Kisgrã tõe n wa saame!

Baa b sã n zɩ n kisg yãmba, tõe tɩ y zoe n yãa neb sẽn kis b taabã. D nong n wʋmda kibay sẽn gomd neb sẽn kis b taaba, b buudu, b tẽnga, wall b sẽn yaa rap sẽn kẽed ne rap bɩ pagb sẽn kẽed ne pagb yĩnga. Woto kɩtame tɩ goosneema-rãmb wʋsg yiis noyã, tɩ ned sã n maan a to wẽng a sẽn kis-a yĩng bɩ b sɩbg-a.

Kisgr wata ne kisgri. Sɩd me, naoor wʋsgo, neb nins b sẽn kisã me wẽnegd n kisa neb a taaba, hal n maand-b wẽnga, tɩ kell n yaa woto wakat fãa.

Tõe tɩ b zoe n yɩɩ yãg-yãg n kao y bʋʋdo, n paoog yãmba, n yaal-yã, n tʋ yãmb wall n bugs-yã. La kisgr pa tek woto bal ye. Naoor wʋsg wat n baasda ne wẽnem tʋʋma, wala makre, maan-taab-pãnga, bi-be-tʋʋma, yõgbo, wall nin-kʋʋre. Tõe n waa ne buud ning neb vargr menga.

Seb-kãngã pʋgẽ, d na n leoka sogsg a wãna, la d ges bũmb kẽer d sẽn tõe n maan tɩ sõng-d tɩ d ra kisg d taabã ye. Ad sogsgã:

• Bõe yĩng tɩ neb wʋsg kis b taabã?

• Bõe la d tõe n maan tɩ sõng-d tɩ d ra le kisg d taabã?

• Wakat n wat tɩ kisgr buud fãa na n sa bɩ?