B sã n yiis y roagd tigingã pʋgẽ bɩ y wilg tɩ y yaa kɩs-sɩd soaba
1. Yel-bʋg n tõe n yɩ makr ne kiris-ned burkĩndã ne Wẽnnaamã?
1 Loees nins sẽn be zak neb ne taab sʋkã tõe n talla pãng wʋsgo. B sã n yiis kiris-ned kẽed-n-taaga, a biiga, a roagda, bɩ ned a to a sẽn kĩ ne tigingã pʋgẽ, bɩ nin-kãensã sã n basa tigingã b toore, yaa makr n kõ-a. (Mat. 10:37) Wãn-wãn la kiris-neb nins sẽn gãd sɩdã segd n ges roagd a woto? La a sã n vɩ ne yãmb zak a yembr pʋgẽ y manesmã segd n yɩɩ toor bɩ? Nanand bɩ d lebg n tẽeg Biiblã sẽn yet bũmb ning yel-kãngã zugu. Noy nins d sẽn na n yã wã tɩ loee ne b rãmb nins b sẽn yiis tigingã pʋgẽ wã la b rãmb nins sẽn yi tigingã pʋgẽ b toorã.
2. Sã n yaa ne Biiblã, manesem bʋg la kiris-nebã segd n tall ne neb nins b sẽn yiis tigingã pʋgẽ wã?
2 Tõnd manesem sẽn segd n yɩ to-to ne b rãmb nins b sẽn yiisã: Wẽnnaam Gomdã kõo tõnd noor tɩ d ra maan tũud-n-taar ne ned b sẽn yiis tigingã pʋgẽ ye: “Ra maan tuud-n-taar ne ned sẽn boond a meng tɩ ba-biiga n yaool n yaa nin-yoaada walla zoe-bõn soaba walla bõn-naands pʋʋsda walla nin-tʋʋsa walla rã-yũuda walla fãad ye, hal tɩ yãmb da sak n dɩ ne ned a woto ye. . . . Bɩ y yiis nin-wẽng kãng yãmb sʋka.” (1 Kor. 5:11, 13) A Zezi goam nins sẽn be Matɩe 18:17 pʋgẽ wã me leb n zemsa ne yel-kãngã: “Bɩ f ges [ned ning b sẽn yiisã] wa ned sẽn ka pʋʋsd Wẽnnaam la a wa yõor yaood deegda.” A Zezi kɛlgdbã ra mii vẽeneg tɩ wakat kãng Zʋɩf rãmbã ra ka maand tũud-n-taar ne bu-zẽmsã neb ye, la b ra bakd-b-la toor wa neb b sẽn yiis buudẽ. Dẽ a Zezi ra zãmsda a karen-biisã tɩ b ra lagem ne neb nins b sẽn yiisã ye.—Ges-y yʋʋmd 1981, yʋʋm-sar kiuug rasem 15 Gũusg Gasgã (ne farende), seb-neng 17-19.
3, 4. B gɩdga tũud-n-taar bʋg buud ne neb b sẽn yiis bɩ sẽn yi tigingã pʋgẽ b toorã?
3 Rẽ wilgdame tɩ kiris-neb nins sẽn yaa wẽn-sakdba ka sõsd ne neb b sẽn yiis tigingã pʋgẽ tẽebã yɛl zut ye. La ka rẽ bal ye. Wẽnnaam Gomdã yetame tɩ d ka segd “n dɩ ne ned a woto” meng ye. (1 Kor. 5:11) Woto yĩnga, d ka segd n naag a soabã n maan yɛl wala yi n gõ ne taab n tɩ kok pemsem, soaare, ball tãooga, kẽng raag bɩ reem zĩigẽ ne taab bɩ rɩ ne taab zak pʋgẽ bɩ rɩɩb koosg zĩigẽ ye.
4 La yaa wãn to ne gom ne ned b sẽn yiis tigingã pʋgẽ wã? Yaa sɩd tɩ Biiblã pa gom yɛl nins fãa sẽn tõe n wa zĩnd rẽ wɛɛngẽ wã yell ye, la 2 Zã 10 sõngda tõnd tɩ d bãng a Zeova tagsg yel-kãngã zugu. Be b yeelame: “Ned sã n wa yãmb nengẽ n ka sakd zãmsg kãnga, bɩ y ra reeg yẽnda yãmb yiri la y ra pʋʋs yẽnda ne kãab sõama ye.” Yel-kãngã zugu, yʋʋmd 1981 yʋʋm-sar kiuug rasem 15 Gũusg Gasgã (ne farende), seb-neng 23 yeelame: “Fo sã n pʋʋs ned pʋʋs-zaalga, tõe n yaa sõasga, bɩ zood meng sɩngre. Rẽ yĩnga tõnd datame n maan woto ne ned b sẽn yiis bɩ?”
