Bõe yĩng tɩ nebã kis taab wʋsg woto?—Bõe la Biiblã yet rẽ wɛɛngẽ?

Kibayã pʋsẽ, b nong n gomda zab yelle, goam sẽn wat ne kisgri, buud a ye ne buud a to neb sẽn kis taab yelle, la nen-kɛglem tʋʋm yelle.

• “Goam sẽn wat ne kisgr pida reezo sosiyo rãmbã pʋsẽ, Israyɛll ne Hamas zabrã yĩnga, la neb nins sẽn pirsd b taabã tɩ b tʋmd nen-kɛglem tʋʋm la b kis b taabã yĩnga.”—The New York Times, yʋʋmd 2023, sɩpaolg kiuugã rasem 15.

• “Zĩ-likr kiuugã tɛka, kisgrã la goam sẽn kɩtd tɩ nebã kʋʋd taabã lebgda wʋsg dũniyã gill zugu.”—A Dennis Francis, sẽn yaa Assemblée générale des Nations unies persidã wã, yʋʋmd 2023 sɩpaolg kiuugã rasem a 3.

Goam sẽn wat ne kisgrã, nen-kɛglem tʋʋmã, la zabã pa sɩng rũndã ye. Biiblã gomda neb sẽn zĩnd pĩnd wẽndẽ wã yelle, n da ‘yiisd gom-wẽns wa neb sẽn ning pɛɛm tãpẽ,’ la sẽn da nong zab la nen-kɛglem tʋʋma. (Yɩɩn-sõamyã 64:3; 120:7; 140:1) La Biiblã wilgdame tɩ kisgrã tõnd sẽn ne rũndã-rũndã wã tara võore.

Kisgrã yaa dũniyã saab bãnde

Biiblã wilgda bũmb a yiib sẽn kɩt tɩ kisgrã be zĩig fãa rũndã-rũndã wã.

1. 1. Biiblã ra pĩnd n togsame tɩ wakat n na n zĩnd tɩ ‘neb wʋsg nonglem pãng na n booge.’ (Matiye 24:12) Nebã na n tara manesem sẽn na n kɩt tɩ b kisg taaba, la pa sẽn na n kɩt tɩ b nong taab ye.—2 Tɩmote 3:1-5.

2. 2. Yaa a Sʋɩtãan munaafɩɩkã n kɩt tɩ kisgrã yaa wʋsg rũndã-rũndã wã. Biiblã yetame tɩ “dũniyã tõr bee wẽng soabã nugẽ.”—1 Zã 5:19; Vẽnegre 12:9, 12.

Biiblã wilgdame me tɩ ka la bilfu, Wẽnnaam na n menesa bũmb nins fãa sẽn wat ne kisgrã. Sẽn paase, a na n kɩtame tɩ yɛl nins fãa kisgrã sẽn wa ne wã sa. Ad Biiblã sẽn pʋlme:

• “Wẽnnaam na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye. Bũmb nins sẽn da be pĩndã loogame.”—Vẽnegre 21:4.