur nooma wʋsgo, neb wʋsg sẽn sõng tõnd tɩ d pa koms raood n basã.”

19. Bõe yĩng tɩ d tõe n kell n teeg a Zeova?

¹⁹ D tõe n kell n teega a Zeova wakat fãa. A saglsã nafd-d-la wakat fãa. A yaa Ba sẽn yaa kõat la nimbãan-zoɛta, n nong neb nins sẽn tũud-a la b nong-a ne b sũy fãa wã. Bas-y y yam t’a pa na n tol n daag yãmb n bas y sũ-sãamsã wakat ye. (Ebre. 13:5, 6) Mark ning yell d sẽn gomã yeelame: “A Zeova pa na n tol n daag tõnd n bas ye. A na n sõng-d-la wakat fãa, d sã n wa maood ne zu-loeese.” A Zeova na n ket n kõt-y-la “pãng ning sẽn yɩɩd ninsaal rẽndã.” (2 Kor. 4:7) Hakɩɩka, y tõe n kell n maana sɩd ne a Zeova la y ket n saagd manegre, baa ned y sẽn nong sã n wa bas sɩdã.