5. B sã n yiis ned tigingã pʋgẽ, bõe la a kong-yã?
5 Sɩd yaa wala Gũusg Gasg kãng sẽn yeel a seb-neng 29 wã pʋgẽ wã bala: “Kiris-nedã sẽn bas a meng n kẽ yel-wẽn pʋgẽ tɩ yɩ tɩlae tɩ b yiis-a wã kɩtame t’a kong nafa wʋsgo: a zems-n-taarã ne a Zeova, . . . tũud-n-taarã ne saam-biisã sẽn be yamleoogã, tɩ lagem-n-taar wʋsg a sẽn dag n tar ne roagd sẽn yaa kiris-neb me be sʋka.”
6. Rẽ yĩnga yaa tɩlae tɩ kiris-ned sã n vɩ ne roagd b sẽn yiis zak a yembr pʋgẽ bɩ a bas lagem-n-taar buud fãa ne-a bɩ? Wilg-y y leokrã võore.
6 Nedã sã n vɩ ne tõnd zak a yembre: Woto rat n yeelame tɩ kiris-ned sã n vɩ ne a roagd b sẽn yiis zak a yembr pʋgẽ, a ka tog n gom ne-a, n dɩ ne-a, la a maan lagem-n-taar ne-a b daar fãa tʋʋma pʋgẽ bɩ? Yʋʋmd 1991, tʋʋl-nif kiuug rasem 15 Gũusg Gasgã (ne farende) kõo vẽnegr a woto a seb-neng 22 wã tẽngre: “Kiris-neb zak pʋgẽ tɩ b sã n yiis b roagd a yembre, roagd kãng ket n yaa zakã ned n tõe n lagem ne-b zakã daar fãa yɛl la a tʋʋm pʋsẽ.” Dẽ bee ne zakã neb tɩ b yãk hal sẽn ta zĩ-bʋg la ned ning b sẽn yiisã na n naagd n dɩtẽ la a maand zakã tʋʋm a taabã. Baasg zãnga, b ka rat tɩ saam-biis nins sẽn maand tũud-n-taar ne-bã ket n neẽ tɩ yɛlã fãa ket n yaa wa pĩndã ye.
7. B sã n yiis zakã neda, toeen-bʋg n na n zĩnd b lagem-n-taarã tẽebã yɛl wɛɛngẽ?
7 Baasgo, yʋʋmd 1981, yʋʋm-sar kiuug rasem 15 Gũusg Gasgã (ne farende), seb-neng 26, wilga woto nedã b sẽn yiisã bɩ sẽn yi tigingã pʋgẽ a toorã wɛɛngẽ: “Lagem-n-taar ning b sẽn dag n tar ne taab tẽebã wɛɛngẽ wã saa fasɩ. Baa sã n yaa f roagda, tɩ y vɩ ne taab zak a yembr menga, segd n yaa woto. . . . Rẽ rat n yeelame tɩ toeeng n na n zĩnd tẽebã yɛl nins b sẽn da naagd taab n maand pĩnd zakã pʋgẽ wã wɛɛngẽ. Wala makre, b sã n yiisa sɩdã tigingã pʋgẽ, a pagã ne a kambã ka na n sak t’a lʋɩt taoor zak pʋgẽ zãmsgã pʋgẽ bɩ t’a karemd Biiblã la a pʋʋsd b yĩng ye. A sã n dat n pʋʋse, wala makre rɩɩbã wakate, a tara sor n tõe n maan dẽ a meng zakẽ. La zakã neb a taab tõe n pʋʋsa Wẽnnaam b sũyẽ. (Yel. 28:9; Yɩɩl 119:145, 146) La yaa wãn to yẽ, zakã nedã b sẽn yiisã sã n dat n lagem ne zakã rãmb b sã n wa karemdẽ bɩ b zãmsd Biiblã ne taaba? Zakã neb a taab tõeeme n bas-a t’a zĩnd ne-b n kelge, a sã n ka na n bao n na n zãms-ba, bɩ a taas a tagsa tũudmã wɛɛngẽ.”
