A Zeova sã n wa kibl ned tɩ tõnd teel a Zeova, d wilgda nonglem

B sã n yiis kiris-ned tigingã pʋgẽ, kogenda tigingã nebã. Leb n kibinda sẽn maan-a yel-wẽnd n pa rat n tek yamã. (1 Kor. 5:6, 11) D sã n teel a Zeova a sã n wa kibl neda, wilgdame tɩ d tara nonglem. La sẽn mik tɩ b sã n yiis ned tigingã pʋgẽ, sãamda a roagdbã la bʋ-kaoor sullã neb sũyã, la neb a taab me sũyã, rẽ yĩnga d tõe n sɩd yeelame tɩ d sã n teel a Zeova wakat kãnga, wilgdame tɩ d tara nonglem sɩda?

Sẽn yɩɩd fãa, wilgdame tɩ d nonga a Zeova, la a noyã ne a saglsã sẽn zems zãngã. (1 Pɩy. 1:14-16) Sẽn paase, wilgdame tɩ d nonga ned ning b sẽn yiis tigingã pʋgẽ wã. A Zeova sã n kibl neda, zabdame, la tõe n woma “bɩɩs sẽn yaa laafɩ la tɩrlem.” (Ebre. 12:5, 6, 11) D sã n ket n maand tũud-n-taar ne ned b sẽn yiis tigingã pʋgẽ, wall ned sẽn yãk yam n pa le yaa a Zeova Kaset soaba, wilgdame tɩ d pa teend a Zeova sẽn kibind-a wã ye. D tẽeg t’a Zeova kibinda a nin-buiidã “ne tɩrlem.” (Zer. 30:11) D na n ket n saagdame t’a soaba na n lebg n waa d saasẽ ba wã nengẽ. La nananda, d ket n teend kiblg ning a Zeova sẽn kibind-a wã, la d ket n wɩngd ne bũmb nins d sẽn maand d tẽebã kengr yĩngã.—Eza. 1:16-18; 55:7.

GES-Y VIDEO WÃ: D KELL N MAAN SƖD NE A ZEOVA NE D SŨUR FÃA. TƖ RẼ POOR BƖ Y LEOK SOGSGÃ:

• 

  Kiris-neb sã n wub b biig a Zeova tũudmã pʋgẽ, t’a wa bas a Zeova tũubu, wãn to la rẽ namsd-ba?

• 

  Bõe la tigingã neb tõe n maan n teel a zakã neb nins sẽn ket n maand sɩd ne a Zeova wã?

• 

  Biiblã kiba-bʋg n wilgd tɩ d sẽn maand sɩd ne a Zeova n tar yõod wʋsg n yɩɩd d sẽn maand sɩd ne d zakã rãmba?

• 

  Wãn to la d tõe n maan sɩd ne a Zeova n yɩɩd d sẽn maand sɩd ne d zakã rãmbã?