Bõe yĩng tɩ nebã kisgd taab n pa satẽ?
Bõe yĩng tɩ duniyã zugu, neb wʋsg kis b taabã? Sẽn na yɩl n bãng rẽ, yaa tɩlɛ tɩ d bao n bãng kisgr sẽn dat n yɛɛlga, bũmb ning sẽn tõe n kɩt tɩ ned wa sɩng a to kisgri, la kisgrã sẽn yelgd to-to.
Kisgrã yaa bõe?
Kisgr yaa f sẽn na n tugd beem sẽn yaa kãseng ne neda, wall ne neb sulli. Pa f sũur sẽn pa noom ne ned bal ye. Yɩɩda rẽnda.
SƖNGDA WÃN TƖ NED WA KIS A TO?
Bũmb toor-toor n tõe n kɩt tɩ ned wa sɩng a to kisgri. Nina wat n sɩnga sull ning neb kisgri, la pa b sẽn maand sẽn yaa wẽng yĩng ye. Tõe tɩ yaa a sẽn tagsd tɩ b yaa nin-wẽnse, la tɩ b pʋd n pa tõe n toeemã. A tõe n geta nin-kãensã wa neb sẽn ka võore, la neb sẽn tõe n wa ne yelle. Neb nins sẽn kis b taabã mi n yaa neb sẽn da paam namsgo, neb b sẽn da maan pãnga, pa rẽ bɩ yell ning n maan tɩ b sũy sãam wʋsgo, tɩ b sɩng b taabã kisgri.
KISGRÃ SẼN YELGD TO-TO
Wakat ninga, ned tõe n kisa a to, n yaool n zɩ n seg a soabã meng ye. Wala makre, ned zak rãmb wall a zo-rãmb sã n yãk ned n kisa, yẽ me tõe n wa naag n kisa a soabã zaalem bala. Dẽnd tõe n yɩɩ nana, tɩ neb sull wa naag taab n kis sull a to neba.
D sã n bãng kisgrã sẽn yelgd to-to wã, d bãngda neb wʋsg sẽn kis b taabã võore. La sẽn na yɩl n da le kisg d taabã, d segd n bao n bãnga kis-taabã sẽn sɩng to-to. Biiblã tõe n sõng-d lame tɩ d bãng rẽnda.
BIIBLÃ WILGDA KIS-TAABÃ SẼN SƖNG TO-TO
WẼNNAAM PA NAAN NINSAAL T’A TUG BEEM NE A TO YE. Malɛk a ye sẽn da be saasẽ wa n yikame n kɩɩs Wẽnnaam. Yaa rẽ tɛk la beemã sɩng-yã. B wa n boonda malɛg-kãng t’a Sʋɩtãana. A Sʋɩtãan sẽn wa n sɩng Wẽnnaam kɩɩsgã t’a ra zoe n “yaa nin-kʋʋda.” A sẽn “yaa pʋ-yagd la ziri wã ba” wã yĩnga, a kɩtame tɩ kisgrã la beemã kell n yelge. (Zã 8:44; 1 Zã 3:11, 12) Biiblã yetame t’a Sʋɩtãan yaa sɩlem soaba, la t’a sũurã yikame t’a rat n maan nebã wẽnga.—Zoob 2:7; Vẽnegre 12:9, 12, 17.
YAA NANA TƖ D KISG D TO, D SẼN PA ZEMS ZÃNGÃ YĨNGA. A Ãdem sẽn yaa pipi ninsaalã me kɩɩsa Wẽnnaam wa a Sʋɩtãan. Rẽ kɩtame tɩ ninsaalbã fãa pa zems zãnga, la b yaa yel-wẽn-maandba. (Rom dãmbã 5:12) A Ãdem pipi bi-ribl a Kayẽ kisga a yao a Abɛlle, hal n wa kʋ-a. (1 Zã 3:12) Yaa sɩd tɩ neb wʋsg nonga b taabã, la b zoet b nimbãanega. La d sẽn pa zems zãngã yĩnga, nebã fãa la bal wilgdame tɩ yaa b mensã yell bal n pak-ba, n yaa wuk-m-mens rãmb la yão-be-neba. Woto fãa yaa yel-manesem sẽn kɩtd tɩ nebã kis taaba.—2 Tɩmote 3:1-5.
BŨMB A TO SẼN KƖT TƖ KISGRÃ TAR YELGRE. Dũniyã neb tara goam la yel-manesem sẽn kɩtd tɩ nebã pa le zoet b taabã nimbãanega, la b tʋmd nen-kɛglem tʋʋma, tɩ rẽ wat ne kisgri. Dũniyã tõr sẽn be wẽng soab a Sʋɩtãan nugẽ wã yĩnga, kɩtame tɩ kis-taabã, bu-welsgã, tʋyã, wẽgbã la nen-kɛglmã be zĩig fãa.—1 Zã 5:19.
Biiblã pa wilgd bũmb ning sẽn wat ne kisgrã bal ye. A wilgda bũmb ning me d sẽn tõe n maan tɩ sõng-d tɩ d ra kisg d taabã.