8. Zɩɩb bʋg la roagdb sẽn yaa kiris-neb tar ne b biig sẽn be b zakã pʋgẽ b sẽn yiisi?
8 Sã n yaa biig sẽn nan pa kãsem sẽn be zakã pʋgẽ la b yiis-yã, ket n ya a roagdbã sẽn yaa kiris-nebã zɩɩb tɩ b wub-a. Yʋʋmd 1988 sɩpaolg kiuug rasem 15 Gũusg Gasgã (ne farende), seb-neng 20, yeela woto: “Wala b sẽn na n ket n kõt-a rɩɩbo, futu, la ro-gãagã, b segd n zãms-a lame la b kibl-a tɩ zems ne Wẽnnaam Gomdã. (Yel. 6:20-22; 29:17) Dẽ roagdb sẽn tar nonglem tõe n maana segls n zãms Biiblã ne-a, baa b sã n yiis-a-la tigingã pʋgẽ. B sã n zãms Biiblã ne-a bãmb ne yẽ bala, tõeeme tɩ remsg ning a sẽn na n paamã na n naf-a lame. Bɩ b tõeeme n dɩk sard t’a ket n tõe n naagdame n maand zak pʋgẽ Biibl zãmsgã.”—Ges-y yʋʋmd 2001 zĩ-likr kiuug pipi daar Gũusg Gasgã, seb-neng 27, 28.
9. Yaa hal sẽn ta zĩ-bʋg la kiris-ned segd n maan lagem-n-taar ne a ned sẽn ka vɩ ne-a zak a yembr pʋgẽ b sẽn yiisi?
9 Roagdb nins sẽn ka be ne tõnd zak a yembrã: Yʋʋmd 1988, tʋʋl-nif kiuug rasem 15 Gũusg Gasgã (ne farende) yeta woto seb-neng 28 pʋgẽ: “Tõnd roagdã b sẽn yiisã bɩ sẽn yi tigingã pʋgẽ a toorã sã n ka be ne tõnd zak a yembre, yɛlã yaa toore. D tõeeme la bal n ka tol n tall lagem-n-taar baa bilf ne roagdã ye. Baa sã n mikame tɩ yaa rogem yɛl n kɩt tɩ yã taab yaa tɩlae, b segd n modga wa b sẽn tõe tɛk tɩ lagem-n-taarã ra yɩ wʋsgo,” tɩ zems ne noor ning Wẽnnaam sẽn kõ tɩ d “ra maan tũud-n-taar ne ned” sẽn maand yel-wẽn n pa tekd yam n kos sugrã. (1 Kor. 5:11) Kiris-neb sẽn yaa kɩs-sɩd dãmb segd n modgame n da maan tũud-n-taar ne roagd a woto tɩ yaool n ka tɩlae ye. Baa afɛɛr dãmb maaneg ne nin-kãensã wɛɛngẽ, b segd n maoome n boog rẽ wʋsg wa b sẽn tõe tɛka.—Ges-y yʋʋmd 1981 yʋʋm-sar kiuug rasem 15 Gũusg Gasgã (ne farende), seb-neng 28-29.
10, 11. Kiris-ned na n tagsa bõe yell n yaool n bas t’a roagd b sẽn yiis lebg n wa vɩɩmd a zakã pʋgẽ?
10 Gũusg Gasgã leb n goma yell a to sẽn tõe n wa puk yelle, n yeele: “Yaa wãn to yẽ, b sã n yiis ned f sẽn kĩ ne sõma-sõma, wala f biig bɩ roagd sẽn ka vɩ zakã pʋgẽ, tɩ rẽ poor t’a rat n lebg n wa vɩɩmd zakã pʋgẽ? Sẽn tɩ loe ne yellã sẽn yaa to-to, zakã neb tõe n dɩka sard ne b sẽn na n maan bũmb ninga. Wala makre, tõeeme tɩ f roagd b sẽn yiis yaa bãad bɩ a ka le tar ligd n na n ges a meng yelle, bɩ a ka le tõe n zã a meng ye. Sã n yaa ne Gʋlsg Sõamyã, kambã sẽn yaa kiris-nebã segd n gesa b roagdba yelle. (1 Tɩm. 5:8) . . . Bũmb ning b sẽn tõe n maanã bee ne roagdã raab meng-meng sẽn ya a soaba, a manesmã, la ne wala zakã neb neer tẽebã wɛɛngẽ yell sã n paka zaka soaba.”—Yʋʋmd 1981 yʋʋm-sar kiuug rasem 15 Gũusg Gasgã (ne farende), seb-neng 27-28.
11 Sã n yaa biiga, sõs-kãng me paasa woto: “Wakat ninga roagdb sẽn yaa kiris-neb sakame tɩ b biig b sẽn yiis sẽn lebg bãad lebg n wa yiri. La wakat fãa yaa roagdbã n segd n mag n ges biigã yɛl sẽn yaa to-to. Rẽ yĩnga biigã b sẽn yiisã ra geta a meng yell n ka leb n tõe rẽ bɩ? Bɩ sẽn yɩɩd fãa a sẽn dat n lebg n wa yirã yaa vɩɩmã sẽn na n lebg nana n yɩɩd ne-a wã yĩnga? A vɩɩma manesem la a tagsgã yaa wãn-wãna? A na n kẽesa ‘rabɩll’ zakã pʋgẽ bɩ?—Gal. 5:9.”
12. Segls nins b sẽn maan yiisgã wɛɛngẽ wã nafa kẽer la bʋse?
12 Kɩs-sɩd ne a Zeova sẽn wat ne nafa ninsi: Bee nafr tɩ d sak segls nins sẽn be Biiblã pʋgẽ sẽn tɩ loe ne ned yiisgã, la d zãagd d mens ne wẽng maandb nins sẽn ka tekd yam n kos sugrã. A kogenda tigingã yɩlemde, la a kɩtdẽ tɩ b bãngd tõnd n bakdẽ wa kiris-neb sẽn teend vɩɩm manesem noy nins sẽn yaa sõma wʋsg sẽn be Biiblã pʋgẽ wã. (1 Pɩɛ. 1:14-16) Rẽ kogenda tõnd ne yɛl sẽn tõe n wa sãam tõnd vɩɩmã. (Gal. 5:7-9) Woto leb n kɩtdame tɩ wẽng-maandã tõe n dɩ kiblgã a sẽn paamã nafa sõma, tɩ rẽ tõe n sõng-a t’a tall “tɩrlem la laafɩ.”—Heb. 12:11.
13. Toeen-bʋg la zak a yembr neb maan-yã, la rẽ waa ne bõe?
13 Saam-biig ne a ma-bi-poak kelga sõasg tigims gĩnd tigis-kãsengẽ n yã tɩ b ra segd n toeema manesem ning b sẽn da tar ne b ma wã sẽn da vɩ zĩig a to b sẽn da yiis tɩ yʋʋm a yoobã. Tigis-kãsengã poore, tao-tao bala rao wã boola a ma wã, n kõ-a bas-m-yam tɩ b nong-a lame, la a wilg tɩ b ka na n le tõog n gom ne-a tɩ sã n ka rogem yel-kãsems sẽn baood tɩ b gom ne taab bɩ b yã taab sasa ye. Rẽ poore pa kaoos la b ma wã sɩng tigissã waoongo, tɩ b wa baas n lebg n deeg-a tigingã pʋgẽ ye. Sẽn paase, a sɩdã sẽn da ka be sɩdã pʋgẽ wã sɩnga Biibl zãmsgo, n wa baas n deeg lisgu.
14. Bõe yĩng tɩ d segd n teel segls nins b sẽn maan yiisgã yĩngã ne kɩs-sɩda?
14 D sã n teend segls nins b sẽn maan yiisgã yĩng tɩ be Gʋlsg Sõamyã pʋgẽ wã, wilgdame tɩ d nonga a Zeova, la kɩtdame t’a leok ned ning sẽn paoogd-a yẽ wã. (Yel. 27:11) D sã n maan dẽ me, d tara bas-m-yam t’a Zeova na n ninga tõnd barka. Rĩm a Davɩɩd gʋlsa woto: “Mam nin geta sɩd rãmba sẽn be soolem pʋgẽ wã, tɩ bãmb tõe n zĩnd ne maam. Ned ninga sẽn tũud pʋ-peelem sora na n yɩɩ mam tʋm-tʋmda.”—Yɩɩl 101:6.